1 «Vëllezër dhe etër, dëgjoni mbrojtjen time».
2 Kur dëgjuan se po u fliste hebraisht, u bë qetësi edhe më e madhe. Atëherë ai tha:
3 «Unë jam jude. Kam lindur në Tars të Kilikisë dhe jam rritur këtu në Jerusalem. Kam pasur si mësues Gamalielin dhe jam edukuar pikë për pikë sipas ligjit të etërve tanë, me zell për Perëndinë, sikurse jeni të gjithë ju sot.
4 Unë i kam përndjekur deri për vdekje ata që i përkasin Udhës së Zotit Jezu. Kam lidhur burra e gra dhe i kam futur në burg.
5 Për mua mund të dëshmojnë kryeprifti dhe tërë pleqësia. Ata më dhanë edhe letra për vëllezërit judenj në Damask, që më ngarkonin për t’i lidhur ata që ishin atje e për t’i sjellë në Jerusalem që të ndëshkoheshin.»
6 «Kur isha rrugës për në Damask, teksa po i afrohesha qytetit, rreth mesditës, shndriti nga qielli një dritë e fortë rreth meje.
7 Unë rashë përtokë dhe dëgjova një zë që më tha: “Saul, Saul, përse më përndjek?”.
8 Unë u përgjigja: “Kush je ti, o Zot?”.Ai më tha: “Unë jam Jezui i Nazaretit, që ti po e përndjek.”
9 Ata që ishin me mua e panë dritën, por nuk e dëgjuan zërin e atij që po më fliste.
10 Unë pyeta: “Zot, çfarë duhet të bëj?”.Zoti më tha: “Ngrihu e shko në Damask. Atje do të të thonë gjithçka që të është caktuar të bësh.”
11 Meqë nuk mund të shihja për shkak të shkëlqimit të asaj drite, ata që ishin me mua më morën për dore e më çuan në Damask.
12 Një burrë me emrin Hanani, njeri i përkushtuar ndaj ligjit të Moisiut e për të cilin judenjtë që jetonin aty flisnin mirë,
13 erdhi tek unë, qëndroi përbri meje e tha: “Vëlla Saul, shih përsëri.”Në atë çast m’u hapën sytë dhe e pashë.
14 Atëherë ai tha: “Perëndia i etërve tanë të ka zgjedhur që të njohësh vullnetin e tij, që të shohësh të Drejtin e të dëgjosh zërin e tij.
15 Ti do të jesh dëshmitar i tij para të gjithë njerëzve, dëshmitar i asaj që ke parë e ke dëgjuar.
16 Dhe tani ç’pret? Ngrihu, pagëzohu e pastrohu nga mëkatet duke thirrur emrin e Zotit”».
17 «Pasi u ktheva në Jerusalem, ndërsa po lutesha në tempull, pata një vegim
18 dhe pashë Jezuin që më tha: “Nxito e largohu shpejt nga Jerusalemi, se ata nuk do ta pranojnë dëshminë tënde për mua.”
19 Dhe unë thashë: “Zot, ata e dinë se në çdo sinagogë unë kam futur në burg dhe kam rrahur ata që besuan në ty.
20 Edhe kur u derdh gjaku i dëshmorit tënd Stefanit, unë isha aty, e miratova vrasjen e tij dhe ruaja rrobat e atyre që po e vrisnin.”
21 Atëherë Zoti më tha: “Shko, se do të të dërgoj larg, te kombet pagane”».
22 Deri këtu turma e dëgjoi, por pastaj bërtitën me zë të lartë: «Zhdukeni nga dheu këtë njeri. Ai nuk e meriton të jetojë».
23 Turma bërtiste, hidhte rrobat lart e ngrinte pluhur në ajër.
24 Atëherë komandanti i kohortës urdhëroi ta çonin Palin në fortesë dhe u tha ta marrin në pyetje duke e fshikulluar, që të gjenin arsyen pse judenjtë bërtisnin kështu kundër tij.
25 Por, pasi e lidhën me rrobat e tij, Pali i tha centurionit që rrinte pranë: «A ju lejohet të fshikulloni një qytetar romak pa i bërë gjyqin?».
26 Kur e dëgjoi këtë, centurioni shkoi te komandanti i kohortës dhe i tha: «Kujdes se çfarë po bën! Ky njeri është qytetar romak».
27 Komandanti erdhi dhe e pyeti Palin: «Më thuaj, a je romak?».Pali i tha: «Po».
28 Komandanti u përgjigj: «Mua më ka kushtuar shumë para që ta merrja qytetarinë romake».Pali i tha: «Ndërsa unë kam lindur i tillë».
29 Ata që do ta merrnin në pyetje u larguan menjëherë prej tij. Edhe komandantit të kohortës i hyri frika kur mori vesh se Pali ishte qytetar romak, sepse e kishte lidhur.
30 Ai donte të dinte me saktësi arsyen se përse po e padisnin judenjtë Palin, prandaj të nesërmen e liroi dhe urdhëroi kryepriftërinjtë e mbarë sinedrin që të mblidheshin. Pastaj solli edhe Palin dhe e nxori para tyre.