1 ‘Ua faitauina e Tavita le nu‘u ‘ua ‘iā te ia, ma na tofia fo‘i o ali‘i o ta‘ito‘aafe ma ali‘i o ta‘ito‘aselau e pule ‘iā i latou.
2 ‘Ua tu‘u atu e Tavita le nu‘u ‘ua vaetoluina, o le tasi vaega i le pule a Ioapo, ma le tasi ona vaega i le pule a Apisai le tama a Seruia, le uso o Ioapo, ma le isi ona vaega i le pule a Itai le sa Katā; ‘ua fai ane fo‘i le tupu i le nu‘u, “O a‘u fo‘i, tatou te ō lava fa‘atasi ma ‘outou.”
3 A ‘ua fai mai le nu‘u, “‘E te lē maliu atu lava, auā ‘āfai e sōsōla i matou, latou te lē manatu mai lava ‘iā i matou; ‘āfai fo‘i e vaeluaina i matou i le oti, latou te lē manatu mai lava ‘iā te i matou; a o lenei ‘ua tusa oe ma le sefulu afe o i matou; o lenei, e lelei ‘ona e fesoasoani ‘iā te i matou ai le ‘a‘ai.”
4 ‘Ona fai atu lea o le tupu ‘iā i latou, “O le mea e lelei ‘iā te ‘outou ‘ou te faia lea;” ‘ona tu lea o le tupu i le itū o le faitoto‘a, a ‘ua ō atu le nu‘u uma i ‘au ta‘ito‘aselau ma ta‘ito‘aafe.
5 ‘Ua fai atu le tupu ‘iā Ioapo ma Apisai ma Itai, ‘ua fa‘apea, “‘Ia ‘outou agamalū i le taule‘ale‘a o Apisaloma ‘ona o a‘u.” ‘Ua fa‘alogo ai le nu‘u uma, ‘ina ‘ua fai atu le tupu i ali‘i uma le ‘upu ‘iā Apisaloma.
6 ‘Ua ō atu le nu‘u i le vao e fa‘afetaia‘i ‘iā Isaraelu; ‘ona tau ai lea o le tau‘a i le vao matua o Efaraima.
7 ‘Ona fasia lea i lea mea o le nu‘u o Isaraelu e ‘au‘auna a Tavita; sa fai le fasi tele i lea aso, e lua sefulu o afe.
8 ‘Ua salalau solo ‘ona tau o le tau‘a i le fogā‘ele‘ele uma; ‘ua sili ‘ona to‘atele o le nu‘u ‘ua oti i le vao i ē na oti i le pelu i lea aso.
9 ‘Ua fetaia‘i Apisaloma ma ‘au‘auna a Tavita; sa ti‘eti‘e Apisaloma, i le falata, ‘ona alu lea o le falata i lalo o le tapeneto felefele tele, ‘ua lavemauina lona ulu i le tapeneto, ‘ua tu‘ua o ia i le vā o le lagi ma le lalolagi, a ‘ua alu ‘ese le falata sa ti‘eti‘e ai o ia.
10 ‘Ua iloa ai e le tasi tagata, ‘ona ia ta‘u atu lea ‘iā Ioapo, ‘ua fa‘apea atu, “Fa‘auta, na ‘ou iloa Apisaloma, ‘ua tautau i le tapeneto.”
11 ‘Ua fai mai Ioapo i le tagata ‘ua ta‘u atu ‘iā te ia, “Fa‘auta, na e iloa o ia, o le a le mea na e lē fasioti ai ‘iā te ia ‘ia pa‘ū i le ‘ele‘ele? ana e fa‘apea, po ‘ua ‘ou avatu ‘iā te oe o tupe e sefulu ma le fusi e tasi.”
12 ‘Ona fai atu lea o le tagata ‘iā Ioapo, “E ui lava ‘ina e fua mai o tupe e afe i lo‘u lava lima, ‘ou te lē fa‘ao‘o atu lo‘u lima i le atali‘i o le tupu; auā na poloa‘i le tupu ‘iā te oe ma Apisai ma Itai, o matou fa‘alogo ane ‘ua fa‘apea: ‘Ia ‘outou, ne‘i ai se tasi e mao i le taule‘ale‘a o Apisaloma.
13 ‘Ana a‘u fa‘apea po ‘ua pelogia a‘u e a‘u; auā e lē natia se mea e tasi i le tupu; o oe fo‘i po ‘ua e molia a‘u.”
14 ‘Ua fai mai Ioapo, “‘Ou te lē mafai ‘ona tā tutū pea fa‘apenei ma oe.” ‘Ona ia ‘ave ai lea o tao e tolu i lona lima, ma tutu‘i ai i le fatu o Apisaloma, a o ola lava o ia i totonu o le tapeneto.
15 ‘Ona si‘osi‘o ai lea o taulele‘a e to‘asefulu, o soātau o Ioapo, ma latou fasi ‘iā Apisaloma, ‘ua fa‘aoti ‘iā te ia.
16 ‘Ona ili lea e Ioapo o le pū, i le ‘ua fo‘i ai le nu‘u ai le tuliloaga o Isaraelu; auā na tāofia le nu‘u e Ioapo.
17 ‘Ona latou ‘ave lea ‘iā Apisaloma, ma lafo ‘iā te ia i le lua tele i le vao; ‘ona fa‘aputu ai lea i ona luga o le faupu‘egama‘a matuā tele; a o Isaraelu uma ‘ua ta‘itasi ma sola i lona fale ‘ie.
