18 ‘Ona alu atu lea o Hamanu i lenā aso ma le ‘oli‘oli ma le loto fiafia; a ‘ua va‘ai atu Hamanu ‘iā Moretekai i le faitoto‘a o le tupu, ‘ua lē tula‘i, ‘ua lē fa‘aaloalo fo‘i ‘iā te ia, ‘ona tele ai lea o le ita o Hamanu ‘iā Moretekai.
19 A ‘ua ‘o‘ono Hamanu; ‘ua alu atu fo‘i i lona fale ma na ‘a‘auina atu nisi e ‘amia ana uō, ma Seresa lana avā.
20 ‘Ona fa‘amatalaina atu lea e Hamanu ‘iā te i latou o le mamalu o lona tamao‘āiga, ma le to‘atele o ana fānau, ma mea uma ‘ua fa‘asilisiliina ai o ia e le tupu, ma ‘ona ‘ua fa‘aeaina ai o ia ‘ia sili i ali‘i ma ‘au‘auna a le tupu.
21 ‘Ua fai atu fo‘i Hamanu, “Sa mafai fo‘i le masiofo o Eseta ‘ona alu atu se isi fa‘atasi ma le tupu i le taumafataga na ia saunia, na o a‘u lava. ‘Ua fai mai fo‘i ‘iā te a‘u e alu ‘iā te ia a taeao fa‘atasi ma le tupu.
22 ‘Ae peita‘i e lē aogā lava ‘iā te a‘u o ia mea uma i aso uma ‘ou te va‘ai atu ai ‘iā Moretekai o lo sa Iutā o lo‘o nofo i le faitoto‘a o le tupu.”
23 ‘Ona fai atu ai lea ‘iā te ia o Seresa lana avā, ma ana uō uma, “‘Ia saunia se la‘au, ‘ia limagafulu kupita lona maualuga, ma ‘ia e fai atu i le tupu i le taeao, ‘ia fa‘atautauina ai Moretekai; ‘ona e alu ai lea ma le fiafia fa‘atasi ma le tupu i le taumafataga.”‘Ua lelei lenā ‘upu ‘iā Hamanu; ‘ona ia faia lea o le la‘au.