1 Si Josias nagpanuigon ug walo sa dihang nagsugod siya paghari ug naghari siya sa Jerusalem sulod sa 31 ka tuig.
2 Gibuhat niya ang matarong atubangan sa Ginoo ug gisunod niya ang matang sa pagkinabuhi sa iyang kagikan nga si Hari David ug wala gayod siya mobiya niini.
3 Sa ikawalo nga tuig sa paghari ni Josias, samtang bata pa siya, gialagaran na niya ang Dios sa iyang kagikan nga si Hari David. Sa ika-12 nga tuig sa iyang paghari, gisugdan niya pagpanguha gikan sa Juda ug sa Jerusalem ang mga halaran sa mga diosdios ug ang mga simbolo sa diosa nga si Asera ug ang mga kinulit ug hinulma nga mga larawan.
4 Ilalom sa iyang pagmando gigun-ob nila ang mga halaran sa mga Baal ug gilumpag ang mga halaran sa insenso nga diha sa ibabaw nila. Gitumba niya ang mga simbolo ni Asera ug gipulpog niya ang mga larawan nga tinunaw ug kinulit ug ang mga pinulpog niini ilang gisabwag ibabaw sa mga lubnganan niadtong naghalad ngadto kanila.
5 Gisunog usab niya ang mga bukog sa mga pari ibabaw sa ilang mga halaran ug gihinloan niya ang Juda ug ang Jerusalem.
6 Gihimo usab kini niya didto sa mga siyudad sa Manases, sa Efraim ug sa Simeon hangtod sa Neftali.
7 Gigun-ob niya ang mga halaran ug gitumba niya ang mga simbolo ni Asera ug gidugmok niya ang mga larawan. Gilumpag usab niya ang tanang halaran sa insenso sa tibuok Israel. Unya mipauli siya sa Jerusalem.
8 Sa ika-18 nga tuig sa paghari ni Josias, sa dihang nahinloan na niya ang nasod ug ang Templo, gipadala niya si Safan nga anak ni Asalias, si Maasias nga gobernador sa siyudad ug si Joha, anak ni Joacas nga sinaligan sa hari, aron pag-ayo sa Templo sa Ginoo nga iyang Dios.
9 Miadto sila kang Hilkias, ang Pangulong Pari, aron paghatag sa kuwarta nga gidala ngadto sa balay sa Dios. Kini mao ang natigom sa mga Levita nga maoy nagbantay sa pultahan sa Templo gikan sa Manases ug sa Efraim ug sa tanang nahibilin nga katawhan sa Israel ug sa tibuok Juda ug Benjamin ug sa mga nagpuyo sa Jerusalem.
10 Unya gihatag usab nila kini ngadto sa mga trabahador nga nagdumala sa Templo sa Ginoo ug ang mga trabahador nga nagtrabaho diha sa Templo mihatag niini alang sa pag-ayo ug pagpahiuli sa Templo.
11 Gihatag nila kini ngadto sa mga panday ug sa mga magtutukod aron ipalit ug sinapsapan nga bato ug kahoy alang sa mga igsusumpay ug sa mga sagbayan alang sa pag-ayo sa Templo nga gipasagdan sa mga hari sa Juda nga nahiuna kaniya nga maguba.
12 Ang mga tawo nagtinarong sa ilang pagtrabaho. Ang nagdumala kanila mao kining mosunod nga mga Levita: si Jahat ug si Obadias nga mga kaliwat ni Merari ug si Zacarias ug Mesullam nga mga kaliwat ni Kohat. (Ang tanang Levita hanas motugtog sa mga instrumento sa musika.)
13 Ang ubang mga Levita maoy nagdumala sa mga tighakot sa mga butang nga bug-at ug sa tanang mga trabahante samtang ang uban maoy mga opisyal, mga tigtipig sa mga kasulatan ug mga magbalantay sa ganghaan.
14 Samtang nagkuha sila sa kuwarta nga didto sa tipiganan sa Templo, nakaplagan ni Hilkias nga pari ang basahon sa Balaod sa Ginoo nga gihatag pinaagi kang Moises.
15 Unya si Hilkias miingon sa sekretaryo nga si Safan, “Nakit-an ko ang basahon sa Balaod sulod sa Templo sa Ginoo.” Unya gihatag ni Hilkias ang basahon ngadto kang Safan.