18 Sa ‘ave ma fa‘atū e Apisaloma, ‘ina o ola o ia, le fa‘ailoga, o lo‘o i le vanu o le tupu, auā sa fa‘apea o ia, “E leai so‘u atali‘i e fa‘amanatuina a‘i lo‘u igoa;” na ia fa‘aigoa le fa‘ailoga i lona lava igoa, ‘ua igoa a‘i, o le fa‘ailoga o Apisaloma; ‘ua o‘o lava i le aso nei.
19 ‘Ona fai ane lea o Aimaasu le atali‘i o Satoka, “Se‘i ‘ou momo‘e, ma ta‘u atu i le tupu, ‘ua lavea‘iina o ia e le ALI‘I a‘i lima o ē na ita ‘iā te ia.”
20 A ‘ua fai atu Ioapo ‘iā te ia, “‘E te lē ‘avea se tala i lenei aso, a o‘o i le tasi aso ‘e te ‘avea ai se tala, a o le aso nei ‘e te lē ‘avea se tala, auā ‘ua oti le atali‘i o le tupu.”
21 ‘Ua fai atu Ioapo ‘iā Kusi, “Alu ia oe, ta‘u atu i le tupu le mea ‘ua e iloa.” ‘Ona ifo lea o Kusi ‘iā Ioapo ‘ona momo‘e ai lea o ia.
22 ‘Ona toe fai mai lea o Aimaasu le atali‘i o Satoka ‘iā Ioapo, “Tu‘u mai ia, se‘i ‘ou momo‘e atu fo‘i a‘u, e mulimuli ‘iā Kusi.”‘Ona fai atu lea o Ioapo, “Lo‘u atali‘i e, o le a le mea ‘e te momo‘e atu ai, auā ‘e te le‘i maua se tala?”
23 ‘Ua fai mai o ia, “Tu‘u mai pea, se‘i ‘ou momo‘e.”‘Ona fai atu lea o ia, “Momo‘e ia.” ‘Ona momo‘e ai lea o Aimaasu i le ala o le fanua laugatasi, na ia tu‘una o Kusi i tua.
24 Sa nofo Tavita i le vā o puipui e lua; a ‘ua alu le tagata va‘ai i luga lava o le faitoto‘a i luga o le pā; ‘ua va‘ai atu o ia, ‘ona iloa atu lea, fa‘auta, o le tagata ‘ua momo‘e to‘atasi mai.
25 ‘Ua vala‘au le tagata va‘ai ma ta‘u mai ai i le tupu. ‘Ua fai atu le tupu, “‘Āfai e to‘atasi o ia, ‘ua i ai se tala.” ‘Ua saga momo‘e mai pea o ia, ‘ua taulata mai.
26 ‘Ona iloa lea e le tagata va‘ai o le tasi tagata ‘ua momo‘e mai; ‘ua vala‘au le tagata va‘ai i le leoleo o le faitoto‘a, ‘ua fa‘apea ane, “Fa‘auta, o le tasi tagata ‘ua momo‘e to‘atasi mai.”‘Ua fai atu le tupu, “O i ai fo‘i se tala.”
27 ‘Ona fai mai lea o le tagata va‘ai, “‘Ou te va‘ai i le momo‘e o lē muamua, e pei o le momo‘e o Aimaasu le atali‘i o Satoka.”‘Ona fai atu lea o le tupu, “O le tagata lelei o ia, na te ‘aumaia le tala lelei.”
28 ‘Ona vala‘au lea o Aimaasu, ‘ua fai mai i le tupu, “‘Ia manuia;” ‘ona ifo to‘ele ai lea o ia i le tupu; ‘ua fai mai, “‘Ia fa‘afetaia le ALI‘I lou Atua, o lē ‘ua tu‘uina mai ia tagata ē na si‘i le tau‘a i lo‘u ali‘i le tupu.”
29 ‘Ua fai ane le tupu, “O saogalemū ‘ea le taule‘ale‘a o Apisaloma.”‘Ona fai mai ai lea o Aimaasu, “Na a‘u iloa le nunu o tagata ‘ina ‘ua ‘auina mai le ‘au‘auna a le tupu e Ioapo ma lau ‘au‘auna, a ‘ou te le‘i iloa po o le a.”
30 ‘Ua fai atu le tupu, “Fa‘atafa ia oe ma e tu ‘ese ane”; ‘ona fa‘atafa ai lea o ia ma tu ‘ese.
31 Fa‘auta fo‘i, ‘ua sau Kusi; ‘ua fai mai Kusi, “Lo‘u ali‘i e, le tupu, o le tala lelei! Auā ‘ua lavea‘iina oe e le ALI‘I i lenei aso a‘i lima o ē na tutū mai uma lava e tau ma oe.”
32 ‘Ua fetalai atu le tupu ‘iā Kusi, “O saogalemū ‘ea le taule‘ale‘a o Apisaloma?”‘Ua fai mai Kusi, “‘Ia pei o lea taule‘ale‘a ē ‘ua ita i lo‘u ali‘i le tupu, ‘atoa ma i latou uma e tutū mai e agaleaga ‘iā te oe.”
33 ‘Ona mutimutivale ai lea o le finagalo o le tupu; ‘ua alu a‘e a‘i i le afeafe i luga o le faitoto‘a, ‘ua tagi, ‘ua fa‘apea fano, “Lo‘u atali‘i Apisaloma e, lo‘u atali‘i e, lo‘u atali‘i Apisaloma e! tā fia oti e sui ai oe Apisaloma lo‘u atali‘i e, lo‘u atali‘i e, lo‘u atali‘i Apisaloma e, tā fia oti e sui ai oe Apisaloma lo‘u atali‘i e, lo‘u atali‘i e.”