1 ‘Ua mavae ia mea, ‘ona fa‘asili lea e le tupu o Asueru ‘iā Hamanu le atali‘i o Hametatu o lo sa Akakō ma na fa‘aeaina o ia ma fa‘asili lona nofoa i ali‘i uma ‘ua fa‘atasi ma ia.
2 ‘Ona punou lea ma ifo atu ‘iā Hamanu o ‘au‘auna uma a le tupu, o ē na i ai i le faitoto‘a o le tupu; auā na fa‘apea ‘ona poloa‘i atu e le tupu ‘ia faia ‘iā te ia; ‘ae le‘i punou Moretekai, e le‘i ifo fo‘i.
3 ‘Ona fai atu lea o ‘au‘auna a le tupu, ē na i ai i le faitoto‘a o le tupu, ‘iā Moretekai, “Se a le mea ‘ua e soli ai le poloa‘iga a le tupu?”
4 ‘Ua latou fai atu ‘iā te ia i lea aso ma lea aso, ‘ae le‘i fa‘alogo o ia ‘iā te i latou; ‘ona latou ta‘u atu ai lea ‘iā Hamanu, ‘ia latou iloa pe tu le mea a Moretekai; auā ‘ua ia fa‘ailoa atu ‘iā te i latou, o ia o lo sa Iutā.
5 ‘Ua iloa e Hamanu ‘ua lē punou Moretekai, ‘ua lē ifo fo‘i ‘iā te ia; ‘ona matuā ita ai lea o Hamanu.
6 Na ‘ino‘ino o ia e fa‘ao‘o lona lima ‘iā Moretekai tau o ia; auā ‘ua latou fa‘ailoa atu ‘iā te ia le nu‘u o Moretekai; lona mana‘o lea o Hamanu e fa‘aumatia sa Iutā uma lava, le nu‘u o Moretekai, ē na i ai i le mālō uma o Asueru.
7 O le masina muamua, o le masina lea o Nisani, o le sefulu ma le lua o tausaga o le tupu o Asueru, na fai ai le “Puro,” o le vili lea, i luma o Hamanu i lea aso ma lea aso, i lea masina fo‘i ma lea masina, e o‘o i le masina e sefulu ma le lua, o le masina lea o Atara.