1 Jwale, haele ka taba tseo le nngoletseng tsona, nka re: Ho ka ba molemo ho monna ha a sa ame mosadi.
2 Empa ka baka la ho tshaba bofebe, monna ka mong a be le mosadi eo e leng wa hae, le mosadi ka mong a be le monna eo e leng wa hae.
3 Monna a nee mosadi seo e leng tshwanelo, le mosadi a etse jwalo ho monna wa hae.
4 Mmele wa mosadi ha o pusong ya hae, o mpa o le pusong ya monna; le mmele wa monna ha o pusong ya hae, o mpa o le pusong ya mosadi.
5 Le se ke la timana, haese ka tumellano, ka nako e itseng, le tle le ineele ho itima dijo le ho rapela; hamorao, le ke le boelane hammoho, Satane a tle a se ke a le leka ka takatso ya lona.
6 Ke rialo ka ho le qenehela, e seng ka taelo.
7 Hobane nka rata ha batho bohle ba ka ba jwaloka nna; empa motho ka mong o na le neo ya hae e mo lokelang, e tswang ho Modimo, e mong ka mokgwa o itseng, e mong ka osele.
8 Haele masoha le basadi ba bahlolohadi, ke re ho bona: Ho ka ba molemo ho bona ho dula jwaloka nna.
9 Empa ekare ha ba sitwa ho itshwara, ba nyale; hobane haele ho nyala, e le ho tjha, ho molemo ke ho nyala.
10 Haele ba seng ba nyetse, ke a ba laela, e seng nna, empa e le Morena, ke re:
11 Mosadi a se ke a hlala monna wa hae — leha mosadi a se a mo hladile, a itulele a se ke a nyalwa; kapa a boelane le monna wa hae — le yena monna a se ke a hlala mosadi wa hae.
12 Haele ba bang, ke a ba bolella, nna, e seng Morena, ke re: Moena e mong, ekare ha a ena le mosadi ya sa dumelang, a se ke a mo hlala, ha mosadi a ratile ho dula le yena.
13 Mme mosadi ya nang le monna ya sa dumelang, ekare ha monna a dumela ho dula le yena, a se ka a mo hlala.
14 Hobane monna ya sa dumelang o halaletswa ho mosadi, le mosadi ya sa dumelang o halaletswa ho monna; hoja ha ho jwalo, ekabeba bana ba lona ke bana ba ditshila, athe jwale ba halalela.
15 Empa ekare ha ya sa dumelang a hlala ya dumetseng, a mo hlale; moena rona wa monna, kapa wa mosadi, ha a tlangwa ditabeng tse jwalo; empa Modimo o re bileditse ho tsa kgotso.
16 Hobane wena mosadi, o tseba kang hobane o tla pholosa monna wa hao na? Le wena monna, o tseba kang hobane o tla pholosa mosadi wa hao na?
17 Empa motho ka mong a tsamaye kamoo Morena a mo abetseng kateng, le kamoo Modimo o mmitsitseng kateng. Ke laela dikereke tsohle jwalo.
18 Motho ha a bitsitswe a bolotse, a se ke a ipusetsa boqaing; motho ha a bitsitswe a eso ho ka a bolla, a se ke a bolla.
19 Lebollo hase letho, le boqai hase letho, empa eo e leng taba ke ho boloka melao ya Modimo.
20 Motho ka mong a ke a dule kabelong eo a neng a le ho yona, mohla a bitswang.
21 Hleka o bitsitswe o le ya ruilweng na? O se ke wa belaela ke hona. Empa ha o ka lokollwa, o mpe o ikgethele hona.
22 Hobane ya bitsitsweng ke Morena e le moruwa, ke molokollwa wa Morena; le yena ya bitsitsweng e le molokollwa, ke moruwa wa Kreste.
23 Le rekilwe ka theko; le se ke la fetoha baruwa ba batho.
24 Banabeso, motho ka mong a dule pela Modimo kabelong eo a neng a le ho yona, mohla a bitswang.
25 Jwale, haele ka taba ya barwetsana, teng ha ke na molao wa Morena; ke mpa ke hlahisa molomo wa ka, kamoo ke leng motho ya hauhetsweng ke Morena kateng, hore ke tshepehe.
26 Ka baka leo, ke lekanya hore ho ka ba molemo ho motho ho itulela jwalokaha a dutse, ka baka la tsietsi ya mehla ena.
27 Ha o tlameletswe ho mosadi, o se ke wa batla tokoloho. Ha o sa ka wa tlamellwa ho mosadi, o se ke wa batla mosadi.
28 Empa ekare ha o nyala, ha o etse sebe; le morwetsana ha a nyalwa, ha a etse sebe; empa ba jwalo ba tla ba le matshwenyeho nameng, mme nna ke a le qenehela.
29 Seo ke se bolelang, banabeso, ke hoba, jwale, nako e kgutshwanyane; e le hore ba nang le basadi ba be jwaloka hoja ba se na bona;
30 ba llang ba be jwaloka hoja ba sa lle; ba thabileng ba be jwaloka hoja ba sa thaba; ba rekang ba be jwaloka hoja ba sa rua letho;
31 le ba itshebeletsang ka tsa lefatshe lena, ba be jwaloka hoja ba sa sebetse ka tsona; hobane mokgwa wa lefatshe lena o a fela.
32 Nka rata hore le hloke pelaelo. Ya sa nyalang o hlokomela tseo e leng tsa Morena, le kamoo a ka kgahlisang Morena kateng.
33 Empa ya nyetseng o hlokomela tsa lefatshe lena, le kamoo a ka kgahlisang mosadi wa hae kateng.
34 Mosadi ya nyetsweng le morwetsana ha ba tshwane. Ya sa nyalwang o hlokomela tsa Morena, a tle a halalele mmeleng le moyeng; empa ya nyetsweng o hlokomela tsa lefatshe lena, le kamoo a ka kgahlisang monna wa hae kateng.
35 Ke rialo ka ho lekanya se ka bang molemo ho lona, e seng ho le tjheha ka leraba; e le hore le mpe le etse ka hlokomelo, mme le sebeletse Morena le sa horeletswe ke letho.
36 Empa ekare ha motho a lekanya hobane e ka ba ntho e dihlong ho moradi wa hae ha a ka feta palesa ya botjha ba hae a eso ho nyalwe, mme a tshwanetse ho nyalwa, a etse seo a se ratang; ha a etse sebe; ha ba ke ba nyalwe.
37 Empa ya tiyang pelong ya hae, ya sa thibelwang ke letho, a mpa a iketsetsa ka ho rata, ya rerileng pelong ya hae hore moradi wa hae o tla dula ho yena, o etsa hantle.
38 Mme jwale, ya nyadisang moradi wa hae, o etsa hantle, mme ya sa mo nyadiseng, o etsa hantle ka ho fetisisa.
39 Mosadi o tlameletswe ho monna wa hae ke molao mehleng yohle eo monna wa hae a phelang ka yona; empa ekare ha monna wa hae a shwele, eba o lokolotswe, a ka nyalana le eo a mo ratang, e mpe e be Moreneng.
40 Leha ho le jwalo, molomo wa ka, ke re: Ha a ka itulela feela, a ka iketla ka ho fetisisa: mme ke lekanya hoba le nna ke na le Moya wa Modimo.