1 Timoteo

O Faia‘oga Sesē

¹A o lo‘o ta‘utino mai e le Agaga, e ō ‘ese nisi i le fa‘atuatua i tausaga amulī, latou te fa‘alogo i agaga e fa‘asesē ma a‘oa‘oga a temoni. ²‘Ona o le pepelo o tagata tala pepelo o ē ‘ua fa‘ailogaina o latou lava loto fuatia ifo i le u‘amea ‘a‘asa; ³latou te vavao i le fa‘aipoipo ma fa‘asā isi mea e ‘ai, o mea lava ‘ua faia e le Atua ‘ia talia ma le fa‘afetai e i latou ‘ua fa‘atuatua, ma latou iloa le ‘upu moni. ⁴Auā o mea uma ‘ua faia e le Atua, e lelei lava ia, e lē lafoa‘iina fo‘i se tasi mea, pe ‘āfai ‘ua talia ma le fa‘afetai. ⁵Auā ‘ua fa‘apa‘iaina i le afioga a le Atua ma le tatalo.

O le ‘Au‘auna Lelei a Keriso Iesu

⁶‘Āfai ‘e te tu‘uina atu na mea i le ‘au uso, e fai ai oe ma ‘au‘auna lelei a Keriso Iesu, e tausia oe i ‘upu o le fa‘atuatua ma le matā‘upu lelei ‘ua e tāofi i ai. ⁷A o tala leaga o le vavau a fafine valevalematua, ‘ia e ‘alo ‘ese ai; a ‘ia e fa‘amasani i le amio Atua. ⁸Auā e aogā fo‘i le fa‘amasani i la le tino; a o le amio Atua e aogā lea i mea uma lava, o lo‘o i ai le mea ‘ua folafolaina mai i la le olaga nei ‘atoa ma lē atalī. ⁹E moni lava le ‘upu e tatau fo‘i ‘ona matuā talia. ¹⁰Auā o le mea lava lea tatou te galulue ma finafinau ai, auā tatou te fa‘amoemoe i le Atua soifua, o ia o le Fa‘aola o tagata uma, ‘ae sili lava o ē ‘ua fa‘atuatua. ¹¹‘Ia e matuā fai atu na mea, ma e a‘oa‘o atu ai. ¹²‘Aua ne‘i ‘ino‘ino se tasi i lou taule‘ale‘a, a ‘ia fai oe ma fa‘aa‘oa‘o i ē ‘ua fa‘atuatua, i le ‘upu, ma le amio, ma le alofa, ma le loto, ma le fa‘atuatua, ma le amio mamā. ¹³‘Ia e fa‘asaga i le faitau atu o tusi pa‘ia, ma le apoapoa‘i atu, ma le a‘oa‘o atu, se‘ia ‘ou alu atu. ¹⁴‘Aua ne‘i e fa‘atalalē i le mea alofa na tu‘uina atu ‘iā te oe i le valo‘aga ma le fa‘ae‘e atu o lima o toeaina. ¹⁵‘Ia e mafaufau i ia mea, ‘ia e fa‘amasani ai; ‘ina ‘ia iloa ai e tagata uma lou alualu i luma. ¹⁶‘Ia oe lava ‘iā te oe, ‘atoa ma lau e a‘oa‘o atu, ‘ia e tumau pea i ai; auā a ē fai lenā mea, e fa‘aolaina ai oe e oe ‘atoa ma ē ‘ua fa‘alogologo ‘iā te oe.#