1 O le masina e sefulu ma le lua, o le masina lea o Atara o lona aso e sefulu ma le tolu, a o‘o ‘ina taunu‘u ai le poloa‘iga a le tupu ma lana tulafono, o le aso na fa‘amoemoe ai o ē na ita i sa Iutā latou te manumālō ai ‘iā te i latou, (a ‘ua liua ma ‘ua manumālō ai sa Iutā i ē na ‘ino‘ino ‘iā te i latou;)
2 Na potopoto ai sa Iutā ‘iā latou ‘a‘ai i itū mālō uma o le tupu o Asueru e fa‘ao‘o o latou lima i ē na sā‘ili e agaleaga ‘iā te i latou; ‘ae le‘i tu mai se tasi i o latou luma; auā ‘ua matata‘u tagata uma ‘iā te i latou.
3 ‘Ua fesoasoani fo‘i i sa Iutā o ali‘i uma o itū mālō ma ali‘i sili, ma ē pule i nu‘u, ma ē na faia fe‘au a le tupu; auā ‘ua matata‘u i latou ‘iā Moretekai;
4 auā ‘ua sili Moretekai i le ‘āiga o le tupu, ‘ua o‘o fo‘i lona logo i itū mālō uma; auā ‘ua alualu ‘ona sili o lenei tagata o Moretekai.
5 ‘Ua fasia fo‘i e sa Iutā o ē na ita uma ‘iā te i latou i le fasiga i le pelu, ma ‘ua fasioti, ‘ua fano; ‘ua latou faia la latou faitalia i ē na ‘ino‘ino ‘iā te i latou.
6 ‘Ua fasiotia fo‘i ma fa‘aumatia e sa Iutā i Susana le maota o tagata e lima selau,
7 ‘atoa fo‘i ma Paresaneta ma Tafono, ma Asefata,
8 ma Porata, ma Ataleia, ma Aritatu,
9 ma Paremaseta, ma Arisai, ma Aritai, ma Vaisato.
10 O atali‘i ia e to‘asefulu o Hamanu le atali‘i o Hametatu, o lē na fa‘asauā i sa Iutā na fasiotia i latou; ‘ae le‘i vetea e i latou le ‘oloa.
11 O lenā aso na avatua ai i le tupu le faitau aofa‘i o ē na fasiotia i Susana le maota.
12 ‘Ona fai atu lea o le tupu i le masiofo o Eseta, “‘Ua fasiotia, ma fa‘aumatia e sa Iutā i Susana le maota o tagata e lima selau, ‘atoa ma atali‘i o Hamanu e to‘asefulu; se a se mea ‘ua latou faia i isi itū mālō uma o le tupu? O lenei, se a se mea ‘e te toe ole mai ai? O avatua ‘iā te oe; se a fo‘i se mea ‘e te toe fa‘atoga mai i ai? e faia lava.”
13 ‘Ona tali mai lea o Eseta, “‘Āfai e lelei i le tupu, ‘ia tu‘uina fo‘i taeao i sa Iutā o ē i Susana ‘ona ia faia e pei o le tulafono i le asō, ma ‘ia latou fa‘atautauina i le la‘au atali‘i o Hamanu o to‘atinoagafulu.”
14 ‘Ona fai atu lea o le tupu, ‘ia faia fa‘apea. ‘Ona tala‘iina lea o le tulafono i Susana. ‘Ona fa‘atautauina lea e i latou atali‘i o Hamanu e to‘atinoagafulu.
15 ‘Ua potopoto fo‘i sa Iutā ē na i Susana i le aso e sefulu ma le fa o le masina o Atara, ‘ona latou fasiotia lea i Susana o tagata e tolu selau; ‘ae le‘i vetea e i latou le ‘oloa.
16 O sa Iutā uma fo‘i ē na i ai i itū mālō o le tupu, na potopoto i latou e tete‘e atu ia ola ai i latou, ‘ona mapu ai lea o i latou i ē na ita ‘iā te i latou; na latou fasiotia fo‘i ē na ‘ino‘ino ‘iā te i latou o fitu sefulu o afe ma afe e lima; ‘ae le‘i vetea e i latou le ‘oloa,
17 o le aso e sefulu ma le tolu o le masina o Atara na fasia ai; ‘ona mapu ai lea o i latou i lona aso e sefulu ma le fa ma fai ai lenā ma aso e fai ai le tausamiga ma ‘oli‘oli ai.
