Ioelu

O le To‘asā o le Atua

¹O le afioga a le ALI‘I na o‘o ‘iā Ioelu, le atali‘i o Petuelu: ²‘Outou toeaina e, ‘inā fa‘alogologo mai ia i lenei mea,o ‘outou uma o ē nonofo i le nu‘u, ia ‘outou liliu mai o ‘outou taliga.Pe na i ai le mea nei i ona po o ‘outou,po o ona po o ‘outou tamā? ³‘Ia ‘outou talatala atu ai i la ‘outou fānau;‘ia talatala fo‘i la ‘outou fānau i la latou fānau,ma la latou fānau i se tasi tupulaga. ⁴O mea na tu‘ua e le sē kasama ‘ua ‘aina ia e le sē akerise;o mea na tu‘ua e le sē akerise ‘ua ‘aina ia e le sē aleka;o mea fo‘i na tu‘ua e le sē aleka ‘ua ‘aina ia e le sē kasili. ⁵Ala mai ia ‘outou ‘ua ‘onā ma fētāgisi;‘ia uiō fo‘i ‘outou uma o ē inu uaina,auā tou te lē toe feinu lava i le suāvine. ⁶Auā ‘ua alu a‘e le nu‘u ‘ese i lo‘u lau‘ele‘ele,e malolosi i latou, e lē mafaitaulia lava;o latou nifo o nifo o leona ia,‘ua i ai fo‘i gao peiseaī o gao o se leona tele. ⁷‘Ua fano ‘iā te i latou la‘u vine,‘ua fo‘ea e i latou la‘u mati,‘ua matuā fo‘ea lava e i latou,‘ua lafotūina fo‘i; ‘ua sinasina ai ‘ona la. ⁸‘Ia e tagiauē, e pei o se taupou ‘ua fusia i le ‘ie talatala‘ona o lana tane sa fai a o teine muli o ia. ⁹‘Ua leai ni toe taulaga i mea e ‘ai ma taulaga i mea e inu i le fale o le ALI‘I;‘ua fa‘anoanoa le ‘au ositaulaga o ē ‘au‘auna i le ALI‘I. ¹⁰‘Ua fano le fanua,‘ua fa‘anoanoa le lau‘ele‘ele;auā ‘ua fano le saito;‘ua velasia le uaina,o le a uma le suāu‘u. ¹¹Le ‘au galulue fanua e,‘ia ‘outou mamā ia.O ‘outou o ē teuteu vine,‘ia ‘outou uiō, ‘ona o le saito ma le karite;auā ‘ua māumau le saito o le fanua. ¹²‘Ua mago le vine, ‘ua mamae le mati,o le rimoni ma le pama ma le tapua ma la‘au uma o le vao ‘ua mamago ia.Auā ‘ua mavae atu le fiafia o tagata. ¹³Le ‘au ositaulaga e, ‘ia ‘outou fufusi ‘iā te ‘outou ma fa‘anoanoa.‘Ia uiō ‘outou o ē ‘au‘auna i le fatafaitaulaga.Ō mai ia, ‘ia aoina ‘outou o ‘o‘ofu i le ‘ie talatala,o ‘outou o ē ‘au‘auna i lo‘u Atua;auā ‘ua leai ni toe taulaga i mea e ‘aima taulaga i mea e inu i le fale o lo ‘outou Atua. ¹⁴‘Ia ‘outou ‘atofaina ni aso e anapogi ai;‘ia ‘outou tala‘iina se fa‘apotopotoga,‘ia ‘outou fa‘apotopotoina le ‘au toeaina,‘atoa ma i latou uma e o nonofo i le nu‘u,i le fale o le ALI‘I lo ‘outou Atua;ma ‘ia ‘outou ‘alalaga i le ALI‘I. ¹⁵Auē, le aso e, auā ‘ua latalata mai le aso o le ALI‘I,e o‘o mai e pei o se malaia ai Lē e ona le malosi uma lava. ¹⁶E lē ‘ua fano ‘ea mea e ‘ai i o tatou luma,‘ua ‘ave‘eseina fo‘i le fiafia ma le ‘oli‘oli i le fale o lo tatou Atua? ¹⁷‘Ua pala fatu saito i lalo ifo o ona ‘ele‘ele,‘ua fa‘atafunaina fale saito,‘ua lepetia fale o‘o, auā ‘ua magumagu le saito. ¹⁸‘Ua fētāgisi na‘uā manu vaefā,‘ua puapuagātia lafu povi,auā ‘ua leai ni a latou mea e ai;‘ua fano fo‘i lafu mamoe. ¹⁹Le ALI‘I e, ‘ou te vala‘au ‘iā te oe,auā ‘ua ‘aina e le afi mea e tata‘a ai manu i le vao,‘ua mū i le afi la‘au uma o le vao. ²⁰E fētāgisi fo‘i ‘iā te oe o manu vaefā o le vao;auā ‘ua pepē vaitafe, ‘ua ‘aina fo‘i e le afi mea e tata‘a ai manu i le vao.