1 ‘Ua ‘auina Natano e le ALI‘I ‘iā Tavita, ‘ona alu atu lea o ia ‘iā te ia ‘ua fa‘apea atu i ai, “O tagata e to‘alua sa i le tasi ‘a‘ai, e mau‘oa le tasi, ‘ae mativa le tasi.
2 Sa i le mau‘oa o mamoe ma povi e tele lava.
3 ‘Ae leai se mea a le mativa, ‘ua na o le tama‘i mamoe fafine itiiti e tasi, na ia fa‘atau, ma fa‘asaoina, ‘ua tupu fa‘atasi ma i latou ma lana fānau; o si ana fasi mea na ‘ai ai, o lana ipu na inu ai, sa ta‘oto fo‘i i lona fatafata, ‘ua pei se afafine lava ‘iā te ia.
4 Na alu ane le tagata alu malaga i le mau‘oa; na ia lē mafaia ‘ona ‘ave sana mamoe, po o sana povi, e sauni ma le malaga ‘ua alu atu ‘iā te ia; a ‘ua ‘ave le tama‘i mamoe a le tagata mativa, ‘ua sauni ai ma le tagata ‘ua alu atu ‘iā te ia.”
5 ‘Ona matuā tupu ai lea o le ita o Tavita i lea tagata; ‘ua fetalai mai o ia ‘iā Natano, “O lo‘o soifua le ALI‘I, e oti lava le tagata ‘ua na faia lea mea;
6 a o le tama‘i mamoe, na te taui atu lea i mamoe e fa, ‘ina ‘ua na faia lenā mea, ma ‘ua lē alofa.”
7 ‘Ona fai atu lea o Natano ‘iā Tavita, “O oe lava le tagata o lo‘o fa‘apea ‘ona fetalai mai le ALI‘I le Atua o Isaraelu. O a‘u lava na ‘ou fa‘au‘uina oe e fai ma tupu o Isaraelu; o a‘u fo‘i, na ‘ou lavea‘i ‘iā te oe a‘i le lima o Saulo;
8 na ‘ou avatu ‘iā te oe le fale o lou ali‘i, ma avā a lou ali‘i i lou fatafata; na ‘ou avatu fo‘i ‘iā te oe le ‘āiga o Isaraelu ma Iuta, ana itiiti lea, po ‘ua ‘ou fa‘aopoopoina ‘iā te oe o lea ma lea.
9 Se a le mea ‘ua e ‘ino‘ino ai i le afioga a le ALI‘I, ‘ua e fai ai le mea leaga i ona luma? ‘Ua e fasioti ‘iā Uria le sa Hetī i le pelu, ‘ua e ‘aumai fo‘i lana avā e fai mau avā, a o ia ‘ua e fasia i le pelu o le fānauga a Amoni.
10 O lenei, e lē mavae le pelu a‘i lou ‘āiga e fa‘avavau, auā ‘ua e fa‘alemigao ‘iā te a‘u, ma ‘ua e ‘aumaia le avā a Uria le sa Hetī e fai mau avā.
11 O lo‘o fa‘apea ‘ona fetalai mai o le ALI‘I: Fa‘auta, o le a a‘u fa‘atupu le leaga ‘iā te oe ai lou lava ‘āiga; ‘ou te ‘ave au avā i ou luma, ma ‘ou avatu ai i le tasi tagata, e moe o ia ma au avā i le mumū o lenā lā;
12 auā o oe na e fai fa‘alilolilo; a o a‘u, ‘ou te faia lenei mea i luma o Isaraelu uma i le mumū o le lā.”
13 ‘Ona fai mai lea o Tavita ‘iā Natano, “‘Ua ‘ou agasala lava i le ALI‘I.”‘Ua fai atu Natano ‘iā Tavita, “‘Ua ‘ave‘eseina lau agasala e le ALI‘I, ‘e te lē oti ai;
14 na o lenei, ‘ua e fa‘atupu mai le ‘ino‘ino o ē ita i le ALI‘I i lenei mea, o le mea lea e oti ai lava le tama ‘ua fānau mai ‘iā te oe.”
15 ‘Ona alu lea o Natano i lona fale, a ‘ua taia e le ALI‘I le tama sa fānau mai e le avā a Uria ‘iā Tavita, ‘ona ma‘i lava lea o ia.
16 ‘Ua tatalo Tavita i le Atua ‘ona o le tama, ‘ua anapogi Tavita, ‘ua alu fo‘i ‘ua ao lava le po o ta‘oto i le ‘ele‘ele.
17 ‘Ona tula‘i atu lea o toeaina o lona ‘āiga e fa‘atū ‘iā te ia nai le ‘ele‘ele; a ‘ua lē mafai o ia, ma ‘ua lē ‘a‘ai ma i latou.
