1 O Paulo, o le ‘aposetolo a Iesu Keriso i le finagalo o le Atua, e tusa ma le folafolaga o le ola o lo‘o ‘iā Keriso Iesu.
2 ‘Ia Timoteo lo‘u atali‘i pele.‘Ia ‘iā te oe le alofa tunoa, ma le alofa, ma le manuia mai le Atua le Tamā, ‘atoa ma Keriso Iesu lo tatou Ali‘i.
3 ‘Ou te fa‘afetai atu i le Atua, o lē ‘ou te ‘au‘auna i ai ma le loto fuatia ifo ‘ua mamā e pei ‘ona o‘u tupuga, ‘ina ‘ua ‘ou manatua oe e lē aunoa i a‘u fa‘atoga i le po ma le ao.
4 O lo‘o ‘ou fa‘anaunau e feiloa‘i ma oe, auā ‘ua ‘ou manatu i ou loimata, ‘ina ‘ia tumu ai a‘u i le ‘oli‘oli;
5 ‘Ua ‘ou manatua le fa‘atuatua fa‘amaoni ‘ua ‘iā te oe, sa mua‘i i ai ‘iā Loi o le tinā o lou tinā, ‘atoa ma Eunike lou tinā; o la‘u tāofi o lo‘o ‘iā te fo‘i.
6 O le mea lea ‘ou te fa‘amanatu atu ai ‘iā te oe ‘ia toe fa‘amumū le mea alofa mai le Atua, o lo‘o ‘iā te oe lea i le fa‘ae‘e atu o o‘u lima.
7 Auā ‘ua lē foa‘iina mai e le Atua ‘iā te i tatou le Agaga e mata‘u ai, a o le Agaga e fa‘amalosi ai, ma alofa ai, ma pulea ai o tatou loto.
8 O lenei, ‘aua ‘e te mā i le molimau i lo tatou Ali‘i, po o ‘ona o a‘u po o noanoatia ‘ona o ia; a ‘ia tigā fa‘atasi i tatou ‘ona o le tala lelei e tusa ma le mana o le Atua,
9 o lē na fa‘aola mai ‘iā i tatou, ma vala‘au mai i le vala‘au pa‘ia, e lē tusa ma a tatou galuega, ‘ae tusa ma lona lava finagalo ma lona alofa tunoa na foa‘iina mai ‘iā i tatou ‘iā Keriso Iesu talu mai le vavau.
10 A ‘ua fa‘ailoa mai nei i le fa‘aalia mai o lo tatou Fa‘aola o Iesu Keriso, o lē ‘ua fa‘aumatia lava le oti, a o le ola ma le lē i‘u vale ‘ua fa‘amalamalamaina mai lea e ia i le tala lelei.
11 ‘Ua tofia ai a‘u o lē tala‘i ma le ‘aposetolo, ma le a‘oa‘o.
12 O le mea lea ‘ua tigāina ai a‘u i ia mea; a ‘ou te lē mā lava, auā ‘ua ‘ou iloa o ia ‘ua ‘ou fa‘atuatua i ai, ‘ua ‘ou mautinoa fo‘i ‘ua mafaia lava e ia ‘ona leoleo i le mea na ia tu‘uina mai ai ‘iā te a‘u e o‘o atu i lea lava Aso.
13 O matua o ‘upu e ola ai, na e fa‘alogologo mai ai ‘iā te a‘u, ‘ia e tāofia i le fa‘atuatua ma le alofa ‘iā Keriso Iesu.
14 O le mea lelei ‘ua tu‘uina atu ‘iā te oe ‘ia e tausia i le fesoasoani o le Agaga Pa‘ia o lo‘o nofo i totonu ‘iā i tatou.
15 ‘Ua e iloa lenei mea, o i latou uma o i Asia ‘ua lafoa‘i ‘iā te a‘u, e i ai Fogelu ma Emokene.
16 ‘Ia alofa atu le Ali‘i i le ‘āiga o Oneseforo auā na ia fa‘amafanafana so‘o mai ‘iā te a‘u, e le‘i mā fo‘i o ia i ‘ou filifili u‘amea,
17 ‘ae peita‘i na i Roma o ia, ‘ona matuā sā‘ili mai lea o ia ‘iā te a‘u, i le ‘ua maua.
18 ‘Ia foa‘iina atu e le Ali‘i ‘iā te ia, ‘ia maua le alofa mai le Ali‘i i lea lava aso. ‘Ua e iloa lelei o mea e tele na ia ‘au‘auna mai ai ‘iā te a‘u i Efeso.#