16 Gidala ni Safan ang basahon ngadto sa hari ug mitaho nga nag-ingon, “Gibuhat namo ang tanan nga imong gisugo.
17 Gikuha namo ang kuwarta nga gitipigan diha sa Templo ug gihatag kini ngadto sa tigdumala sa trabaho ug sa mga trabahador.”
18 Unya si Safan, ang sekretaryo, misugilon sa hari, “Gihatag kanako ni Hilkias nga pari ang usa ka basahon.” Ug gibasa kini ni Safan atubangan sa hari.
19 Sa dihang nabati sa hari ang mga pulong sa Balaod, gigisi niya ang iyang bisti.
20 Ug gisugo sa hari si Hilkias, si Ahikam nga anak ni Safan, si Abdon nga anak ni Mica, si Safan nga sekretaryo ug si Asaias nga sulugoon sa hari ug giingnan niya sila,
21 “Lakaw ug pakisayod sa Ginoo alang kanako ug alang niadtong nahibilin sa Israel ug sa Juda bahin sa mga pulong nga ania sa basahon nga hikaplagan. Dako kaayo ang kaligutgot sa Ginoo nga gipahamtang niya kanato kay wala man tumana sa atong katigulangan ang pulong sa Ginoo nga nahisulat niining maong basahon.”
22 Busa si Hilkias ug mga kauban nangadto kang Hulda nga usa ka babayeng propeta aron pagpakisayod. Si Hulda nagpuyo sa bag-ong bahin sa Jerusalem. Ang iyang bana mao si Shallum nga anak ni Tikva ug apo ni Harhas nga maoy tinugyanan sa mga bisti sa templo. Gisuginlan nila siya sa nahitabo.
23 Si Hulda miingon kanila, “Nag-ingon ang Ginoo, ang Dios sa Israel: ‘Sultihi ang tawo nga nagpaanhi kaninyo
24 nga silotan ko ang Jerusalem sa tanang tunglo nga nahisulat sa basahon nga gibasa atubangan sa hari sa Juda.
25 Tungod kay gisalikway man nila ako ug nagsunog silag insenso alang sa mga diosdios aron paghagit sa akong kasuko pinaagi sa ilang binuhatan, ipahamtang ko ang akong kasuko niining dapita ug dili kini mapuypoy.’
26 Apan ngadto sa hari sa Juda nga nagpadala kaninyo aron pagpakisayod sa Ginoo, ingna siya, ang Ginoo, ang Dios sa Israel, nag-ingon: ‘Namati ka sa mga pulong nga imong nabasa
27 ug naghinulsol ka ug nagpaubos sa akong atubangan sa dihang nabati mo ang akong mga pulong batok niining dapita ug sa mga nagpuyo niini ug gigisi mo ang imong bisti ug naghilak ka sa akong atubangan. Nabati ko usab ikaw.
28 Kuhaon ko ikaw ug mamatay ka nga malinawon ug motipon sa imong katigulangan. Dili ka pakit-on sa tanang kadaot nga ipahamtang ko niining dapita ug sa mga nagpuyo niini.’” Ug gisugilon nila ang mensahe ngadto sa hari.
29 Unya gipatawag ni Hari Josias ang tanang kadagkoan sa Juda ug sa Jerusalem.
30 Mitungas sila ug ang hari ngadto sa Templo sa Ginoo uban sa tanang katawhan sa Juda ug sa Jerusalem, mga pari, mga Levita ug tanang tawo, inila man o timawa. Unya gibasa niya sa ilang atubangan ang tanang pulong nga diha sa basahon sa kasabotan nga nakit-an didto sa Templo sa Ginoo.
31 Mitindog ang hari sa dapit alang kaniya ug nanaad atubangan sa Ginoo sa pagsunod kaniya ug pagtuman sa tanan niyang mga sugo sa bug-os niyang kasingkasing ug kalag ug sa pagtuman sa mga pulong sa kasabotan nga nahisulat sa basahon sa Balaod.
32 Unya gipasaad usab niya ang tanan nga mitambong diha sa Jerusalem ug sa Benjamin sa pagsunod sa maong kasabotan. Ug gituman sa mga nagpuyo sa Jerusalem ang tanan nga nasulat sa kasabotan sa Dios, ang Dios sa ilang katigulangan.
33 Ug gipangguba ni Hari Josias ang tanang mga diosdios sa tanang kayutaan nga sakop sa Israel ug gipaalagad niya sa Ginoo nga Dios sa ilang katigulangan ang tanan nga diha sa Israel. Samtang buhi pa siya, ang katawhan wala mobiya pagsunod sa Ginoo, ang Dios sa ilang katigulangan.