Baheberu

¹Hobane molao erekaha o ne o na le seriti feela sa menono e tlang ho hlaha, e seng sebele sa dintho, o sitilwe ruri ho phethisa barapedi ka mahlabelo a hlahiswang ka selemo se seng le se seng. ²Hola ha ho jwalo, ha ke re, a ka be a lesitswe ho hlahiswa, hobane barapedi, ha ba se ba hlatswehile, ba ne ba ke ke ba hlola ba sa na le letswalo la dibe? ³Empa mahlabelong ao ho boetse ha hopolwa dibe ka selemo se seng le se seng. ⁴Hobane madi a dipoho le a diphooko a sitwa ruri ho tlosa dibe. ⁵Ka baka leo, mohla a tla tla lefatsheng, o itse: Ha o a ka wa rata sehlabelo, leha e le nyehelo, empa o ntokiseditse mmele. ⁶Ha o a ka wa kgahliswa ke ditjheso le ke mahlabelo a etswang ka baka la sebe. ⁷Jwale ka re: Bona, Modimo, ke tlile ho etsa thato ya hao; jwalokaha ho ngodilwe taba tsa ka bukeng. ⁸Ha a setse a boletse pele, a re: Ha o a ka wa rata sehlabelo, le nyehelo, le ditjheso, le mahlabelo a etswang ka baka la sebe, mme ha o a ka wa kgahliswa ke tsona — athe ke tsona ntho tse hlahiswang ka molao — ⁹ke moo a itseng: Bona, Modimo, ke tlile ho etsa thato ya hao. Ha a rialo, o fedisa sa pele, mme o hloma sa bobedi. ¹⁰Ke ka yona thato eo re halaleditsweng ka sehlabelo sa mmele wa Jesu Kreste se entsweng hang. ¹¹Haele moprista e mong le e mong, o ntse a ema ka matsatsi wohle ho sebeletsa Modimo, mme o hlahisa hangata mahlabelo a le mang, a sa tsebeng le hanyenyane ho tlose dibe. ¹²Empa yena, hobane a hlahise sehlabelo se le seng ka baka la dibe, o ituletse ka ho sa feleng letsohong le letona la Modimo, ¹³a lebeletse ho sa ntseng ho tla etsahala, e leng hore bao e leng dira ho yena ba bewe bonamelo ba maoto a hae. ¹⁴Hobane ka sehlabelo se le seng o phethisitse ka ho sa feleng bao a ba halaleditseng. ¹⁵Ke seo Moya o Halalelang le wona o re pakelang sona; hobane ha o se o boletse ka ho re: ¹⁶Selekane ke sena seo ke tla se etsa le bona kamora ditshiu tseo, ho rialo Morena; ke tla kenya melao ya ka dipelong tsa bona, ke e ngole dikelellong tsa bona, o eketsa o re: ¹⁷Ha nka ke ka hlola ke sa hopola dibe tsa bona le ditlolo tsa bona. ¹⁸Efela moo teselo ya dibe e leng teng, ha ho sa batlwa sehlabelo ka baka la dibe.

Badumedi ba kgothatswa ho tiisetsa tshepong le tumelong ya bona.

¹⁹Ka baka leo, banabeso, erekaha re neilwe sebaka sa ho kena sehalalelong, re se na tshabo, ka madi a Jesu. ²⁰e leng tsela e ntjha e isang bophelong, eo a re hleketseng yona, e phunyang lesira, ke ho re, nama ya hae; ²¹mme erekaha re ena le moprista wa rona e moholo, ya beilweng tlung ya Modimo, ²²a re atameleng ho wona ka pelo ya nnete, ka tumelo e nang le tshepo ya sebele, matswalo a mabe a phekotswe dipelong tsa rona, mme mmele ya rona e hlatswitswe ka metsi a hlwekileng. ²³A re tiiseng kano ya tumelo ya rona, re se na ho sisinyeha; hobane ya re tshepisitseng o a tshepeha. ²⁴A re lebelaneng, re tle re isane ka tjheseho leratong le mesebetsing e metle. ²⁵Re se ke ra ngala diphutheho tsa rona, kamoo e leng mokgwa wa ba bang kateng; re mpe re kgothatsane, haholo etswe le bona letsatsi le ntse le atamela. ²⁶Hobane ekare ha re etsa sebe ka boomo, ha re se re filwe tsebo ya nnete, ha ho sa le sehlabelo se seng sa dibe; ²⁷e se e mpa e le tebello e tshabehang ya kahlolo, le bohale ba mollo o tlang ho ja bahanyetsi. ²⁸Ya neng a nyedisa molao wa Moshe, o ne a bolawa, ho se mohau ka polelo ya dipaki tse pedi, leha di le tharo; ²⁹ha le bona, eo e leng ya hataketseng Mora Modimo ka maoto, ya entseng madi a selekane ao a hlatswitsweng ka wona ntho feela, ya nyefotseng Moya wa mohau, yena ho tla lekanngwa hoba o tshwanelwa ke kotlo e fetisang hakakang! ³⁰Etswe re tseba ya itseng: Phetetso ke ya ka, ke tla ipheteletsa e le nna, ho itswalo ke Morena. Mme hape ho itswe: Morena o tla ahlola setjhaba sa hae. ³¹Ke ntho e tshabehang ho wela matsohong a Modimo o phelang. ³²Le nne le hopole mehla ya pele, eo eitseng hobane le bonesetswe, la hla la mamella ntwa e kgolo ya bohloko. ³³Ka nqa e nngwe, la hoboswa pepeneneng ka mahlapa le ka dihloriso, mme ka nqa e nngwe la ba balekane ba ba etswang tse jwalo. ³⁴Hobane le kile la hlomohela ba ditlamong, mme le dumetse ka thabo ha ntho tsa lona di tlatlapuwa, la itsebela hobane le na le moruo o fetisang, o sa tloheng. ³⁵Ka baka leo, le se ke la lahla tshepo ya lona, e nang le moputso o moholo. ³⁶Hobane le tshwanetse ho ba le mamello, le tle le etse thato ya Modimo, le tle le ntoo kotula tseo le di tshepisitsweng. ³⁷Hobane ho se ho se hokae, mme ya tlang ho tla o tla hlaha; a ke ke a dieha. ³⁸Mme ya lokileng o tla phela ke tumelo; empa ekare ha a kweneha, moya wa ka ha o kgahliswe ke yena. ³⁹Haele rona, ha re batho ba kwenehang ho ya timela; empa re ba tiisang tumelo ho pholosa meya ya rona.