Levitike

²⁷Etlare hobane moprista a mo tadimisisa ka letsatsi la bosupa, ekare ha bohloko bo kekile letlalong, moprista o tla mmolela hore o sesila; ke bohloko ba lepera. ²⁸Empa ekare ha letheba le ntse le dutse bodulong ba lona, le sa ka la keka letlalong, le sobane feela, ke lebadi la ho tjha; moprista o tla mmolela hore o hlwekile, hobane ke lebadi la ho tjha. ²⁹Ekare ha monna, kapa mosadi, a ena le setshwa hloohong, leha e le ditedung, moprista o tla tadimisisa setshwa seo; ³⁰ha a bona hoba se phobetse ho feta letlalo, mme mohwete o mosehlana o mosesane o le teng, moprista o tla mmolela hore o sesila; ke setshwa; ke lepera la hlooho, leha e le la ditedu. ³¹Ekare ha moprista a tadimisisa bohloko ba setshwa, mme ha a lemoha hoba ha ho sephobe se phobetseng ho feta letlalo, empa mohwete o motsho o le siyo teng, moprista o tla kwalla motho eo ya jewang ke setshwa ka matsatsi a supileng. ³²Moprista o tla tadimisisa bohloko boo ka letsatsi la bosupa; ha a fumana hoba setshwa ha se a ka sa keka, mme ha ho mohwete o mosehlana, le hoba setshwa ha se a ka sa hlahisa sephobe se phobetseng ho feta letlalo, ³³mobabi o tla ipeola, empa a se ke a beola moo setshwa se leng teng; moprista o tla kwalla la bobedi motho ya jewang ke setshwa ka matsatsi a supileng.