1 ‘Aua ‘e te a‘oa‘i atu i se toeaina, a ‘ia apoapoa‘i atu i ai peiseaī se tamā; o taulele‘a fo‘i, peiseaī o uso;
2 o lo‘omatutua, peiseaī o tinā; o fafine muli fo‘i, peiseaī o tuafafine ia, ma le amio mamā lava.
3 ‘Ia āva i fafine ‘ua oti a latou tane, o ē ‘ua ausage lava.
4 ‘Āfai fo‘i o i ai i se fafine ‘ua oti lana tane ni ana tama po o fānau a ana tama, ‘ia a‘oa‘oina i latou ‘ia muamua ‘ona agalelei i lo latou lava ‘āiga, ma taui atu i o latou mātua; auā o le mea lelei lea ma le mālie i luma o le Atua.
5 A o lē ‘ua oti lana tane ‘ua ausage ma ‘ua tu‘ua to‘atasi, ‘ua fa‘amoemoe ia i le Atua, ma tumau pea i le fa‘atoga ma le tatalo i le po ‘atoa ma le ao.
6 A o le fiafia i la le tino, e ui lava ‘ina ola, ‘ua oti ia.
7 ‘Ia e matuā fai atu ia mea, ‘ina ‘ia lē mata‘uleagaina i latou.
8 ‘Ae ‘āfai e lē tausi e se tasi i lona ‘āiga, ‘āfai fo‘i e lē sili ‘ona tausi i ē mau ma ia, ‘ua fa‘afitia o ia le fa‘atuatua, e sili fo‘i lona leaga i lē ‘ua lē fa‘atuatua.
9 ‘Aua ne‘i faitauina se fafine ‘ua oti lana tane se‘ia o‘o i ona tausaga e onogafulu, sa to‘atasi fo‘i lana tane;
10 o lo‘o ta‘uleleia fo‘i ‘ona o ana galuega lelei, pe ‘āfai ‘ua tausia e ia ni fānau, pe ‘āfai ‘ua na alofa i tagata ‘ese, pe ‘āfai ‘ua na mulumulu i vae o tagata pa‘ia, pe ‘āfai ‘ua na agalelei atu i ē ‘ua puapuagātia, pe ‘āfai ‘ua na tausisi i galuega lelei uma lava.
11 A o fafine muli ‘ua oti a latou tane, ‘aua le talia i latou, auā pe a fia sa‘oloto i latou nai ‘iā Keriso, ‘ona fia nofotane ai lea o i latou;
12 o lo‘o i ai le fa‘asala, ‘ina ‘ua latou lafoa‘i i lo latou ulua‘i fa‘amaoni.
13 E lē na o lea, ‘ae masani fo‘i i latou ma le paiē, e feoa‘i i lea fale ma lea fale; e lē gata fo‘i ‘ina latou paiē, ‘ae so‘ona tautala, ma matamata fua i galuega a nisi, ma tautalatala i mea lē tatau.
14 O lenei, ‘ou te loto ‘ia nofotane o fafine muli, ‘ua oti a latou tane, ‘ia fānau ai tama ‘ia matai i latou i o latou ‘āiga, ‘ina ne‘i tu‘uina atu i lē tete‘e mai se mea e tasi e ta‘uleagaina ai i tatou.
15 Auā ‘ua uma le liliu‘eseina o isi ‘ua mulimuli ‘iā Satani.
16 ‘Ai se tane fa‘atuatua, po o se fafine fa‘atuatua o i ai ni fafine ‘ua oti a latou tane, ‘ia latou tausia i latou ‘aua ne‘i mafatia ai le ekalesia; ‘ina ‘ia latou tausia fafine ‘ua ausage lava.
17 O toeaina o ē pule lelei, ‘ia ta‘uaogāina i latou ‘ona fa‘aluaina atu i ai o le taui, ‘ae fa‘asili i ē galulue i le ‘upu ‘atoa ma le a‘oa‘o atu.
18 Auā o lo‘o fai mai le Tusi, “‘Aua ne‘i e fusi le gutu o le povi a o solisolia e ia le saito;” i le ma lea, “E tatau ‘ona avatu i lē faigaluega o lona taui.”
19 ‘Aua ne‘i talia se mau i se toeaina, vaganā o i ai se mau a le to‘alua po o le to‘atolu.
20 ‘Ia a‘oa‘i atu i ē agasala i luma o tagata uma, ‘ina ‘ia matata‘u ai nisi uma lava.
21 ‘Ou te matuā fai atu lava ‘iā te oe i luma o le Atua, ma le Ali‘i o Iesu Keriso, ma le ‘au agelu na filifilia, ‘ina ‘ia e tausi ‘inā mea e aunoa ma le alofa fa‘apito ma le fa‘ailogaina o se tasi.
22 ‘Aua ‘e te vave fa‘ae‘e atu lima i se tasi; ‘aua fo‘i le ‘au fa‘atasi i agasala a isi tagata. ‘Ia tāofi oe ‘iā te oe ‘ina ‘ia sao lau amio.
23 ‘Aua ‘e te toe inu i le vai auli, a ‘ia e inu sina uaina itiiti, ‘ona o lou manava ma lou ma‘i e tupu so‘o.
24 E iloa tino agasala a isi tagata, e muamua atu i le fa‘amasinoga; a o agasala a isi e mulimuli atu.
25 E fa‘apea fo‘i galuega lelei a isi, e iloa tino ia; o mea fo‘i e lē o fa‘apea e lē mafai ‘ona natia pea lava pea.