1 Mao kini ang mensahe ni Propeta Habakuk nga gipadayag sa Ginoo kaniya.
2 Miingon si Habakuk, “O Ginoo, hangtod kanus-a ba ako mangayo ug tabang kanimo? Kanus-a mo pa ako patalinghogan? Kanus-a mo pa ba kami luwason gikan sa mga tawo nga nagadaog-daog kanamo?
3 Nganong gipasinati mo pa man kanako ang kadaotan ug kasamok? Bisan asa makita ko ang pagpinatyanay, pagpangdagmal, panag-away, ug panaglalisay.
4 Busa nawad-ag pulos ang balaod. Ug wala nay hustisya tungod kay ang mga tawong sad-an maoy nagadaog sa korte ug dili ang mga tawong walay sala. Busa natuis ang hustisya.”
5 Mitubag ang Ginoo, “Tan-awa ninyo pag-ayo ang nagakahitabo sa mga nasod ug matingala gayod kamo sa inyong makita. Kay may himuon ako sa inyong panahon nga dili gayod ninyo katuohan bisag may mosugilon pa niini kaninyo.
6 Kay himuon kong gamhanan ang Babilonia, nga ang mga katawhan labihan kahangol ug kabangis. Sulongon nila ang mga nasod sa tibuok kalibotan aron panag-iyahan ang mga dapit nga dili ila.
7 Kahadlokan ug kalisangan sila sa mga tawo. Himuon nila ang ilang gustong himuon ug walay makapugong kanila.
8 Ang ilang mga kabayo mas tulin pa managan kaysa mga leopardo ug labaw pa kabangis kaysa bangis nga mga iro panahon sa kagabhion. Magdagan sila gikan sa halayong mga dapit nga daw nagalupad nga agila nga mosakdap sa iyang biktima.
9 Modasdas ang ilang mga sundalo aron sa pagpanghasi. Daw sama sila sa makusog nga hangin nga gikan sa sidlakan. Ang ilang mga bihag sama kadaghan sa balas.
10 Bugalbugalan lang nila ang mga hari ug mga pangulo. Kataw-an lang nila ang tanang pinarilan nga lungsod, kay malayat ra nila kini pinaagi sa pagtapok ug yuta sa kilid sa paril, ug ila kining mailog.
11 Pagkahuman mobiya lang sila nga daw sa hangin nga milabay. Nakasala kini sila, kay gipakadios nila ang ilang kaugalingong katakos.”
12 Miingon si Habakuk, “O Ginoo, Dios ikaw sukad pa kaniadto. Ikaw ang akong balaang Dios ug wala kay kamatayon. O Ginoo nga akong salipdanan nga bato, gipili mo nga gamiton ang mga taga-Babilonia sa pagsilot kanamo.
13 Tungod kay matarong ka, dili ka makaantos nga magtan-aw sa kadaotan ug kasamok. Apan nganong gipasagdan mo man lang ang mga maluibon nga taga-Babilonia? Nganong gitugotan mo nga laglagon nila ang mga tawo nga dili kaayo daotan kon ikomparar kanila?
14 Gihimo mo ang mga tawo nga morag mga isda o mananap nga walay pangulo.
15 Nagakalipay ug nagamaya ang mga taga-Babilonia sa ilang pagbihag sa ilang mga kaaway nga daw sama lang sa mga isda nga nadakpan pinaagi sa bingwit o pukot.
16 Ug tungod kay daghan ang ilang nabihag, ginadayeg nila ang ilang kaugalingong abilidad sama sa mangingisda nga mopahinungod sa iyang bingwit o pukot pinaagi sa pagsunog ug insenso ingon nga halad para niini. Kay pinaagi niini nga pukot nadato siya.
17 Busa, Ginoo, magpadayon na lang ba sila sa ilang walay kalooy nga pagpangbihag ug pagpanglaglag sa mga nasod?”