1 ‘Ua mavae nei mea, ‘ona faia lea e Apisaloma lona nofoa fa‘ata‘avalevale, ma solofanua, ma tagata e to‘alimagafulu e taufetuli i ona luma.
2 ‘Ua usuusu Apisaloma, ma tu i le tasi itū ala o le faitoto‘a; ai se tasi ‘ua sau ma lana finauga i le tupu e fa‘amasino ai; ‘ona vala‘au lea o Apisaloma ‘iā te ia, ‘ua fa‘apea atu, “Mai le fea nu‘u ‘ea oe?” ‘Ona tali mai lea o ia, “Mai le tasi itū‘āiga o Isaraelu na sau ai lau ‘au‘auna.”
3 ‘Ona fai atu lea o Apisaloma ‘iā te ia, “Fa‘auta, ‘ua lelei au mea ma ‘ua tonu, ‘ae leai se tasi ‘ua tofia e le tupu e fa‘alogologo ‘iā te oe.”
4 ‘Ua fai ane fo‘i Apisaloma, “Tā fia fai ma fa‘amasino o le nu‘u; ‘ina ‘ia ō mai ‘iā te a‘u tagata e ta‘ito‘atasi uma ‘ua i ai se finauga po o se fa‘amasinoga, ‘ona ‘ou fa‘amasino tonu ai lea ‘iā te ia.”
5 A fa‘alatalata mai se tasi e ifo ‘iā te ia, ‘ona tu‘u atu lea e ia o lona lima, ma tago atu ‘iā te ia, ma sogi ‘iā te ia.
6 ‘Ua fa‘apenā ‘ona fai e Apisaloma ‘iā Isaraelu uma na ō ane i le fa‘amasinoga a le tupu; ‘ona fa‘aliliu lea ‘iā te ia e Apisaloma loto o tagata o Isaraelu.
7 ‘Ua mavae tausaga e fagafulu; ‘ona fai mai lea o Apisaloma i le tupu, “Se‘i ‘ou alu i Heperona e fa‘ataunu‘u ai la‘u tautoga, na ‘ou tautō atu ai i le ALI‘I.