1 Hape, banabeso, ke le hopotsa Evangeli eo ke seng ke le boleletse yona, eo le e amohetseng, eo le tiisetsang ho yona,
2 eo le pholohang ka yona, ha le ka e boloka kamoo ke le boleletseng yona kateng, haeba le sa ka la dumela feela.
3 Hobane pele ho ntho tsohle, ke le neile seo le nna ke se amohetseng, ke ho re, Kreste o shwele ka baka la dibe tsa rona, kamoo Mangolo a bolelang kateng;
4 mme o kile a patwa, a ba a tsoha ka letsatsi la boraro, kamoo Mangolo a bolelang kateng.
5 O kile a bonwa ke Kefase, hamorao ke ba leshome le metso e mmedi.
6 Hamorao a bonwa ka nako e le nngwe ke baena ba fetisang makgolo a mahlano; ba bangata ho bona ba sa le teng, mme ba bang ba se ba shwele.
7 A ntoo bonwa ke Jakobo; ka mohla o mong a bonwa ke baapostola bohle.
8 Mme kamorao ho bohle, a bonwa le ke nna ke leng jwaloka sefolotsana;
9 hobane ke e monyenyane ho baapostola, mme ha ke a lokela ho bitswa moapostola, kahobane ke hlorisitse kereke ya Modimo.
10 Empa ke ka mohau wa Modimo ke leng seo ke leng sona; mme mohau wa wona ho nna ha o a ka wa eba lefeela; empa, ke ba fetisitse bohle hole ka ho sebetsa; empa e seng nna, e leng mohau wa Modimo o ho nna.
11 Mme leha e le nna, leha e le bona, re ruta jwalo, mme le dumetse jwalo.
12 Ekare ha ho rutwa hore Kreste o tsohile bafung, ana ba bang hara lona ba bolela jwang hore tsoho ya bafu e siyo?
13 Hobane ekare ha tsuo ya bafu e le siyo, ekaba Kreste le yena ha a ka a tsoha.
14 Mme ekare ha Kreste a sa ka a tsoha, thuto ya rona ke lefeela, le tumelo ya lona ke lefeela.
15 Hape, re ka fihlelwa re le dipaki tsa leshano tsa Modimo; hobane ekaba re paketse Modimo ka bopaki ba rona, ka ho re o tsositse Kreste, athe ekaba he ha o a ka wa mo tsosa, ha bafu ba fela ba sa tsohe.
16 Hobane ekare ha bafu ba sa tsohe, ekaba Kreste le yena ha a ka a tsoha.
17 Mme ekare ha Kreste a sa ka a tsoha, tumelo ya lona ke lefeela, mme le sa le dibeng tsa lona.
18 Ha ho le jwalo, ekaba le ba ithobaletseng ho Kreste ba timetse.
19 Ha re tshepile Kreste bophelong bona feela, re fetisa batho bohle ka soto.
20 Tjhe, empa Kreste o tsohile bafung, mme o beilwe thakangwaha ya ba robetseng.
21 Hobane lefu ha le hlahile ka motho, tsoho ya bafu le yona e hlahile ka motho.
22 Hobane jwalokaha bohle ba eshwa ka Adama, bohle le jwale ba tla boela ba phele ka Kreste.
23 Empa e mong le e mong o tla tsoha nakong eo e leng ya hae; thakangwaha ke Kreste; hamorao ke bao e leng ba Kreste; ba tla tsoha ho tleng ha hae.
24 Hamorao, ho tla tla bofelo, mohla a busetsang mmuso ho Modimo Ntate, mme a fedisang borena bohle, le mebuso yohle, le matla wohle.
25 Hobane e ka kgona a buse, a tle a be a bee dira tsohle katlasa maoto a hae.
26 Sera se tlang ho fediswa moraorao ke lefu.
27 Hobane Modimo o fela o beile tsohle katlasa maoto a hae. Mme ha ho itswe, tsohle di beilwe katlasa hae, ho a utlwahala hobane ya di beileng tsohle katlasa hae, yena ha a balwe.
28 Mme etlare ha tsohle di beilwe katlasa hae, ke hona Mora le yena a tla bewa katlasa ya beileng tsohle katlasa hae, hore Modimo e tle e be tsohle ho bohle.
29 Ha ho se jwalo, ba kolobelletswang bafu ba ya etsa eng? Ha bafu ba fela ba sa tsohe, na ba kolobelletswang bafu?
30 Mme le rona re ipeile dikotsing keng ka dinako tsohle?
31 Ke shwa ka matsatsi wohle; ke omela jwalo ka sebaka sa ho ithorisa seo ke nang le sona ka lona ho Jesu Kreste, Morena wa rona.
