1 O lenei, le ‘au uso e, o le toe ‘upu lenei, matou te ‘ai‘oi atu ma apoapoa‘i atu ‘iā te ‘outou ‘ona o le Ali‘i o Iesu, fa‘apei ‘ona talia e ‘outou mai ‘iā te i matou le uiga o le ala e tatau ‘ona ‘outou sāvavali ai, ‘ia fiafia mai ai le Atua ‘iā te ‘outou, ‘ia fa‘asilisili pea i ai ‘outou.
2 Auā ‘ua ‘outou iloa ‘ia poloa‘iga na matou tu‘uina atu ai ‘iā te ‘outou mai le Ali‘i o Iesu.
3 O le finagalo fo‘i lenei o le Atua, ‘ia fa‘apa‘iaina ‘outou, ‘ina ‘ia fa‘amamao ‘outou ma le faita‘aga.
4 ‘Ia ta‘itasi ‘outou ma iloa ‘ona fai o lona lava tino ma le fa‘apa‘iaina ma le ta‘uleleia,
5 ‘aua ma le tu‘inanau o le mana‘o, fa‘apei o nu‘u ‘ese ‘ua lē iloa le Atua.
6 ‘Aua ne‘i sopo tapula‘a se tasi, ma agaleaga i lona uso i lenei mea; auā o le Ali‘i na te taui atu ma sui i nei mea uma, fa‘apei ‘ona matou mua‘i fai atu ai, ma ta‘utino atu ‘iā te ‘outou.
7 Auā e le‘i vala‘auina i tatou e le Atua ‘ia amio leaga, a ‘ia fa‘apa‘iaina lava.
8 O lenei, o lē fa‘alēaogā mai, ‘ua ia lē fa‘alēaogā i tagata, a o le Atua lē ‘ua foa‘i mai lona Agaga Pa‘ia ‘iā te i matou.
9 ‘Ae lē aogā ‘ona ‘ou tusi atu ‘iā te ‘outou e uiga i le alofa i le ‘au uso; auā, ‘ua a‘oa‘oina ‘outou lava e le Atua ‘ia fealofani.
10 Auā fo‘i ‘ua fa‘apea lava ‘ona ‘outou faia i le ‘au uso uma lava o i Maketonia ‘atoa uma. ‘Ae matou te apoapoa‘i atu ‘iā te ‘outou le ‘au uso e, ‘ia fa‘asilisili pea i ai;
11 ma ‘ia ‘outou taumafai ‘ina ‘ia ‘outou nofo fīfīlemū ‘ia faia a ‘outou lava fe‘au, a ‘ia galulue i o ‘outou lava lima, pei ‘ona matou fai atu ai ‘iā te ‘outou.
12 ‘Ina ‘ia ‘outou sāvavali ma le matagofie i luma o ē o i tuā, ma ‘ia lē matitiva ‘outou i se mea e tasi.
13 Matou te loto ‘ina ‘ia ‘outou iloa, le ‘au uso e, e uiga i ē o momoe, ‘ina ne‘i ‘outou fa‘anoanoa, pei o isi e leai so latou fa‘amoemoe.
14 Auā ‘āfai tatou te talitonu, ‘ua maliu Iesu ma toetū mai, e fa‘apea fo‘i ‘ona ‘aumaia e le Atua fa‘atasi ma ia ē o momoe ‘ona o Iesu.
15 Matou te fai atu fo‘i lenei mea ‘iā te ‘outou i le afioga a le Ali‘i, o i tatou o ē ola ma totoe se‘i afio mai le Ali‘i, tatou te lē muamua i ē o momoe.
16 Auā e afio ifo mai le lagi le Ali‘i lava, ma le ‘alaga ma le leo o le agelu sili, ma le pū a le Atua. E muamua fo‘i ‘ona toe tutū mai o ē ‘ua oti o ‘iā Keriso.
17 ‘Ona fa‘afuase‘i lea ‘ona ‘aveina a‘e o i tatou o ē ola ma totoe, fa‘atasi ma i latou i ao, ‘ina ‘ia fetaia‘i ma le Ali‘i i le vā nimonimo; ‘ona tatou fa‘atasi pea lava lea ma le Ali‘i.
18 O lenei, ‘ia ‘outou fēfa‘amafanafanaa‘i i nei ‘upu.