3 ‘Ia tofia fo‘i e le tupu o matai i itū mālō uma o lona mālō, latou te fa‘apotopotoina teine taupou lālelei uma i Susana le maota, i le fale o fafine, ‘iā Hege le eunuka a le tupu, o lē tausi i fafine ma ‘ia avatua ‘iā te i latou mea e fa‘amamāina a‘i i latou.
4 O le teine fo‘i e fiafia i ai le tupu ‘ia ‘avea o ia ma masiofo e sui a‘i Vasati.”‘Ua lelei lea ‘upu i le manatu o le tupu, ‘ona ia faia lea fa‘apea.
5 ‘Ua i ai i Susana le maota o le tasi tagata o sa Iutā, o Moretekai lona igoa, o le atali‘i o Iairo, o le atali‘i ia o Semi, o le atali‘i ia o Kiso, o lo sa Peniaminā.
6 ‘Ua tāfea mai o ia mai Ierusalema fa‘atasi ma le tāfeaga na tāfea fa‘atasi ma Iekonia le tupu o Iuta, o lē na tāfea e Nepukanesa le tupu o Papelonia.
7 ‘Ua fai o ia ma tamā o Hatesa, o Eseta fo‘i lea, o le afafine o le uso o lona tamā, ‘ina ‘ua leai sona tamā po o sona tinā; o le teine fo‘i ‘ua lālelei lona tino ma ‘ua lālelei ona mata. ‘Ua oti lona tamā ma lona tinā, ‘ona ‘avea ai lea o ia e Moretekai e fai mōna afafine.
8 ‘Ua lagona e ia le ‘upu a le tupu ma lana tulafono, ma ‘ua fa‘apotopotoina ai teine e to‘atele i Susana le maota ‘iā Hege, ‘ona ‘avea ai lea o Eseta i le fale o le tupu ‘iā Hege, lē tausi i fafine.
9 ‘Ua lelei le teine i lona manatu, ‘ua alofaina o ia e ia; ‘ona ia vave tu‘uina atu ai lea ‘iā te ia ana mea e fa‘amamāina a‘i, ‘atoa ma mea na tofia māna, ma teine e to‘afitu ē na filifilia mai le ‘āiga o le tupu e tu‘uina atu ‘iā te ia; ‘ua ia tu‘u atu fo‘i ‘iā te ia ma lona galu teine i le mea sili i le fale o fafine.