1 Auā fa‘auta, o le a o‘o mai le aso e mū ai pei se umu; ‘ona fai ai lea ma tagutugutu o saito o ē fa‘amaualuluga uma, ‘atoa ma ē fai amio leaga uma; e susunuina fo‘i i latou i le aso o le a o‘o mai, ‘ua fetalai mai ai le ALI‘I o ‘au; e le fa‘atoeina ai mo i latou se a‘a po o se la la‘au.
2 A o ‘outou o ē matata‘u i lo‘u igoa, e alu a‘e ‘iā te ‘outou le Lā o le amiotonu; e i ai fo‘i le mea e mālōlō ai i ona ‘apa‘au; e ō atu fo‘i ‘outou ma osooso pei o tama‘i povi mai le fale povi.
3 ‘Ona ‘outou solia lea o ē amio leaga; auā e fai i latou ma efuefu i lalo o ‘outou alofivae i le aso ‘ua ‘ou tofia, ‘ua fetalai mai ai le ALI‘I o ‘au.
4 ‘Ia ‘outou mānatunatu i le tulafono a Mose la‘u ‘au‘auna, na ‘ou poloa‘i atu ai ‘iā te ia i Horepa ‘iā Isaraelu uma o tulafono ma fa‘amasinoga.
5 Fa‘auta, ‘ou te ‘auina atu ‘iā te ‘outou o Elia le perofeta, a o le‘i o‘o mai le aso o le ALI‘I e sili ma le mata‘utia.
6 Na te fa‘aliliuina loto o mātua i fānau ma loto o fānau i o latou mātua; ne‘i ‘ou alu atu ma ‘ou taia le nu‘u i le fa‘afanoga.#