10 E le‘i fa‘ailoa atu e Eseta lona nu‘u po o lona ‘āiga auā na fai atu e Moretekai ‘iā te ia ‘aua na te fa‘ailoa atu.
11 O lea aso ma lea aso fo‘i na fealualua‘i ai o Moretekai i luma o le lotoā o le fale o fafine ‘ina ‘ia iloa po o mālōlō Eseta; pe se a fo‘i se mea e faia ‘iā te ia.
12 Na āua‘i ‘ona solo ta‘ito‘atasi o teine i lo latou ō atu i le tupu o Asueru ‘ina ‘ua ‘ato‘atoa masina e sefulu ma le lua, e tusa ma le tulafono i fafine; auā na fa‘apea ‘ona ‘ato‘atoa ai o aso o le fa‘amamāina o i latou; o masina e ono e u‘u ai i le suāu‘u muro ma masina e ono i mea manogi ma mea e fa‘amamāina a‘i fafine.
13 ‘Ua fa‘apea fo‘i ‘ona alu atu o le teine i le tupu; na avatua ‘iā te ia mea uma na ia fai atu ai e alu ai ma ia mai le fale o fafine i le fale o le tupu.
14 O le afiafi na alu atu ai o ia, o le taeao fo‘i na toe fo‘i ai i le lua o fale o fafine ‘iā Sasekasa le eunuka a le tupu, o le leoleo i palake; na ia le toe alu atu i le tupu, vaganā ‘ona fiafia o le tupu ‘iā te ia, ma ‘ua vala‘auina lona igoa.
15 ‘Ua o‘o fo‘i ‘iā Eseta le afafine o Aviaila le uso o le tamā o Moretekai, o lē na faia o ia mōna afafine, ‘ona alu atu i le tupu, e le‘i fai atu ai o ia i se mea ‘ua na o mea na fai atu ai Hege le eunuka a le tupu, o le tausi fafine. ‘Ua alofagia fo‘i Eseta e i latou uma ē na iloa o ia.
16 ‘Ua ‘avea Eseta i le tupu o Asueru i le fale o le tupu i le sefulu o masina, o le masina lea o Tapeta, i le fitu o tausaga o lana nofoa‘iga.