Baroma

¹Ha ho le jwalo, seo Mojuda a fetisang ba bang ka sona keng? kapa molemo wa lebollo ke ofe? ²O moholo ka nqa tsohle, haholo kahobane dipolelo tsa Modimo di tshepetswe bona. ³Hleka leha ba bang ho bona ba sa ka ba dumela, ho se dumele ha bona ho ka fosisa ho tshepeha ha Modimo na? ⁴Ho se be jwalo! Nnete e be ya Modimo, mme batho bohle ba be leshano, jwalokaha ho ngodilwe, ho thwe: O tle o fumanwe o lokile dipolelong tsa hao, mme o tle o hlole mohla o ahlolwang. ⁵Mme ha ho se loke ha rona ho bonahatsa ho loka ha Modimo, re tla reng moo? Na Modimo o kgopo ha o etsa ka kgalefo na? ⁶(Ke bolela ka mokgwa wa batho.) Ho se ke ha thualo! Hobane hojane ho le jwalo, na Modimo o bo o tla ahlola lefatshe jwang? ⁷Empa ekare ha nnete ya Modimo e bonahatswa ka leshano la ka, mme kganya ya wona e hodiswa ke hona, nna ke sa tswelwang jwaloka hoja ke le moetsadibe? ⁸Mme ha re etse keng bobe, botle bo tle bo hlahe? Kamoo re ntseng re etselletswa kateng, ke ba bang, ha ba bolela hore re rialo. Tsuo ya bao e lokile. ⁹Mme jwale, keng? Hleka re fetisa baditjhaba na? Tjhe, le hanyenyane; hobane re se re bontshitse pele hore bohle, leha e le Bajuda, leha e le Bagerike, ba sebeng, ¹⁰jwalokaha ho ngodilwe, ho thwe: Ha ho ya lokileng, leha a le mong; ¹¹ha ho ya nang le kutlwisiso, ha ho ya batlang Modimo; ¹²bohle ba kgelohile, bohle hammoho ba ikentse ntho ya lefeela; ha ho ya etsang botle, leha a le mong; ¹³mmetso ya bona ke lebitla le ahlamileng; ba thetsa ka maleme a bona; mahloko a marabe a katlasa melomo ya bona; ¹⁴hanong ho bona ho tletse dihlapa le ho baba; ¹⁵maoto a bona a lebelo ho ya tsholla madi; ¹⁶tshenyo le bosenyehi bo ditseleng tsa bona; ¹⁷ha ba tsebe tsela ya kgotso; ¹⁸ho tshaba Modimo ha ho yo pela mahlo a bona. ¹⁹Jwale, re tseba hobane tsohle tse bolelwang ke molao, di bolellwa ba molaong; hore melomo yohle e tle e thijwe, mme batho bohle ba be molato pela Modimo. ²⁰Ka baka leo, ha ho nama, leha e le nngwe, e tlang ho bewa e lokileng pela wona ke mesebetsi ya molao; hobane ke ka molao re nang le tsebo ya sebe.

Motho o bewa ya lokileng ka ho dumela ho Jesu Kreste.

²¹Empa jwale, ho loka ha Modimo ho hlahile, e seng ka molao, ho ntse ho pakwa ke molao le baporofeta; ²²e leng ho loka ha Modimo ho bonwang ka tumelo ho Jesu Kreste, ho bang ho bohle, le hodima bohle ba dumelang; hobane ha ho hosele moo; ²³hobane bohle ba sitilwe, mme ha ba tshwanelwe ke kganya ya Modimo. ²⁴Ba mpa ba bewa ba lokileng ke mohau wa wona feela, ka topollo e leng ho Jesu Kreste; ²⁵eo Modimo o mmeileng esale pele hore e be pheko ho ba dumelang mading a hae, o tle o bonahatse ho loka ha wona, kamoo Modimo o neng o lesitse dibe tsa pele kateng, mehleng ya boiphapanyo ba wona. ²⁶Ebile hore o bonahatse ho loka ha wona mehleng ya jwale, hore e tle e be o lokileng le o beang ya nang le tumelo ho Jesu ya lokileng. ²⁷Jwale, sebaka sa ho ithorisa se kae? Ha se yo. Ka molao ofe? A ke ka wa mosebetsi na? Tjhe; empa e le ka molao wa tumelo. ²⁸Ha ho le jwalo, re kgolwa hore motho o bewa ya lokileng ka tumelo, kantle ho mesebetsi ya molao. ²⁹Na Modimo ke Modimo wa Bajuda ba nnotshi na? Na hase le wa baditjhaba na? E, ke wa baditjhaba le bona. ³⁰Hobane Modimo o mong feela, o tlang ho bea ba lebollo ba lokileng ka tumelo, le bona ba sa bollang ka tumelo. ³¹Hleka jwale re fedisa molao ka tumelo na? Ho se ke ha thualo; re mpa re tiisa molao.