18 ‘Ua o‘o i le aso fitu, ‘ona oti ai lea o le tama; ‘ua fefefe ‘au‘auna a Tavita e ta‘u atu ‘iā te ia, ‘ua oti le tama; auā ‘ua fa‘apea i latou, “Fa‘auta, na tatou tautala atu ‘iā te ia ‘ina o ola le tama, a o le‘i fa‘afofoga mai o ia ‘iā te i tatou; e lē atili ai ‘ea ‘ona tigā o ia, pe a tatou fai atu ‘iā te ia ‘ua oti le tama?”
19 ‘Ua va‘ai atu Tavita ‘ua femusua‘i ana ‘au‘auna, ‘ona masalo lea o Tavita ‘ua oti le tama; ‘ona fesili atu lea o Tavita i ana ‘au‘auna, “Po ‘ua oti ‘ea le tama?”‘Ua fai mai i latou, “‘Ua maliu.”
20 ‘Ona tula‘i lea o Tavita nai le ‘ele‘ele, ‘ua tā‘ele ma u‘u ma sui ona ‘ofu; ‘ona alu atu lea o ia i le fale o le ALI‘I, ma ifo, i le sau ai i lona fale, ‘ua fai atu ‘iā te i latou, ‘ona latou laulau mai lea ni mea e ‘ai, ‘ona ‘ai ai lea o ia.
21 ‘Ua fai mai ana ‘au‘auna ‘iā te ia, “O le a ‘ea lenei mea ‘ua e faia? Na e anapogi ma tutulu, a o soifua le tama; a o lenei, ‘ua maliu le tama, ‘ona e tula‘i lea ma taumafa.”
22 ‘Ona tali atu ai lea o ia, “Na ‘ou anapogi ma tagi ‘ina o ola le tama auā na ‘ou fa‘apea, ‘E iloa e ai, pe alofa mai le ALI‘I ‘iā te a‘u, ia ola le tama.’
23 A o lenei ‘ua oti o ia, se a le mea ‘ou te anapogi ai? ‘Ou te mafaia ‘ea ‘ona toe fa‘afoisia mai o ia? ‘ou te alu ‘iā te ia, ‘ae lē fo‘i mai o ia ‘iā te a‘u.”
24 ‘Ona fa‘amatalaloto lea o Tavita ‘iā Patesepa lana avā ma na alu atu ‘iā te ia, ‘ua la momoe ma ia; ‘ona fānau mai lea o lana tama tane, ‘ua ia fa‘aigoa ‘iā te ia, o Solomona. ‘Ua alofa le ALI‘I ‘iā te ia.
25 ‘Ua ia ‘auina atu fo‘i Natano le perofeta ma fa‘aigoa ‘iā te ia, o Ietitaia, ‘ona o le ALI‘I.
26 ‘Ua tau Ioapo ma Rapa o le ‘a‘ai a le fānauga a Amoni, na ia ā‘ea le ‘a‘ai a le tupu.
27 ‘Ona ‘auina atu lea e Ioapo o le savali ‘iā Tavita, ‘ua fa‘apea atu, “Na matou tau ma Rapa, ‘ua ‘ou ā‘ea fo‘i le ‘a‘ai o vai.
28 O lenei, ‘ia e fa‘apotopoto le nu‘u ‘ua totoe ma e si‘i mai le tau‘a i le ‘a‘ai, ma e ā‘ea ai, ‘ina ne‘i maua e a‘u o le ‘a‘ai, ‘ona fa‘aigoa ai lea i lo‘u nei igoa.”
29 ‘Ona fa‘apotopoto lea e Tavita o le nu‘u uma, ‘ua alu atu i Rapa; ‘ua tau ai le tau‘a, ‘ona ‘ia ā‘ea ai lea o le ‘a‘ai.
30 ‘Ona ‘ave lea o le paleali‘i a lo latou tupu a‘i lona ao, (o lona mamafa o le taleni o auro ma ma‘a tāua,) ‘ua fa‘ae‘e ai i le ao o Tavita; na ia ‘ave fo‘i le vete o le ‘a‘ai, ‘ua tele lava.
31 A o le nu‘u sa i ai ‘ua ia ta‘ita‘i atu i latou, ma tu‘u atu i ‘ili, ma tui u‘amea, ma to‘i u‘amea, ma na tu‘u atu i latou ‘ia ō atu i le mea e tunu ai ma‘a‘omea; ‘ua fa‘apea ‘ona fai e ia i ‘a‘ai uma o le fānauga a Amoni; ‘ona fo‘i atu lea o Tavita ma le nu‘u uma i Ierusalema.