1 Auā o ‘outou lava, le ‘au uso e, ‘ua ‘outou iloa o lo matou o‘o atu ‘iā te ‘outou, e le‘i fa‘alēaogāina lea.
2 ‘Ae ui lava na muamua ‘ona tigāina o i matou, ma fa‘aleagaina i Filipi, pei ‘ona ‘outou iloa ‘ua matou loto tele ‘ona o lo tatou Atua e tautala atu ‘iā te ‘outou i le tala lelei a le Atua ma le finafinau tele lava.
3 Auā o lo matou apoapoa‘i atu ‘iā te ‘outou e le‘i faia lea ma le sesē, po o le amio leaga, po o le fa‘a‘ole‘ole.
4 ‘Ae peita‘i, fa‘apei ‘ona tatau i le finagalo o le Atua na te tu‘uina mai ‘iā te i matou le tala lelei, e fa‘apea fo‘i ‘ona matou tautala atu ai; e lē ‘ina ‘ia fiafia mai tagata, a o le Atua, o lē tofotofo mai i o matou loto.
5 Auā matou te le‘i fai lava se ‘upu o fa‘avi‘ivi‘i atu ai, fa‘apei ‘ona ‘outou iloa, pe faia se ufiufi o le manumanu; ‘ua silafia e le Atua.
6 E ui lava ‘ina mafai ‘iā te i matou ‘ona ia mafatia ai ‘outou, auā o ‘aposetolo i matou a Keriso, ‘ae matou te lē sā‘ili le vi‘iga mai tagata, po o ‘outou po o isi tagata.
7 A ‘ua matou agamalū ‘ina ‘ua matou i ai ‘iā te ‘outou na, fa‘apei o se failele na te tausi lelei i ana lava tama.
8 Sa fa‘apea lava lo matou mā‘elegā i le alofa ‘iā te ‘outou, na matou mana‘o i le fia avatu ‘iā te ‘outou e lē na o le tala lelei i le Atua, a o matou lava ola fo‘i, auā na alofaina ‘outou e i matou.
9 Auā le ‘au uso e, ‘ua ‘outou manatua la matou galuega mamafa ma le tigā; auā sa matou galulue ai i le po ‘atoa ma le ao, ‘ina ne‘i mafatia so ‘outou, a o matou tala‘i atu ai ‘iā te ‘outou le tala lelei a le Atua.
10 ‘Ua iloa e ‘outou ‘atoa ma le Atua, sa matou amio Atua, ma amiotonu, ma le lē mata‘uleagaina, ‘ina o matou i ai ‘iā te ‘outou o ē fa‘atuatua.
11 Pei ‘ona ‘outou iloa, sa matou i ai ‘iā te ‘outou ta‘itasi, pei o le tamā i lana lava fānau, na matou apoapoa‘i atu ‘iā te ‘outou, o fa‘amafanafana atu fo‘i, ma ta‘utino atu,
12 ‘ina ‘ia ‘outou sāvavali ‘ia tatau i le Atua, o lē na vala‘auina ‘outou i lona mālō ma lona mamalu.
13 O le mea lea matou te fa‘afetai ai i le Atua, o i matou lava e lē aunoa, auā na talia e ‘outou le afioga a le Atua na ‘outou fa‘alogo mai ai ‘iā i matou, ‘ua lē talia e ‘outou le ‘upu a tagata, ‘ae peita‘i o le ‘upu a le Atua, (e moni lava lea.) ‘ua matuā galue fo‘i lea i totonu ‘iā te ‘outou o ē fa‘atuatua.
14 Auā le ‘au uso e, na ‘outou fa‘aa‘oa‘o i ekalesia a le Atua o i Iutaia, o lo‘o ‘iā Keriso Iesu auā o ‘outou fo‘i na tigāina ‘outou i ia lava mea i tagata o lo ‘outou lava nu‘u, fa‘apei ‘ona tigāina o i latou fo‘i ‘iā Iutaia;
15 o ē na fasioti le Ali‘i, o Iesu lava, ‘atoa ma perofeta, na fa‘asauā mai fo‘i i latou ‘iā i matou; e lē fiafia i ai le Atua, ‘ua fai fo‘i tagata uma lava mo latou fili.
16 ‘Ua vavao mai ‘iā i matou, ‘aua matou te tautala atu i nu‘u ‘ese, ‘ina ‘ia fa‘aolaina ai i latou; ‘ua fa‘a‘atoa ai e i latou e lē aunoa a latou agasala; a ‘ua o‘o ‘iā te i latou le to‘asā e fa‘aumatia ai.
17 O i matou fo‘i, le ‘au uso e, o lo‘o tēte‘a‘eseina ma ‘outou i ni nai aso itiiti, i le tino ‘ae lē o le loto, ‘ua atili ai ‘ona matou taumafaia ma le naunau tele ‘ona ‘ia tatou feiloa‘i ma ‘outou.
18 O lea na matou fia ō atu ai ‘iā te ‘outou, o a‘u lava o Paulo, ‘ua atu tasi ma atu lua, a ‘ua fa‘alavelave mai Satani ‘iā te i matou.
19 Auā se a ‘ea so matou fa‘amoemoe ma se fiafia ma se pale e mitamita ai i luma o lo tatou Ali‘i o Iesu Keriso i lona afio mai? E lē o ‘outou ‘ea?
20 Auā o ‘outou lava o lo matou vi‘iga ma lo matou ‘oli‘oli.