1 Banabeso, takatso ya pelo ya ka, le thapello eo ke e etsetsang Baiseraele ho Modimo, ke hore ba bolokehe.
2 Hobane ke paki ya bona, ya hore ba na le tjheseho ho Modimo, empa e seng ka kelello.
3 Hobane ka baka la ho se tsebe ho loka ha Modimo, le ka baka la ho hloma ho loka hoo e leng ha bona, ha ba ka ba ipea tlasa ho loka ha Modimo;
4 hobane Kreste ke phetho ya molao, ho bea ya lokileng mang le mang ya dumelang.
5 Hobane Moshe o lekantse ho loka ho tswang molaong ka ho re: Motho ya etsang ntho tseo, o tla phela ke tsona.
6 Empa ho loka ho tswang tumelong ho bolela, ho re: O se ke wa re pelong ya hao: Ke mang ya tla nyolohela lehodimong? Ho rialo, ke ho theola Kreste teng;
7 kapa: Ke mang ya tla theohela mokoting? Ho rialo, ke ho nyolla Kreste bafung.
8 Empa ho reng? Ho re: Polelo e haufi le wena, e molomong wa hao, e ka pelong ya hao; ke yona polelo ya tumelo eo re le bolellang yona,
9 e reng: Ekare ha o bolela ka molomo wa hao hobane Jesu ke Morena, mme o dumela pelong ya hao hobane Modimo o mo tsositse bafung, o tla bolokeha.
10 Hobane motho o dumela ka pelo, hore a bewe ya lokileng, mme o bolela ka molomo, hore a bolokehe.
11 Hobane Lengolo le re: Mang le mang ya dumelang ho yena ha a ka ke a swaba.
12 Hobane moo ha ho kgethwe Mojuda le Mogerike, kahobane Morena wa bohle o mong, ya ruetseng ho sitsa bohle ba bitsang ho yena.
13 Hobane mang le mang ya rapelang lebitso la Morena, o tla bolokeha.
14 Empa ba tla rapela jwang eo ba sa kang ba dumela ho yena? Mme ba tla dumela jwang ho eo ba sa kang ba utlwa ditaba tsa hae? Mme ba tla utlwa jwang, ha mmoledi a le siyo?
15 Mme ba tla bolela jwang, ha ba sa rongwe? Jwalokaha ho ngodilwe, ho thwe: Maoto a ba bolelang Evangeli ya kgotso a matle hakakang, maoto a ba bolelang Evangeli ya taba tse molemo!
16 Empa hase bohle ba mametseng Evangeli; jwalokaha Esaia a itse: Morena, ke mang ya dumetseng polelo ya rona?
17 Tumelo e fela e tla ka ho utlwa, mme kutlo e tla ka polelo ya Modimo.
18 Empa ke re: Hleka ha ba ka ba e utlwa na! E, ba e utlwile. Tumo ya bona e ile ka lefatsheng lohle, mme dipolelo tsa bona di utlwahetse ho fihlela dipheletsong tsa lefatshe.
19 Empa ke re: Na Iseraele ha a ka a tseba na? Moshe o qadile, a re: Ke tla le etsa mona ka setjhaba seo e seng sona; ke tla le halefisa ka setjhaba se se nang kelello.
20 Mme Esaia o buile phatlalatsa haholo, ka ho re: Ke fumanwe ke ba neng ba sa mpatle; ke ipontshitse ho bao ke neng ke sa botswe ke bona.
21 Empa ha a lekanya Iseraele, o re: Ke otlolotse matsoho a ka ka tsatsi lohle, ho bitsa setjhaba se sa utlweng, se hanyetsang.