1 Prandaj, o vëllezër të shenjtë, pjesëtarë të thirrjes qiellore, vështroni me kujdes Jezuin, të dërguarin e Perëndisë dhe kryepriftin e besimit që shpallim.
2 Ai ishte besnik ndaj atij që e bëri kryeprift, ashtu siç ishte edhe Moisiu në tërë shtëpinë e Perëndisë.
3 Por Jezui u çmua i denjë për lavdi më të madhe se Moisiu, sepse ai që ndërton shtëpinë nderohet më shumë se shtëpia vetë.
4 Çdo shtëpi ndërtohet nga dikush, ndërsa ai që ka ndërtuar gjithçka është Perëndia.
5 Moisiu ishte besnik në tërë shtëpinë e Perëndisë, por si shërbëtor dhe për të dëshmuar gjithçka që do t’i thoshte Perëndia.
6 Ndërsa Krishti ishte si biri në shtëpinë e vet, shtëpi e cila jemi ne, nëse ruajmë guximin dhe shpresën me të cilën mburremi.
7 Sikurse thotë Shpirti i Shenjtë: Sot, nëse e dëgjoni zërin e tij,
8 mos i ngurtësoni zemrat tuaja si në ditën e rebelimit gjatë tundimit në shkretëtirë,
9 ku etërit tuaj më tunduan dhe më vunë në provë, ndonëse i kishin parë veprat e mia
10 për dyzet vjet. Prandaj unë u zemërova me atë brezni dhe thashë: Gjithmonë mashtrohet zemra e tyre dhe ata nuk i njohën udhët e mia.
11 Dhe kështu në zemërimin tim u betova: Nuk do të hyjnë kurrë në prehjen time.
12 Kini kujdes, vëllezër, se mos ndonjëri prej jush ka zemër të ligë e mosbesuese dhe kështu largohet nga Perëndia i gjallë.
13 Por nxisni njëri-tjetrin çdo ditë për sa kohë të jetë ‘sot’, që të mos ngurtësohet ndonjë prej jush nga mashtrimi i mëkatit.
14 Ne bëhemi pjesëtarë të Krishtit vetëm nëse e ruajmë të sigurt deri në fund besimin dhe bindjen e fillimit.
15 Thuhet qartë: Sot, nëse e dëgjoni zërin e tij, mos i ngurtësoni zemrat tuaja si në ditën e rebelimit gjatë provës në shkretëtirë.
16 Kush ishin ata që dëgjuan dhe u rebeluan? A nuk ishin të gjithë ata që dolën nga Egjipti me Moisiun?
17 Kush ishin ata me të cilët u zemërua për dyzet vjet? A nuk ishin ata që mëkatuan dhe lanë kockat nëpër shkretëtirë?
18 Për cilët u betua se nuk do të hyjnë në prehjen e tij? A nuk u betua për ata që nuk u bindën?
19 Ne shohim se ata nuk mundën të hynin për shkak të mosbesimit.