1 O lenei ‘ou te matuā fai atu ‘iā te oe i luma o le Atua ma le Ali‘i o Iesu Keriso o lē na te fa‘amasinoina o ē ola ‘atoa ma ē ‘ua oti, pe a o‘o i lona fa‘aali mai fo‘i ma lona mālō.
2 ‘Ia e tala‘i atu le ‘upu, ‘ia e fa‘amalosi i ona aso e taugalemū ai, ma ona aso e lē taugalemū ai, ‘ia e fa‘atonu atu, ‘ia e a‘oa‘i atu, ‘ia e apoapoa‘i atu ma le ‘onosa‘i uma ‘atoa ma le a‘oa‘o atu.
3 Auā e o‘o i ona po latou te lē mafafai ai ‘ona talia, o le a‘oa‘oga e ola ai, ‘ae tusa ma o latou lava tu‘inanau, latou te fa‘apotopoto ai a‘oa‘o mo i latou, ‘ina ‘ua feū o latou taliga;
4 latou te liliu ‘ese fo‘i o latou taliga i le ‘upu moni, ‘ae liliu atu i tala o le vavau.
5 A o oe, ‘ia e fa‘autauta i mea uma lava, ‘ia e ‘onosa‘i i mea e tigā ai, ‘ia e fai le galuega a lē folafola le tala lelei, ‘ia e matuā fa‘ai‘uina lau faiva.
6 Auā o a‘u ‘ua fa‘amaligiina nei lo‘u toto ‘ua lata ona po ‘ou te alu ai.
7 ‘Ua ‘ou tau le tā‘ua lelei, ‘ua i‘u ‘iā te a‘u le tausinioga, ‘ua ‘ou tāofi i le fa‘atuatua.
8 O lenei, ‘ua teuina mo a‘u le pale o le amiotonu, e foa‘iina mai ‘iā te a‘u i lea lava Aso e le Ali‘i le fa‘amasino amiotonu; e lē gata fo‘i i ‘iā te a‘u, a o i latou uma lava o ē fiafia i lona fa‘aali mai.
9 ‘Ia e taumafai ‘ona sau ‘iā te a‘u ‘ia vave lava;
10 auā ‘ua tu‘ulafoa‘iina a‘u e Tema ‘ina ‘ua mana‘o ia i lenei olaga, ‘ua alu fo‘i i Tesalonia; o Kerese ‘ua alu ia i Kalatia, o Tito ‘ua alu ia i Talamatia
11 na o Luka o lo‘o ‘iā te a‘u. ‘Ia ‘oulua ō mai ma Mareko auā e aogā ia ‘iā te a‘u i le galuega.
12 ‘Ua ‘ou ‘auina atu Tuiko i Efeso.
13 A ē sau, ‘ia e ‘aumai le ‘ofu talaloa na tu‘u e a‘u i Teroa, o lo‘o ‘iā Kaapo, ‘atoa ma tusi, ‘ae tautuanā a pa‘u e tusi ai ne‘i tu‘u.
14 E tele mea leaga na faia ‘iā te a‘u e Alesana le fai mea ‘apamemea; o le a taui atu e le Ali‘i ‘iā te ia e tusa ma ana galuega.
15 ‘Ia oe fo‘i ‘iā te ia, auā ‘ua na matuā tete‘e mai ‘iā tatou ‘upu.
16 O la‘u ulua‘i fa‘amatalaga tete‘e e le‘i fa‘atasi mai ai se tasi ‘iā te a‘u, a ‘ua lafoa‘i mai e tagata uma lava ‘iā te a‘u; ‘aua ne‘i ta‘uiina atu ‘iā te i latou.
17 ‘Ae peita‘i sa ‘iā te a‘u le Ali‘i, ma na fa‘amalosi mai ‘iā te a‘u, ‘ina ‘ia fa‘a‘ato‘atoaina e a‘u le tala‘iga, ‘ina ‘ia fa‘alogologo i ai o nu‘u uma lava; o lea ‘ua lavea‘iina fo‘i a‘u e ai le gutu o le leona.
18 E lavea‘i mai fo‘i le Ali‘i ‘iā te a‘u ai mea leaga uma, ma fa‘aola mai ‘iā te a‘u ‘ia o‘o i lona mālō i le lagi. ‘Ia ‘iā te ia le vi‘iga e fa‘avavau fa‘avavau lava. Amene.
19 ‘Ua ‘ou alofa atu ‘iā Piseka ma Akula, ma le ‘āiga o Oneseforo.
20 ‘Ua nofo pea Erato i Korinito; a o Tofimo na tu‘ua e ia o a‘u i Meleto o ma‘i.
21 ‘Ia e ta‘alise mai a o le‘i o‘o i le tau ma‘alili.O alolofa atu ‘iā te oe o Eupolo, ma Paute, ma Lino, ma Kalaotia, ma le ‘au uso uma lava.
22 ‘Ia i ai i lou agaga le Ali‘i o Iesu Keriso.‘Ia ‘iā te ‘outou le alofa tunoa.