1 Imameleng, imameleng, lona setjhaba se sa swabeng, morero wa Jehova ha o eso ho tswale,
2 ha ho eso ho tle letsatsi le jwaloka mooko o fefolwang, ha ho eso ho tle hodima lona ho tuka ha bohale ba Jehova, ha le eso ho tle ho lona, tsatsi la bohale ba Jehova!
3 Batlang Jehova, baikokobetsi bohle ba lefatshe, ba etsang ka taelo ya hae; batlang ho loka, le batle boikokobetso; ekaba le ka tshoha le patwa tsatsing la bohale ba Jehova.
4 Hobane Gasa o tla tlohelwa, Ashkelone a fetohe nahathothe; Ashdode ba tla mo leleka motshehare o moholo, Ekrone a fotholwe.
5 Ho madimabe ba ahileng naheng e bapaneng le lewatle, setjhaba sa Bakerethe! Lentswe la Jehova le teng hodima hao, Kanana, lefatshe la Bafilesta; ke tla o timeletsa, o be o hloke le ya ka ahang ha hao!
6 Naha e bapaneng le lewatle e tla fetoha makgulo a badisa le masaka a dinku.
7 E tla ba naha ya masala a ntlo ya Juda; teng, ba tla fudisa mehlape ya bona; mantsiboya, ba robale matlung a Ashkelone; hobane Jehova, Modimo wa bona, o tla ba etela, a kgutlise baholehuwa ba bona.
8 Ke utlwile nyefolo ya Moabe le mahlapa a bana ba Ammone ba nyefotseng setjhaba sa ka, ba hlompholotseng moedi wa sona.
9 Ka baka leo, Jehova wa makgotla, Modimo wa Iseraele, o re: Ke a phela, ke re, Moabe o tla ba jwaloka Sodoma, bana ba Ammone ba be jwaloka Gomorra, e leng lefa la bobatsi, le dikgatampi tsa letswai, le nahathothe ka ho sa feleng; masala a setjhaba sa ka a tla ba lobela, le se setseng sa batho ba ka, se tla ba rua ka mokgwa wa lefa.
10 Tseo di tla ba hlahela ka baka la boikgohomoso ba bona, hobane ba nyefotse, mme ba ikgohomositse hodima setjhaba sa Jehova wa makgotla.
11 Jehova o tla tshabeha hodima bona, hobane o tla fedisa medimo yohle ya lefatshe, ba tle ho mo kgumamela, e mong le e mong ka ho tloha nqalong ya hae, e leng dihlekehlekeng tsohle tsa ditjhaba.
12 Le lona Bakushe, le tla ba ba bolailweng ke lerumo la ka!
13 Hape, Jehova o tla otlollela letsoho la hae ka nqa leboya, a timeletse Assiria, a fetole Ninive nahathothe le sebataolo se jwaloka lefeella!
14 Mehlape e tla botha teng, e leng dihlopha tsa diphoofolo tsa mefutafuta. Le wona moholodi le hlong di tla robala hodima dihlooho tsa ditshiya tsa teng; ho utlwahala nonyana e letsang molodi sefensetereng; monyako ke diqubu tsa ntho tse helehileng, hobane Jehova o beile mamati a dikedare pontsheng.
15 Ke wona motse oo o nyakaletseng, o neng o dutse ka kgotso, o neng o re pelong ya wona: Ke nna feela, ha ho o mong! ... O fetohile jwang nahathothe, moo ho bothang diphoofolo teng? E mong le e mong ya fetang pela wona o tla letsa molodi, a ba a tsokotse letsoho.