1 Bathesalonika

¹Haele tsa mehla le tsa dinako, banabeso, ha le tshwanele ho di ngollwa. ²Le tswe le tseba hantlentle le lona hoba letsatsi la Morena le tla hlaha jwaloka leshodu la bosiu. ³Hobane mohla ba tla re: Ho kgotso, ho iketlilwe! ke moo tshenyeho e tla ba wela hodimo ka sehloho, jwaloka pelehi ha e hlahela moimana, mme ba ke ke ba phonyoha. ⁴Empa haele lona, banabeso, ha le lefifing hore letsatsi leo le ka le wela ka sehloho jwaloka leshodu. ⁵Bohle le bana ba lesedi, le bana ba motshehare; ha re ba bosiu, leha e le ba lefifi. ⁶Ka baka leo, a re se keng ra robala jwaloka ba bang, re mpe re fadimehe, mme re tshabe botahwa. ⁷Hobane ba robalang, ba ye ba robale bosiu; le ba tahwang, ba ye ba tahwe bosiu. ⁸Empa rona, bao re leng bana ba motshehare, a re tshabeng botahwa, mme re apare tshireletso ya sefuba, e leng tumelo le lerato, mme re rwale heleme ya tshepo ya poloko. ⁹Hobane Modimo ha o a ka wa re beela bohale, empa e le ho re ruisa polokeho ka Morena wa rona Jesu Kreste, ¹⁰ya re shwetseng, hore, leha re fadimeha, leha re robetse, re phelele mahong le yena. ¹¹Ka baka leo, le ke le tshedisane, mme le hahisane, jwalokaha le fela le etsa.

Ditemoso tse ding. Ditumediso.

¹²Re a le rapela, banabeso, re re: Le ke le hlomphe ba sebetsang hara lona, ba le busang Moreneng, ba le kgothatsang. ¹³Le ba hlomphe haholoholo ka lerato, ka baka la tshebetso ya bona. Dudisanang hammoho ka kgotso. ¹⁴Hape, banabeso, re a le rapela, hore le ke le lokise ba sa yeng ka molao, le tshedise ba pelo di tepeletseng, le tiise ba fokolang, mme le be le mamello ho bohle. ¹⁵Le bone hore ho se ke ha eba ya lefetsang bobe ka bobe; le mpe le batle kamehla se ka bang molemo ho e mong le e mong hara lona, le ho bohle. ¹⁶Thabang kamehla. ¹⁷Se phetseng ho rapela. ¹⁸Lebohang nthong tsohle; hobane ke seo Modimo o ratang le ka se etsa ho Jesu Kreste. ¹⁹Le se ke la tima Moya. ²⁰Le se ke la nyedisa ho porofeta. ²¹Lekang tsohle; le tiise tse molemo. ²²Tshabang tsohle tse tshwanang le bobe. ²³Modimo wa kgotso, wona ka sebele, o le halaletse, o le etse ba phethehileng; kaofela ha moya wa lona, le ha pelo ya lona, le ha mmele wa lona, ho bolokelwe ho hlaheng ha Morena wa rona Jesu Kreste ho se na sekodi. ²⁴Ya le bitsang o a tshepeha, ke yena ya tla etsa le hona. ²⁵Banabeso, re rapelleng. ²⁶Dumedisang baena bohle ka kako e halalelang. ²⁷Ke le rapela ka Morena, ke re, lengolo lena le ke le ballwe baena bohle ba halalelang. ²⁸Mohau wa Jesu Kreste, Morena wa rona, o be le lona. Amen!