1 Uperire osê ojo Pablo pe Atenas gui, ja ou Corintope.
2 Ja upepe oyuju peteî Judiope jérava Aquila Pontoygua ja jembireco Priscilla, ôguajê ramôva Italia gui, pe mburuvicha guasu Claudio omosêmba jaguéreje umi Judio cuerape Roma gui. Ja Pablo oñandu ichupecuera.
3 Ja peteînte tembiapopegua járeje jae opyta jendivecuera ja ombaapo: iyejecájá voi oga aoguigua apojaré ramo.
4 Ja opa sabado árape jae oñemongueta pe tûpâope ja ogueroviáucá umi Judio ja umi Griego cuerape.
5 Ja ôguajê rire Silas ja Timoteo Macedonia gui uperamo Pablo oyeyocuáiucá pe Ñemoñeê añóntepe, oicuaáucávo umi Judiope Jesus Cristojá.
6 Upei catu oñemoî ramo umiva jese ja oyao ramo ichupe, jae oitybyro iyao ja jei ichupecuera: Penderuguŷ topytá pene âcâ reje. Che che po pôtí coanga guive.
7 Ajasata umi pytagua rendape. Ja ojovo upegui oiké peteî carai jérava Titio Justo rogape, carai ombueteva Tûpâ Ñandeyárape, joga tûpâo ypype.
8 Ja Crispo pe tûpâó ruvicha oyerovia Ñandeyára reje opava umi jogapegua rejeve, ja jeta umi Corintoygua ojendu ja oguerovia ja oñemongaraíucá.
9 Ja peteî pyjare Ñandeyára oñeê iképe Pablope jeivo: Ani rekyjŷyé! Eñemoñeê mante, ja ani rekîrîrî.
10 Che voi aime nendive. Ja ndipori avave oñemoî vaí vaerâ ndereje oyapo vaí jaguâ ndereje. Jeta voi oime ybypóra Cherejeguarâ co tetâme voi.
11 Ja upeicha opyta upepe peteî año ja seis yasy peve oporomboévo iyapytepe cuera Ñandeyára Ñeêreje.
12 Ja pe Galion oi ramo jiconi mburuvicha ramo Acayape, umi Judio opuâmba oñondive Pablo reje ja ogueraja ichupe mburuvicha rogape,
13 jeivo: Cova ogueroviáucá umi carai cuerape ombuete jaguâ Tûpâ Ñandeyárape jecoŷme.
14 Ja oipea ramo Pablo iyuru oñeê jaguâ, pe Galion jei raê umi Judio cuerape: Peê Judio cuera, jembiapo vaí tuvicha rire terâ iñaña itieŷvaicha rire co carai, mo che pojendu rae peême jecópe.
15 Anga peñejaâ járeje oñondive ñeêngue rejente ja téra reje ja pene retâ reco reje, peê vointe pejecha vaerâ umimbae reje. Che nico ndaicosei mburuvicha ramo umichagua mbaepe.
16 Ja upeicha omosê ichupecuera pe mburuvicha coty gui.
17 Upemaramo oyapi Sostenespe pe tûpâo ruvichape ja oinûpâ ichupe pe mburuvicha roga renondepe. Ja Galion voí na iñanguecoíri mbaeve umimbae reje.
18 Ja uperire Pablo opyta jeta ára gueteri upepe ja uperire oyepea umi jeŷícuera gui ja ojo ŷguasu rupi Siriape ja oime jendive Priscilla ja Aquila. Jae voi oñeñapîucá rae jiáva Cencreape oicuameê jagueicha upearâ.
19 Ja ôguajê Efesope ja upepe ojeya umi ambuecuepe, ja jae oiké pe tûpâope ja oñemonguetá umi Judio cuera ndive.
20 Ja oyerure ramo yepe jaecuera opyta are mive jaguâ, jae ndopytasei.
21 Jeinte ichupecuera oyeivo: Ayu yebyne pene rendape Tûpâ Ñandeyára oipota ramo. Ja upegui osê Efeso gui,
22 ja ôguajê rire Cesareape ou Jerusalempe. Ja oñandu rire pe Iglesia Cristo rejeguávape ojo Antioquiape.
23 Ja jiaremi rire upepe oyei upegui ja oñandu oicovo opavave pe Galicia retâ rupi ja Phrygia rupiguape ombo pyaguasúvo opa umi Cristo remimboecuerape.
24 Upeyave ôguajê rae Efesope peteî Judio, jérava Apolos, Alejandriaŷgua, carai oñemoñeêcuaáva ja oiporúcuaá pôrâva pe Santa Escritura,
25 ja oicuaa pôrâva Ñandeyára Rapé ja oñemoñeê ikyreŷetéva ja oñemoñeê ja oporomboéva jecópe umi mbae Jesú rejegua oicuaa ramo yepe pe Juan omongarai jague mante.
26 Upéva oñypyrú oñeê okyjŷyé ŷ reje tûpâope ja Priscilla ja Aquila ojendu ramo ichupe omojaeño ichupe ja omboe pôrâve jecópe ichupe Ñandeyára rapé.
27 Ja ojasase ramo Acayape, umi jeŷícuera oipytyvô ichupe ja oguerajáucá cuatia ñeê iporupi umi Cristo remimboecuerape oguerojory jaguâ ichupe. Ja ôguajê ramo jeta oipytyvô jae umi ogueroviá vaecuepe Ñandeyára pyapôrâ rupi.
28 Ja jae oñejaâ tuvicha umi Judio ndive ja oñapytî ichupecuera iñeême opava resape ojechacuaaucá pype Santa Escritura rupi Cristojá pe Jesús.