1 Fa‘auta, ‘ou te tu‘uina atu la‘u savali, na te sauni le ala i o‘u luma; e fa‘afuase‘i fo‘i ‘ona o‘o mai i lona malumalu o le Ali‘i, o lē ‘ua sā‘ilia e ‘outou, o le Agelu lava lea o le feagaiga, o lē ‘ua ‘outou naunau i ai; fa‘auta, e afio mai lava o ia, ‘ua fetalai mai ai le ALI‘I o ‘au.
2 A o ai sē na te lavā tali i le aso o lona afio mai? O ai fo‘i se na te tula‘i pe a fa‘aalia mai o ia? Auā o ia e tusa ma le afi a lē tunu auro; e tusa fo‘i ma le moli a lē tā‘ofu.
3 E nofo o ia, o le tunu ma fa‘amamā i le ario; na te fa‘amamāina le fānauga a Levi, na te fa‘ate‘a ‘ese fo‘i le ‘ele‘ele ‘iā te i latou e pei o le auro ma le ario; latou te avatu ai i le ALI‘I le taulaga e fai i le amiotonu.
4 ‘Ona malie ai lea i le ALI‘I o le taulaga a Iuta ma Ierusalema, e pei o aso o le vavau, e pei o tausaga anamua.
5 ‘Ou te fa‘alatalata fo‘i ‘iā te ‘outou i le fa‘amasinoga; e vave fo‘i ‘ona fai o a‘u ma molimau i ē fai togafiti fa‘ataulāitu, ma ē mulilulua, ma ē tautō pepelo, ma ē fa‘asauā i le taui o le ‘au‘auna tauia, o le fafine ‘ua oti lana tane, ma le ‘ua mātuaoti, ‘atoa ma ē fa‘api‘oina le fa‘amasinoga o le tagata ‘ese; ‘ua latou le matata‘u fo‘i ‘iā te a‘u, ‘ua fetalai mai ai le ALI‘I o ‘au.
6 Auā o a‘u o le ALI‘I, ‘ou te lē liliu; o le mea lea ‘ua lē fa‘aumatia ai ‘outou le fānauga a Iakopo.
7 Talu mai aso o ‘outou tamā, ‘ua ‘outou tēte‘a ‘ese ai i a‘u tulafono, ma ‘outou le tausiusi i ai. Fo‘i mai ia ‘iā te a‘u, ‘ona ‘ou fo‘i atu lea ‘iā te ‘outou, ‘ua fetalai mai ai le ALI‘I o ‘au. A ‘ua ‘outou fai mai, “Matou te fo‘i atu ma ni a?”
8 Pe faoa e le tagata mea a le Atua? a o ‘outou, ‘ua ‘outou faoa a‘u mea. A ‘ua ‘outou fai mai, “Ni a ‘ea au mea ‘ua matou faoa?” ‘Ua ‘outou faoa mea e sefulua‘i a ‘outou mea, ‘atoa ma taulaga.
9 ‘Ua matuā fa‘afanoina ‘outou, o le nu‘u uma lava, auā ‘ua ‘outou faoa a‘u mea.
10 ‘Inā ‘aumaia mea e sefulua‘i a ‘outou mea uma lava i le fale e tu‘u ai mea; ‘ina ‘ia i ai mea e ‘ai i lo‘u fale; ma ‘ia ‘outou tofotofo mai ai ‘iā te a‘u i lenei mea, ‘ua fetalai mai ai le ALI‘I o ‘au; pe ‘ou te lē tōina pupuni o le lagi mo ‘outou ma sasa‘a atu le manuia mo ‘outou, ‘ina se‘ia silisili ‘ona tele.
11 ‘Ou te a‘oa‘i atu, ‘ona o ‘outou, le na te ‘aina mea; na te lē fa‘aumatia le fua o lo ‘outou lau‘ele‘ele; e fua mai fo‘i le vine i o ‘outou fanua, ‘ua fetalai mai ai le ALI‘I o ‘au.
12 E fa‘a‘amu‘ia fo‘i ‘iā te ‘outou o nu‘u uma lava; auā e fai ‘outou ma nu‘u e mo‘omia, ‘ua fetalai mai ai le ALI‘I o ‘au.
13 ‘Ua mamafa a ‘outou ‘upu ‘iā te a‘u, ‘ua fetalai mai ai le ALI‘I; a ‘ua ‘outou fai mai, “Se a sa matou ‘upu ‘ua fai atu ai ‘iā te oe?”
14 ‘Ua ‘outou fai ane, “E lē aogā ‘ona ‘au‘auna i le Atua; se a fo‘i se mea ‘ua maua ‘ina ‘ua tatou tausiusi i ana sauniga ma tatou feoa‘i ma ‘ofu ‘ele‘elea i luma o le ALI‘I o ‘au?
15 O lenei, ‘ua tatou fa‘a‘amu‘ia i ē fa‘amaualuluga; ‘ua atiina a‘e fo‘i e ‘ua fai amio leaga; ‘ua latou tofotofo lava i le Atua, ‘ae sao i latou.”
16 ‘Ona fetautalatala‘i lea ē na matata‘u i le ALI‘I; ‘ua liliu mai fo‘i e le ALI‘I ona fofoga ma ‘ua fa‘afofoga mai; ‘ona tusia lea o le tusi e fa‘amanatu i ona luma, mo ē matata‘u i le ALI‘I, ma mafaufau i lona suafa.
17 E fai fo‘i i latou ma a‘u ‘oloa tāua, ‘ua fetalai mai ai le ALI‘I o ‘au, i le aso ‘ua ‘ou tofia; ‘ou te alofa fo‘i ‘iā te i latou, e pei ‘ona alofa o le tagata i lona atali‘i ‘ua ‘au‘auna ‘iā te ia.
18 ‘Ona ‘outou toe iloa lea e ‘ese‘ese le amiotonu ma le amio leaga; e ‘ese lē ‘ua ‘au‘auna i le Atua, ma lē ‘ua lē ‘au‘auna ‘iā te ia.