1 Ke tsena dihlooho tsa matlo a bontata bona, hape ke ana mangolo a masika a ba nyolohileng Babilona le nna, mehleng ya puso ya morena Artakserksese:
2 Ho bara ba Finease, ke Gershome; ho bara ba Ithamare, ke Daniele; ho bara ba Davida, ke Hatthushe;
3 ho bara ba Shekania, ke Sakaria wa bara ba Pareoshe, ya kileng a ngolwa hammoho le ba batona ba lekgolo le nang le mashome a mahlano;
4 ho bara ba Pakathe-Moabe, ke Eliwenai, mora Serahia, a ena le ba batona ba makgolo a mabedi;
5 ho bara ba Shekania, ke mora Jakasiele, a ena le ba batona ba makgolo a mararo;
6 ho bara ba Adine, ke Ebede, mora Jonathane, a ena le ba batona ba mashome a mahlano;
7 ho bara ba Elame, ke Esaia, mora Athalia, a ena le ba batona ba mashome a supileng;
8 ho bara ba Shefathia, ke Sebadia, mora Mikaele, a ena le ba batona ba mashome a robileng meno e le mmedi;
9 ho bara ba Joabe, ke Abdiase, mora Jehiele, a ena le ba batona ba makgolo a mabedi a nang le leshome le metso e robileng meno e le mmedi;
10 ho bara ba Shelomithe, ke mora Josifia, a ena le ba batona ba lekgolo le nang le mashome a tsheletseng;
11 ho bara ba Bebai, ke Sakaria, mora Bebai, a ena le ba batona ba mashome a mabedi a metso e robileng meno e le mmedi;
12 ho bara ba Asgade, ke Johanane, mora Hakkathane, a ena le ba batona ba lekgolo le nang le leshome le le leng;
13 ho bara ba Adonikame, e leng ba ho qetella, ke ana mabitso a bona: Elifelethe, Jeiele, le Shemaia, ba ena le ba batona ba mashome a tsheletseng;
14 ho bara ba Bigvai, ke Uthai le Sabbude, ba ena le ba batona ba mashome a supileng.
15 Ka ba phutha nokeng e mathelang Ahava, mme ra emisa teng tshiu tse tharo; eitse ha ke hlahloba setjhaba le baprista, ke se ke ka fihlela le a mong wa bara ba Levi.
16 Yaba ke romela ho bitsa Eliesere, Ariele, Shemaia, Elnathane, Jaribe, Elnathane, Nathane, Sakaria, le Meshullame, e leng dihlooho, le Jojaribe le Elnathane, banna ba kelello;
17 ka ba laetsa bakeng sa Iddo, kgosana ya nahanyana ya Kasifia, ka ba nea ditaba tseo ba tla di bolella Iddo, le ngwanabo, le Banethinime ba ahileng nahanyaneng ya Kasifia, ka re, ba re tlisetse ba tlang ho tshwara tshebeletso ya ntlo ya Modimo wa rona.
18 Kamoo letsoho le molemo la Modimo wa rona le neng le ntse le le ho rona kateng, ba re tlisetsa monna ya kelello wa bara ba Mahadi, mora Levi, mora Iseraele, e leng Sherebia le bara ba hae le banababo, ba entse leshome le metso e robileng meno e le mmedi;
19 e mong ke Hashabia, a ena le Esaia wa bara ba Merari, le banababo le bara ba bona, ba entse mashome a mabedi.
20 Ha tla le Banethinime ba makgolo a mabedi a mashome a mabedi ba kgethilweng ka mabitso kaofela a bona, e le bara ba Banethinime bao Davida le dihlooho ba neng ba ba neetse tshebeletso ya Balevi.
21 Yare re sa le nokeng ya Ahava, ka bolela tsatsi la ho itima dijo, re tle re ikokobetse pela Modimo wa rona, hore re ikopele ho wona leeto le letle la rona, le la bana ba rona, le la ntho tsohle tsa rona.
22 Hobane ke ne ke le dihlong tsa ho kopa sehlopha sa bahlabani le bapalami ho morena ho re lwantshetsa dira tseleng, etswe re ne re boleletse morena, ra re: Letsoho la Modimo wa rona le emela bohle ba o batlang, athe matla le bohale ba wona di lwantsha bohle ba o furallang.
23 Ra itima dijo jwalo, mme ra batla thuso ho Modimo wa rona, mme wa re utlwa.
24 Yaba ke kgetha baprista ba leshome le metso e mmedi ba dihlooho, e le Sherebia, le Hashabia, le banababo bona ba leshome;
25 ka ba lekanyetsa boima ba silefera le kgauta, le ba mesebetsi e leng kabelo e abetsweng ntlo ya Modimo wa rona ke morena le banna ba hae ba lekgotla le mahosana a hae le Baiseraele bohle ba neng ba le teng.
26 Ka di lekanya, mme ka ba nea talenta tsa silefera tse makgolo a tsheletseng a mashome a mahlano, le mesebetsi ya silefera e etsang talenta tse lekgolo, le talenta tsa kgauta tse lekgolo;
27 le mehope e mashome a mabedi ya kgauta, e theko ya didarike tse sekete; le dipitsa tse pedi tsa koporo e hlwekileng, tse benyang jwaloka kgauta, tse kang kgauta ka theko.
28 Ka re ho bona: Le kgethetswe Jehova; dipitsa le tsona di kgethehile; ha e le silefera le kgauta, ke mpho e etseditsweng Jehova, Modimo wa bontata lona, ka ho rata.
29 Fadimehang, le di boloke, ho fihlela mohla le tla lekanya boima ba tsona pontsheng ya dihlooho tsa baprista le Balevi, le dihloho tsa matlo a bontata Iseraele, hae Jerusalema, kamoreng tsa ntlo ya Jehova.
30 Ha ho le jwalo, baprista le Balevi ba amohela silefera le kgauta le mesebetsi e meng, ka boima ba tsona, e le hore ba tle ba di ise Jerusalema, tlung ya Modimo wa rona.
31 Ra tloha nokeng ya Ahava ka la leshome le metso e mmedi la kgwedi ya pele, re lebile Jerusalema. Letsoho la Modimo wa rona la nna la eba ho rona, mme wa re namolela matsohong a dira le ho ba re laletseng tseleng.
32 Ra ba ra fihla Jerusalema, ra kgatholoha tshiu tse tharo teng.
33 Ka letsatsi la bone, ra lekanya boima ba silefera le kgauta le mesebetsi, re le ka tlung ya Modimo wa rona, ra di neela matsohong a moprista Meremothe, mora Uria, ba ena le Eleasare, mora Finease, le Josabade, mora Joshua, le Noadia, mora Binnui, e leng Balevi,
34 ka palo le ka boima ba tsona tsohle; boima ba tsohle ba ba ba ngolwa hona mohlang oo.
35 Yaba ba kgoleho ba neng ba kgutlile kgolehong, ba hlabela Modimo wa Iseraele mahlabelo a ditjheso; ha hlabelwa Baiseraele bohle dipoho tse leshome le metso e mmedi, le dipheleu tse mashome a robileng mono o le mong a metso e tsheletseng, le dikonyana tse mashome a supileng a metso e supileng, le diphooko tse leshome le metso e mmedi tsa sehlabelo sa sebe; tsohle tsa hlabelwa Jehova ka mokgwa wa ditjheso.
36 Hape, ba nea matona a morena le babusisi ba mose o kwano ho noka ditaelo tsa morena. Yaba bao ba emela setjhaba le ntlo ya Modimo.