18 O lona aso e sefulu ma le tolu, ma lona aso e sefulu ma le fa na potopoto ai sa Iutā ē na i Susana; ‘ona mapu ai lea o i latou i lona aso e sefulu ma le lima ma ‘ua fai lenā ma aso e fai ai le tausamiga, ma ‘oli‘oli ai.
19 O le mea lea na fai ai e sa Iutā sa i faoa ‘a‘ai, o ē na nonofo i ‘a‘ai e lē nofo ‘olo, o le aso e sefulu ma le fa o le masina o Atara ma aso lelei e ‘oli‘oli ai ma fai ai le tausamiga ma fe‘avea‘i ai tufa‘aga.
20 Na tusia fo‘i e Moretekai o ia mea, na ia avatua fo‘i tusi i sa Iutā uma ē na i ai i itū mālō uma o le tupu o Asueru, o ē na latalata mai ‘atoa ma ē mamao atu,
21 e fa‘amau ai ‘iā te i latou, ‘ona ia faia le aso e sefulu ma le fa o le masina o Atara, ma lona aso e sefulu ma le lima i tausaga uma,
22 auā o aso ia na mapu ai sa Iutā i ē na ita ‘iā te i latou, o le masina fo‘i na liliuina ai mo i latou o le fa‘anoanoa i le ‘oli‘oli ma le fa‘avauvau i le aso lelei. ‘Ona ia faia ia aso ma aso e fai ai le tausamiga ma ‘oli‘oli ai ma fe‘avea‘i ai tufa‘aga ma mea alofa i ē matitiva.
23 ‘Ona talia lea e sa Iutā e fai ma tu o mea na latou amata ‘ona faia ma mea na tusi atu ai e Moretekai ‘iā te i latou;
24 auā o Hamanu le atali‘i o Hametatu o lo sa Akakō, o lē na fa‘asauā i sa Iutā uma, na ia manatu i sa Iutā ‘ona ‘ia fano i latou. Na ia fai fo‘i le Puro, “o le vili lea,” ‘ina ‘ia fa‘aumatia i latou ma ia fano i latou.
25 A ‘ua alu atu Eseta i le tupu, ‘ona poloa‘i atu ai lea e ia i lana tusi ‘ia toe fo‘i atu i lona lava ulu lana manatu leaga na ia manatu ai i sa Iutā, ma ia fa‘atautauina o ia ma ona atali‘i i le la‘au.
26 O le mea lea na ta‘ua ai o ia aso o Puro, i le igoa o le Puro. O mea uma fo‘i o le tusi ma mea na latou va‘ava‘aia i lenei mea, ma mea na o‘o ‘iā te i latou,
27 na fa‘amauina ai e sa Iutā ma talia ai mo i latou ma a latou fānau, ma ē ‘ua fa‘atasia ma i latou, ‘ia lē toe mavae ‘ona faia o ia lava aso e lua e tusa ma a latou tusi, i ona lava po, i tausaga uma;
28 ma ‘ia manatua ma faia o ia lava aso i tupulaga uma, i lea ‘āiga ma lea ‘āiga, i lea itū mālō ma lea itū mālō, i lea ‘a‘ai ma lea ‘a‘ai; ‘aua fo‘i le toe mavae i sa Iutā o ia lava aso o Puro, ma ‘ia lē tu‘ua le fa‘amanatunatu i ai i la latou fānau.
29 O le masiofo o Eseta, le afafine o Aviaila, ma Moretekai o lo sa Iutā, na la tusi atu ma le pule lava se fa‘amauina ai lenei lua o tusi i Puro.
30 ‘Ua ia avatua fo‘i tusi i sa Iutā uma i itū mālō e tasi le selau e lua sefulu ma le fitu o le mālō o Asueru, o ‘upu alofa ma le fa‘amaoni,
31 ‘ina ‘ia fa‘amauina o ia aso o Puro i ona lava po, e pei ‘ona pule e Moretekai o lo sa Iutā ma le masiofo o Eseta ‘iā te i latou, e pei ‘ona latou fa‘atūina fo‘i mo i latou ma a latou fānau, o mea o anapogi ma lo latou ‘alalaga.
32 O le poloa‘iga a Eseta na fa‘amauina ai o ia mea o Puro; na tusia ai fo‘i le tusi.#