1-7 “Elke stam moet ’n stuk grond in die land kry. Die grond wat hulle moet kry, is by die noordekant, langs die grens wat gaan van die stad Getlon verby die stede Lebo-Hamat en Gasar-Enan, tot by die noordgrens tussen die land Damaskus en die land Hamat. Elke stam se grond is tussen die oostekant en die see. Hier is die name van die stamme wat by die noordekant hulle grond kry, van noord na suid: Dan, Aser, Naftali, Manasse, Efraim, Ruben en Juda.
8 “Die grond wat julle vir die Here moet gee, moet langs die grond van Juda wees, van oos na wes. Dit moet 25 000 el breed wees en so lank soos die stukke grond van die stamme. Die gewyde plek moet in die middel van hierdie grond wees.
9 Een stuk grond wat julle vir die Here moet gee, moet 25 000 el lank en 10 000 el breed wees.
10 “Julle moet die gewyde grond só verdeel: Die priesters kry die grond by die noordekant. Die grond moet 25 000 el wees van oos na wes, en 10 000 el van noord na suid. Die gewyde plek van die Here moet op hierdie grond wees.
11 Hierdie grond moet die gewyde priesters se grond wees. Hulle is die nageslag van Sadok. Hulle het aangehou om vir My te werk en hulle het nie verkeerd gedoen soos die Israeliete nie. Dit is die Leviete wat verkeerd gedoen het.
12 Die priesters se grond is ’n present, dit is ’n stuk van die grond wat julle vir die Here moet gee, en dit is hoog-gewyd. Dit is langs die Leviete se grond.
13 Die Leviete kry die grond langs die priesters se grond, dit is 25 000 el lank en 10 000 el breed.
14 Niemand mag van hierdie grond verkoop of ruil of vir ander mense gee nie. Dit is die beste grond in die land en dit is gewy aan die Here.
15 “Die stuk grond wat oorbly, is 5 000 el breed en 25 000 el lank. Dit is vir die gewone mense van die stad, hulle moet daar woon en hulle diere moet daar wei. Die stad moet in die middel van hierdie grond wees.
16 Die stad moet vierkantig wees, dit moet 4 500 el lank en 4 500 el breed wees.
17 Daar moet ’n oop stuk grond rondom die stad wees, dit moet 250 el breed wees.
18 Oos en wes van die stad is daar dan twee stukke grond wat oorbly langs die grond wat julle vir die Here moet gee. Elke stuk grond is 10 000 el lank. Die mense moet daar plant en saai sodat die mense wat in die stad werk, kos kan hê.
19 Enige iemand wat in die stad werk, mag op hierdie grond plant en saai, dit maak nie saak van watter stam hy kom nie.
20 Die hele stuk grond wat julle vir die Here moet gee, is vierkantig, dit moet 25 000 el lank en 25 000 el breed wees. Julle moet dit vir die Here gee en aan Hom wy. Die grond vir die stad is ook by daardie grond.
21 “Die regeerder moet twee stukke grond kry, dit is die grond wat oorbly by die oostekant en die westekant van die gewyde grond en die stadsgrond. Sy grond moet langs die stamme se grond wees. Die gewyde grond is die plek waar die gewyde plek vir die tempel sal wees.
22 Die Leviete se grond en die stadsgrond moet tussen die twee stukke grond van die regeerder wees. Sy grond moet tussen die stuk grond van Juda en die stuk grond van Benjamin wees.
23-27 “Die grond wat die stamme van Benjamin, Simeon, Issaskar, Sebulon en Gad kry, is suid van die gewyde grond en die regeerder se grond. Die grond is van die oostekant tot by die westekant.
28 By die suidekant van die grond van die stam Gad moet die grens wees van die stad Tamar, verby die fonteine van die stad Meriba-Kades, en dan langs die rivier tot by die Middellandse See.
29 Dit is die land wat julle moet verdeel en vir die stamme moet gee, en dit is wat elke stam moet kry.”Dit het die Here gesê, Hy wat Here is.
30 “Daar moet plekke wees waar mense uit die stad kan gaan. Die noordekant van die stad moet 4 500 el lank wees,
31 en daar moet drie poorte wees, die poorte van Ruben, Juda en Levi. Die poorte van die stad moet die name hê van die stamme van Israel.
32 Die oostekant moet 4 500 el lank wees, en daar moet drie poorte wees, die poorte van Josef, Benjamin en Dan.
33 Die suidekant moet 4 500 el lank wees, en daar moet drie poorte wees, die poorte van Simeon, Issaskar en Sebulon.
34 Die westekant moet 4 500 el lank wees, en daar moet drie poorte wees, die poorte van Gad, Aser en Naftali.”
35 “Dit moet 18 000 el wees rondom die stad, en van nou af moet die stad se naam wees ‘Die Here is daar.’ ”