1 Upeyaveve pe Saulo ipytujê jápe omomboí oicovo oporoyuca jaguâicha umi Ñandeyára remimboecuerape. Ja upearâ voí ou pe pai guasu rendape,
2 ja oyerure ichupe cuatia ñeê reje ogueraja vaerâ Damascope umi tûpâopegua peguarâ oyuju ramo guârâ upepe cuimbae terâ cuña cuera co Tape rejeguavape ogueru jaguâ ichupecuera iñapytîjápe Jerusalempe.
3 Ja upeicha ojovo tapereje oyeju ôguajêta yave pe Damasco ypype, sapyaite ojesapé verá iyerecuevo peteî jendy guasu yvagui.
4 Ja jae joa ybype ja ojendú peteî osapucaiva jeiva ichupe: Nde Saulo, Saulo, ¿mbaerejépa Che moña reicovo?
5 Ja jei jae: ¿Avápa Nde, carai? Ja jei Jae: Che jae pe Jesús remoñavape reicovo nde. Mbae ipojyi ndeve repŷvoi pe nde yopijá reje.
6 Ja jae oryryipa ja okyjŷye jei: ¿Che Yára, mbaépa reipota ayapo? Ja jei Ñandeyára: Epuânte ja eike co tetâ ryepype ja upepe oyeéne ndeve pe ipôrâ vaerâ reyapo.
7 Ja umi cuimbae ojo vaecue jendive opytá oñemondyi, ojendu voi añete pe osapucai vaecuepe, ja ndojechai avavepe.
8 Upei catu opuâ Saulo yby gui, ja oipeavo jesa ndojechai avavépe. Upeareje oisambyjy ichupe ipógui ja oguerajá Damascope.
9 Ja oi upepe mbojapy ára ojecha ŷ reje ja ndocarui ja ndoŷúi yepe.
10 Upepe oico uperamo peteî Ñandeyára remimboe Damascopegua, jérava Ananias, ja upévape jei Ñandeyára iképe: Nde Ananias! Ja jae jei: Ape aime, Che Yára.
11 Ja jei ichupe Ñandeyára: Epuânte, terejó pe tapé jérava Icarêŷvape ja eporandu Judas rogape peteî carai, Tarsoŷgua, jérava Sauloreje. Upepe oime oñemboe jina.
12 Oime ojecha iképe peteî cuimbae jérava Ananias, oike ramo ja omoî ipo jese jesapysó yeby jaguâ.
13 Upemaramo jei Ananias: Nde, Che Yara, jêrâcuâ vaí jetágui ajendu vaecue upe cuimbae jetambae vaí oyapo jague Nde rejegua cuera reje umi Jerusalempe oiva.
14 Ja coápe yepeve omoî ipope ichupe umi paiguasu oñapytî jaguâ opa umi ojenoîvape Nde réra.
15 Ja jei Ñandeyára: Terejónte! Cova voí peteî ayocuai vaerâ aiporavó vaecue voí ogueraja jaguâ Che Rera umi pytagua renondepe ja umi mburuvicha guasu renondepe ja umi Israel cuérava renondepe.
16 Che nico ajechaucáne ichupe opa oicôtevê vaerâ ojasa asy jagûa Che Réra rejejápe.
17 Upemaramo ojo Ananias ja oiké pe ogape ja omoî ipo jese ja jei ichupe: Nde, Saulo, che ryby, Ñandeyára Jesús, pe oyejechauca vaecue ndeve pe tapepe reyu jague rupi, che mbou nerendape nde resapysó yeby jaguâ ja ne renyjê jaguâ Espiritu Santo gui.
18 Ja upevove joa jeságui ipirecueicha ja upevove jesapysó yeby ja opuâ ja oñemongarai,
19 ja ocaru ja upeicha oñemombaraete yeby.Ja upepe oico Saulo mboby ára umi ogueroviava Cristo rejeguava Damascope jicuai vaecue ndive.
20 Ja upepe jae oñemoñeê tûpâope cuera Cristo gui jeivo Cova Ñandeyára Raŷjá.
21 Ja opa umi ojenduva ojecharâmô ja jei: ¿Ndajaeipa coa upe Jerusalempe ombuai vaecue umi Upéva Réra ojenoîvape, ja upeicharâ ou coápe avei oguerajá jaguâ iñapytîjápe ichupecuera umi paíruvicha renondepe?
