1 ‘Ona ta‘uina atu lea ‘iā Ioapo, “Fa‘auta, o lo‘o tagi ma fa‘anoanoa le tupu ‘iā Apisaloma.”
2 ‘Ona ‘avea lea o le manumālō i lea aso ma mea e fa‘anoanoa ai i le nu‘u uma; auā ‘ua fa‘alogo le nu‘u i lea aso, ‘ua fa‘apea, “‘Ua tigā le tupu ‘ona o lona atali‘i.”
3 ‘Ua ō fa‘agaoi le nu‘u i lea aso i le ‘a‘ai, e pei ‘ona e fa‘agaoi le nu‘u ‘ua māsiasi ‘ina ‘ua sōsōla i le tau‘a.
4 ‘Ua ufiufi e le tupu ona fofoga; ‘ua ‘alaga fo‘i le tupu ‘ua leo tele, “Lo‘u atali‘i Apisaloma e, Apisaloma lo‘u atali‘i e, lo‘u atali‘i e!”
5 ‘Ona ulufale atu lea o Ioapo i le tupu, ‘ua fai atu, “‘Ua e fa‘amāina i le aso nei o au ‘au‘auna uma lava, ē ‘ua lavea‘i ‘iā te oe i lenei aso, ma ou atali‘i, ‘atoa ma ou afafine, ma ou faletua, ma au palake,
6 ‘ina ‘ua e alofa i ē ‘ino‘ino ‘iā te oe, ma e ‘ino‘ino i ē alofa ‘iā te oe; auā ‘ua e fa‘aali mai i lenei aso, e leai sou manatu i ni ali‘i ma ‘au‘auna; auā ‘ua ‘ou iloa i lenei aso, ana ola Apisaloma, ‘ae oti i matou uma i le asō, po ‘ua lelei lea ‘iā te oe.
7 O lenei, tula‘i ia ma e maliu atu ma fa‘amatalaloto i au ‘au‘auna; auā ‘ou te tautō i le ALI‘I, ‘āfai ‘e te lē maliu atu, e leai se tasi lua te nonofo i le po nanei; e sili ‘ona leaga lea ‘iā te oe i mea leaga uma ‘ua o‘o ‘iā te oe talu ‘ona e taule‘ale‘a e o‘o i le aso nei.”