1 ពួកមេដឹកនាំកូនចៅលោកយ៉ាកុបនិងពួកអ្នកគ្រប់គ្រងលើពូជពង្សអ៊ីស្រាអែលអើយ សូមស្ដាប់ពាក្យខ្ញុំ!អ្នករាល់គ្នាត្រូវតែស្គាល់ច្បាប់។
2 ប៉ុន្តែ អ្នករាល់គ្នាបែរជាស្អប់អំពើល្អហើយចូលចិត្តអំពើអាក្រក់ទៅវិញ។អ្នករាល់គ្នាកេងប្រវ័ញ្ចប្រជាជនរហូតដល់បកស្បែកគេហើយពន្លះសាច់គេរហូតដល់ឆ្អឹង។
3 អ្នករាល់គ្នាស៊ីសាច់ប្រជាជនរបស់ខ្ញុំអ្នករាល់គ្នាបកស្បែកគេ បំបាក់ឆ្អឹងគេហើយកាប់គេជាដុំៗ ដូចសាច់នៅក្នុងថ្លាង។
4 អ្នករាល់គ្នាស្រែកអង្វរព្រះអម្ចាស់តែព្រះអង្គមិនឆ្លើយតបមកវិញឡើយពេលនោះ ព្រះអង្គគេចព្រះភ័ក្ត្រពីអ្នករាល់គ្នាដ្បិតអ្នករាល់គ្នាបានប្រព្រឹត្តអំពើអាក្រក់។
5 ព្រះអម្ចាស់មានព្រះបន្ទូលស្ដីអំពីពួកព្យាការីដែលនាំប្រជាជនរបស់ខ្ញុំឲ្យវង្វេង។បើប្រជាជនឲ្យពួកគេបរិភោគឆ្អែតពួកគេទាយថា មានសេចក្ដីសុខសាន្តតែបើប្រជាជនមិនឲ្យអ្វីបរិភោគទេពួកគេទាយថា មានកើតសង្គ្រាម។