22 Ja Saulo oñembo puacave ojovo ja oñapytî umi Judio jicuai vaecuepe Damascope iñeême, omoañetévo cova pe Cristojá.
23 Ja are rire umi Judio oñomongueta ñemi oñondive oyuca jaguâ ichupe:
24 oyecuaaucánte Saulope ipichŷguŷ: jaecuera omaña jicuai okê reje ára ja pyjarepe oyuca jaguâ ichupe.
25 Upévareje umi jemimboecuera oipyjy ichupe pyjare ja ogueroyŷ ocape pe coty yvate gui ayacá tuvichape.
26 Ja upeicha ou Jerusalempe ja oñejaâ ramo oyejea umi Cristo remimboecuera reje, umiva opavave okyjŷye ichugui, ndo gueroviai gui jae Cristo remimboecuera rejeguaitéjá.
27 Upemaramo upe Bernabe oipyjy ichupe ja ogueru ichupe umi Apostol rendape ja omombeúpá ichupecuera ojecha jague jae Ñandeyárape pe tapepe ja Jae omongueta jague ichupe, ja pe Damascope oñeê jague jae Jesús rerape okyjŷye ŷ reje.
28 Ja upeguirire jae oiké ja osê oicovo jendive cuera Jerusalempe,
29 ja oñeê jae okyjŷyé ŷ reje pe Ñandeyára rerape ja oñemonguetá ja oñejaâ yepi umi Griego ndive; umiva voi oñejaâ oyuca jaguâ ichupe.
30 Upegui ojechacuaama ramo upea, umi jeŷícuera omoîrû ichupe Cesarea peve ja upegui omondo Tarsope.
31 Upeicha oico pôrâ kîrîrîjápe, ja oñemoingo jâtâ pôrâ pe Iglesia Cristo rejeguava oparupi Judeape ja Galileape ja Samariape jicuaiva, ja oico pôrâ oyerovia jâtâ járeje Ñandeyára reje ja oipytyvô járeje ichupecuera Espiritu Santo. Ja upeicha oñembojetá jetavé meme ojovo.
32 Uperamo Pedro ojasa oicovo oparupi ja sapya ôguajê umi iñemboecatuvape oico vaecue Liddape.
33 Ja upepe oyuju peteî cuimbae jérava Aeneas oyapoma ocho años oi jague jupápe iyapáva voi.
34 Ja Pedro jei ichupe: Nde Aeneas, Jesu Cristo nemojesâi. Epuâ ja emyatyrô nde rupá. Ja upevove opuâ jae,
35 ja ojecha ramo ichupe opa umi jicuaiva Liddape ja Saronape oñemboyápá jaecuera Ñandeyara rejeguarâ.
36 Uperamo oico vaecue Joppepe peteî cuña carai Cristo remimboecuera rejeguava jérava Tabita, (Dorcas yaemo ñane ñeême). Upeva imbaepôrâiteva ja jeta tûpâmbae omeêva meme.
37 Ja sapya umi jaárape jasy jae ja omano. Ja oyojeima rae jetecue ja omoî peteî coty yvatépe.
38 Ja pe Lidda jiâgui Joppe gui, ja umi Cristo remimboe cuera rejeguava, ojendu ramo Pedro oijá upepe, omondo mocoî cuimbaepe oyerure vaerâ ichupe ani opytá pytá oguajê jaguâ Jendápe cuera.
39 Upevove Pedro opuâ ja ojo jendive cuera ja oguajê vove, ogueraja ichupe pe coty yvatévape ja oñembyaty oyerecuevo umi imena omano vaecue oyajeóvo ja ojechaucavo ichupe umi iyao cuera ja iyajóyá oyapo vaecue pe Dorcas jae oicove aya jendive cuera.
40 Upei catu Pedro omosêmba ocape ichupecuera, ja oñesû ja oñemboe ja oyere pe jetecue cotŷvo ja jei: Tabita, epuânte! Ja jae oipea jesa ja ojecha vove Pedrope oguapŷ.
41 Ja jae ombojasa ichupe ipo ja omopuâ ichupe. Upei catu ojenoî umi iñemboecatúvape ja umi imena omano vaecuepe ja ojechauca ichupe oicové.
42 Ja jêrâcuâmba oparupi upe Joppepe ja jeta oyerovia Ñandeyára reje.
43 Ja uperire jae opyta mboby ára Joppepe peteî carai Simon rogape, mbaepi myatyrôjá jae.