1 Ebile Naomi matsalae o re ho yena: Moradi wa ka, na nke ke ka o batlela phomolo, o tle o iketle na?
2 Ha ke re jwale, Boase eo o kileng wa sebetsa le barwetsana ba hae ke wa heso na? Bona, bosiung bona, o ya olosa harese seotlong.
3 O iphotle, o tlole, o apare dikobo tsa hao, o theohele seotlong; o mpe o se ke wa ipontsha monna eo, a eso ho qete ho ja le ho nwa.
4 Ha a ya robala, o tsebe moo a robalang; jwale o ye, o apole maoto a hae, o robale fatshe teng; o tla o bolella seo o tla se etsa.
5 Ruthe a re ho yena: Ke tla etsa kahohle kamoo o mpolellang kateng.
6 Ebile o theohela seotlong, a etsa kahohle kamoo matsalae a mo laetseng kateng.
7 Eitse hobane Boase a je, a nwe, pelo ya hae e thabile, a ya robala qetellong ya setha sa harese. Ruthe a tla a nanya, a apola maoto a Boase, mme a robala.
8 Bosiu bo boholo, monna eo a tshoha, a fetoha, a bona mosadi a robetse maotong a hae.
9 A re: O mang na? Yena a re: Ke nna Ruthe, lekgabunyane la hao; o ale moleka wa kobo ya hao, hodima lekgabunyane la hao, etswe o le wa heso.
10 Boase a re: O hlohonolofatswe ke Jehova, moradi wa ka, hobane o entse sa morao hantle ho feta sa pele, kamoo o sa kang wa latella bahlankana kateng, leha e le ba ruileng, leha e le ba fumanehileng.
11 Mme jwale, moradi wa ka, se tshabe; ke tla o etsa ka tsohle tseo o di boletseng, hobane bohle ba motse wa tjhaba sa heso ba tseba hobane o mosadi ya kgabane.
12 Jwale, ke fela ke le wa heno, empa monna e mong o teng eo e leng wa heno ho fetisa nna.
13 Leha ho le jwalo, dula mona bosiu bona, mme hosasa, ha a rata ho phetha ditokelo tsa wa heno sebakeng sa hao, ke teng, a fele a di phethe; ha a sa rate ho phetha ditokelo tsa wa heno sebakeng sa hao, ka Jehova ya utlwang, ke nna ke tla di phetha; robala, ho be ho se.
14 A robala jwalo maotong a hae, ha ba ha esa; a ntoo tsoha, batho ba eso ho tsebe ho bonana. Hobane Boase o ne a itse: Ho se ke ha tsejwa hobane mosadi o kene seotlong.
15 A ntoo re ho yena: Nnee kobo eo o e apereng, o e tshware. A e tshwara, mme Boase a lekanya tekanyo tse tsheletseng tsa harese, a mo jarisa tsona, mme a boela hae.
16 Ruthe a tla ho matsalae; eo a re: Ho jwang, moradi wa ka? Yaba o mo phetela tsohle tseo monna eo a mo entseng tsona.
17 Hape a re: Tekanyo tseo tse tsheletseng tsa harese o nneile tsona, ka ho re: O se ke wa kgutlela ho matsalao o le feela.
18 Ebile Naomi o re: Dula, moradi wa ka, o be o tsebe kamoo taba ena e tla etsahala kateng; hobane monna eo a ke ke a lesa taba eo, a sa e phethe kajeno.