Baheberu

⁸Mme mona, ba nkang karolo ya leshome, ke batho ba shwang; empa mono, ya e nkileng, ke eo ho bolelwang hore o a phela. ⁹Mme ho ka thwe, esita le yena Levi, ya nkang karolo ya leshome, o ntshisitswe yona ka Abrahama; ¹⁰kahobane o ne a sa le lethekeng la ntatae moholo, Abrahama, mohla Melkisedeke a mo kgahlanyeditseng. ¹¹Jwale, hojane phetheho e ne e setse e hlahile ka boprista ba Levi — athe molao o neilweng setjhaba o theilwe hodima jona — ana tshwanelo e ne e sa le efe ya hoba ho ka hlaha moprista e mong ya bitswang ka mokgwa wa Melkisedeke, e seng ka mokgwa wa Aarone? ¹²Hobane boprista ha bo fetohile, molao le wona e ka kgona o fetohe. ¹³Mme efela ya lekanngwang ka taba tseo ke wa leloko lesele le sa kang la eba le motho ya sebetsang aletareng; ¹⁴hobane ho tsejwa hoba Morena wa rona o hlahile lelokong la Juda, e leng leo Moshe a sa kang a le abela boprista.