1 Na totogi atu e le tupu o Asueru i le vao nu‘u ma nu‘u tuloto i tai, ‘ia faia le taulaga ‘iā te ia.
2 O mea uma na faia i lana pule ma lona malosi ma le tala i le silisili o Moretekai na fa‘asilisiliina ai o ia e le tupu, e le‘i tusia ‘ea ia mea i le tusi o tala i nofoa‘iga a tupu o Metai ma Peresia?
3 Auā na aupito Moretekai o lo sa Iutā i le tupu o Asueru; na silisili o ia i sa Iuta; na fiafia ‘iā te ia le to‘atele o ona uso; ‘ua sā‘ili e ia ‘ia manuia lona nu‘u; ‘ua tautala fo‘i ma le alofa i lona nu‘u uma.
4 ‘Ua fa‘apea ane o Moretekai: O mea ia na faia e le Atua.
5 Auā ‘ou te manatua la‘u miti na ‘ou fai i ia mea, ‘ua leai fo‘i se mea e le‘i taunu‘u.
6 O le punāvai itiiti ‘ua ‘avea ma vaitafe tele, ma le malamalama, ma le la, ma ni vai e tele anoanoa‘i o le vaitafe, o Eseta lea, na la fa‘aipoipo ma le tupu ma fai māna masiofo.
7 O tarako e lua, o Hamanu lea ma a‘u.
8 O nu‘u, o i latou ia na potopoto ‘ina ‘ia latou fa‘aumatia le igoa Iutaia.
9 O lo‘u nu‘u, o Isaraelu lea o le na ‘alaga atu i le Atua, i le ‘ua fa‘aolaina. O le Ali‘i na fa‘aola i lona nu‘u, o le Ali‘i na lavea‘i ‘iā te i tatou mai mala uma ia; ‘ua faia e le Atua o fa‘ailoga ma vāvega e le‘i faia i nu‘u ‘ese.
10 O le mea lea na faia ai e ia o tofi e lua, o le tasi mo le nu‘u o le Atua ma le tasi mo nu‘u ‘ese.
11 ‘Ua o‘o mai fo‘i o ia tofi i atunu‘u uma i le itūaso, ma le vaitausaga, ma le po na ‘atofaina i le finagalo o le Atua.
12 ‘Ona manatua lea e le Atua lona nu‘u ma fa‘amamalu i lona tofi.
13 Latou te tausia fo‘i ia aso i le masina o Atara, i lona sefulu ma le fa ma lona sefulu ma le lima o aso o lea masina, latou te fa‘apotopoto ai le nu‘u i le fiafia ma le ‘oli‘oli i luma o le Atua i lona sefulu ma le lima o aso o lea masina, latou te fa‘apotopoto ai le nu‘u i le fiafia ma le ‘oli‘oli i luma o le Atua i tupulaga uma lava o lona nu‘u o Isaraelu i le fa‘avavau.
14 O lona fa o tausaga o le nofoa‘iga a Tulomaio ma Kaleopatara, na ‘aumai ai i Aikupito le tusi i Purimi e Tositeu, fai mai o le ositaulaga o ia ma le sa Levi moni, ma lona atali‘i o Tulomaio. ‘Ua la fai mai o le tusi fa‘amaoni le tusi lea na fa‘aliliu e Lusimako, o le atali‘i o le tasi Tulomaio o lo‘o mau i Ierusalema.