1 Ek het gehoor die Here sê vir my:
2 “Hoekom gebruik julle hierdie spreekwoord oral in die land? Julle sê: ‘Die pa’s het groen druiwe geëet, en toe het die kinders se tande stomp geword.’ ”
3 Die Here, Hy wat Here is, sê: “Julle mag nie hierdie spreekwoord weer in die volk Israel gebruik nie. Dit is seker, so seker soos Ek lewe.
4 Julle moet dit weet, almal se lewe behoort aan My, die lewe van die pa en die lewe van die kind. Hulle behoort aan My. Die persoon wat sonde doen, hý sal sterf.
5 “Iemand wat reg lewe en wat reg doen, soos Ek wil hê,
6 eet nie offer-etes op die berge nie,hy hou nie van die afgode van die volk Israel nie,hy maak nie iemand anders se vrou onrein nie,hy slaap nie by ’n vrou wat menstrueer nie,
7 hy verdruk niemand nie,hy gee die goed terug wat hy geneem het omdat iemand nie sy skuld kon betaal nie,hy vat nie ander mense se goed nie,hy gee vir honger mense kos en hy gee klere vir mense wat nie klere het nie,
8 hy sê nie dat mense rente moet betaal wanneer hy vir hulle geld leen nie, en wanneer hy sê dat hulle rente moet betaal, dan vra hy nie te veel rente nie,hy doen nie verkeerde dinge nie,hy oordeel reg tussen mense,
9 hy lewe soos Ek sê en hy doen wat Ek wil hê, hy doen die regte dinge.“So ’n mens lewe reg. Hy sal aanhou lewe, dit is seker.”Dit het die Here gesê, Hy wat Here is.
10 “Maar so ’n mens het miskien ’n wilde seun wat mense vermoor en wat party van hierdie verkeerde dinge doen.
11 Die pa het nie een van hierdie dinge gedoen nie, maar die seuneet offer-etes op die berge,of hy maak iemand anders se vrou onrein,
12 of hy verdruk mense wat hulleself nie kan help nie en wat niks het nie,of hy vat ander mense se goed,of hy gee nie iets terug wat hy geneem het omdat iemand hom nie kon betaal nie,of hy hou van afgode en hy doen dinge wat Ek haat,
13 of hy sê dat iemand rente moet betaal wanneer hy vir hom geld leen, en wanneer hy sê dat iemand rente moet betaal, dan vra hy te veel rente.“As die seun hierdie dinge doen, dan sal hy nie aanhou lewe nie. Hy het al hierdie dinge gedoen wat Ek haat, en hy sal sterf, dit is seker. Dit sal sy eie skuld wees.
14 “Maar so ’n seun kan die pa word van ’n seun wat al die sondes sien wat sy pa doen en wat dan self nie daardie sondes doen nie.
15 Hy eet nie offer-etes op die berge nie,hy hou nie van die afgode van die volk Israel nie,hy maak nie iemand anders se vrou onrein nie,
16 hy verdruk niemand nie,hy vat nie iets by iemand wanneer hy vir hom iets leen nie,hy vat nie ander mense se goed nie,hy gee vir honger mense kos en hy gee klere vir mense wat nie klere het nie.
17 Die goeie seun doen reg aan mense wat hulleself nie kan help nie,hy sê nie dat iemand rente moet betaal wanneer hy vir hom geld leen nie, en wanneer hy sê dat iemand rente moet betaal, dan vra hy nie te veel rente nie.Die goeie seun doen wat Ek wil hê en hy lewe soos Ek sê.“So iemand sal nie sterf omdat sy pa verkeerd gedoen het nie, hy sal aanhou lewe, dit is seker.
18 Maar sy pa het mense verdruk, hy het hulle goed gevat en hy het niks goed gedoen in sy land nie, dáárom het die pa gesterf oor sy sonde.
19 En julle vra hoekom Ek nie ’n seun straf oor die sonde van sy pa nie? Die seun het reg gedoen en reg gelewe, hy was gehoorsaam aan alles wat Ek gesê het en hy het dit gedoen. Hy sal aanhou lewe, dit is seker.
20 Die persoon wat sonde doen, is die persoon wat sal sterf. Ek sal nie ’n seun straf oor die sonde van sy pa nie en Ek sal nie ’n pa straf oor die sonde van sy seun nie. Dit sal goed gaan met die mens wat reg doen en dit sal sleg gaan met die mens wat verkeerd doen.
21 “En wanneer iemand wat altyd verkeerd gedoen het, ophou om al die sondes te doen wat hy gedoen het en hy lewe dan soos Ek sê en hy doen reg, dan sal hy aanhou lewe, dit is seker, hy sal nie sterf nie.
22 Ek sal nie daaraan dink dat hy opstandig was nie. Hy sal aanhou lewe omdat hy reg gedoen het.”
23 Die Here, Hy wat Here is, sê: “Ek wil glad nie hê dat die persoon wat verkeerd doen, moet sterf nie, Ek wil hê hy moet sy lewe verander sodat hy kan aanhou lewe.
24 “En wanneer iemand wat altyd reg gedoen het, ophou om reg te doen en hy doen verkeerd, dan sal hy nie aanhou lewe nie, want hy doen die dinge wat Ek haat, die dinge wat die mense doen wat altyd verkeerd doen. Ek sal nie dink aan alles wat hy gedoen het wat reg was nie. Hy was ontrou en hy het sonde gedoen, daarom sal hy sterf.
25 Julle sê Ek doen nie reg nie. Luister, volk Israel, is dit Ék wat nie reg doen nie of is dit júlle wat nie reg doen nie? Dit is júlle wat nie reg doen nie!
26 Wanneer iemand wat altyd reg gelewe het, ophou om reg te lewe en hy doen verkeerde dinge, dan sal hy daaroor sterf. Hy sal sterf omdat hy verkeerd gedoen het.
27 En wanneer iemand wat altyd verkeerd gedoen het, ophou om verkeerd te doen en hy doen reg, dan red hy sy eie lewe.
28 Hy het gesien wat kan gebeur en hy het opgehou om opstandig te wees, daarom sal hy lewe, dit is seker. Hy sal nie sterf nie.
29 Maar die volk Israel sê Ek doen nie reg nie. Hoekom sê julle so? Mense van Israel, dit is nie Ék wat verkeerd doen nie, dit is júlle wat nie reg doen nie!
30 Daarom sal Ek elkeen van julle oordeel oor wat hy gedoen het. Julle moet julle lewe verander en julle moet ophou om opstandig te wees. As julle dit nie doen nie, dan sal julle sonde soos ’n klip wees, en julle sal daaroor val.”Dit het die Here gesê, Hy wat Here is.
31 Julle moet ophou om opstandig te wees, julle moet ’n nuwe hart en ’n nuwe gees kry. Mense van Israel, hoekom wil julle sterf?
32 Die Here, Hy wat Here is, sê: “Ek wil nie hê dat mense moet sterf nie, Ek wil hê hulle moet hulle lewe verander sodat hulle kan aanhou lewe.”