32 Ha ke lwanne le dibatana Efese ka phehello ya botho, ke ruileng ka hoo? Ekare ha bafu ba sa tsohe, a re jeng, a re nweng, hobane hosasane re se re ya shwa.
33 Le se ke la lahleha: ditlwaelano tse mpe di bodisa mekgwa e metle.
34 Hlaphohelwang, le se otsele, le phele ka ho loka, le se ke la etsa sebe; hobane ba bang ba hloka tsebo ya Modimo; ke le bolella hoo, e be dihlong ho lona.
35 Empa e mong o tla re: Bafu ba tsoha jwang? Ba tla hlaha ka mmele o jwang?
36 Sethoto ke wena! Seo o se jalang se ke ke sa phela, ha se sa shwe pele.
37 Mme ha o jala, ha o jale mmele o tlang ho hlaha, empa o jala hlaku e hlobotseng, mohlomong e le ya koro, leha e le ya dijalo tse ding.
38 Mme Modimo ke wona o e neang mmele kamoo o ratang kateng, mme o nea hlaku e nngwe le e nngwe mmele wa yona.
39 Nama tsohle hase nama e le nngwe; empa nama ya batho ke esele, le nama ya diphoofolo ke esele, le ya dihlapi ke esele, le ya dinonyana ke esele.
40 Mme mmele ya lehodimo e teng, le mmele ya lefatshe e teng; empa kganya ya ya lehodimo ke esele, le ya ya lefatshe ke esele.
41 Khanya ya letsatsi ke esele, le kganya ya kgwedi ke esele, le kganya ya dinaledi ke esele; hobane naledi e ye e be hosele ho naledi e nngwe ka kganya.
42 Ho tla ba jwalo le tsohong ya bafu. Mmele o jallwa ho boleng, o tla tsohela ho se bole;
43 o jalwa e le ntho e nyatsuwang, o tla tsoha o kganya; o jalwa o fokotse, o tla tsoha o le matla;
44 o jalwa e le mmele wa nama, o tla tsoha e le mmele wa moya. Mmele wa nama o teng, le mmele wa moya o teng.
45 Jwalokaha ho ngodilwe, ho thwe: Motho wa pele, Adama, o entswe moya o phelang, mme Adama wa morao o entswe moya o phedisang.
46 Mme seo e leng sa moya hase sa pele, sa pele ke seo e leng sa nama, mme se latelwa ke seo e leng sa moya.
47 Motho wa pele e ne e le wa lefatshe, o entswe ka mobu, empa motho wa bobedi, e leng Morena, o tswile lehodimong.
48 Mme kamoo wa lefatshe a leng kateng, le ba lefatshe ba jwalo; mme kamoo wa lehodimo a leng kateng, le ba lehodimo ba jwalo.
49 Mme jwalokaha re apere setshwantsho sa wa lefatshe, re tla apara jwalo setshwantsho sa wa lehodimo.
50 Seo ke mpang ke se bolela, banabeso, ke hoba nama le madi di ke ke tsa eja lefa la mmuso wa Modimo, mme ho bola ho ke ke ha eja lefa la ho sa boleng.
51 Bonang, ke le bolella sephiri: ha re ka ke ra robala bohle, empa re tla fetoha bohle,
52 hang, ka ho panya ha leihlo, ka terompeta ya morao; hobane terompeta e tla lla, mme bafu ba tla tsoha, ba se ke ba boela ba bola, mme le rona re tla fetoha.
53 Hobane e ka kgona ho bolang hona ho apare ho sa boleng, le ho shwang hona ho apare ho sa shweng.
54 Mme etlare ha ho bolang hona ho apere ho sa boleng, le ho shwang hona ho apere ho sa shweng, ke moo polelo e ngodilweng e tla phetheha, e itseng: Lefu le metsitswe ke hlolo.
55 Na lefu, tsenene ya hao e kae na? Wena lebitla, ho hlola ha hao ho kae na?
56 Tsenene ya lefu ke sebe, mme matla a sebe ke molao.
57 A re leboheng Modimo o re neileng ho hlola ka Morena wa rona Jesu Kreste!
58 Ka baka leo, banabeso ba ratwang, tiyang matla, le se ke la sisinyeha, mme le nne le eketse kamehla ho sebeletsa Morena, le ntse le tseba hobane mosebetsi wa lona e ke ke ya eba wa lefeela Moreneng.