1 Jehova a boela a bua le Moshe, a re:
2 Bolella bana ba Iseraele, o re ho bona:
3 Ke nna Jehova, Modimo wa lona. Le se ke la lekisa se etswang naheng ya Egepeta, moo le kileng la aha teng, leha e le se etswang naheng ya Kanana eo ke ya le kenya ho yona, mme le se ke la latela mekgwa ya bona.
4 Le tla ya ka ditaelo tsa ka, le boloke melao ya ka ho ya ka yona. Ke nna Jehova, Modimo wa lona.
5 Le tla boloka ke hona melao ya ka le ditaelo tsa ka; motho ya tlang ho ya ka tsona, o tla phela ke tsona. Ke nna Jehova.
6 Ho se ke ha eba ya atamelang ho mosadi e leng wa madi a le mang le yena ho apola bofeela ba hae. Ke nna Jehova.
7 O se ke wa apola bofeela ba ntatao, ke hore bofeela ba mmao; ke mmao, o se ke wa apola bofeela ba hae.
8 O se ke wa apola bofeela ba mosadi wa ntatao; ke bofeela ba ntatao.
9 O se ke wa apola bofeela ba kgaitsedi ya hao, moradi wa ntatao, leha e le moradi wa mmao, ya tswaletsweng hae, kapa e leng letlalepepilwe.
10 O se ke wa apola bofeela ba moradi wa mora wa hao, leha e le ba moradi wa moradi wa hao, hobane ke bofeela ba hao.
11 O se ke wa apola bofeela ba moradi wa mohatsa ntatao ya tswetsweng ke ntatao, hobane ke kgaitsedi ya hao; o se ke wa apola bofeela ba hae.
12 O se ke wa apola bofeela ba rakgadiao, hobane ke madi a ntatao.
13 O se ke wa apola bofeela ba ngwanabo mmao, hobane ke madi a mmao.
14 O se ke wa apola bofeela ba ngwanabo ntatao, ke ho re o se ke wa atamela mosadi wa hae, hobane ke mmangwanao.
15 O se ke wa apola bofeela ba ngwetsi ya hao, hobane ke mosadi wa mora wa hao; o se ke wa apola bofeela ba hae.
16 O se ke wa apola bofeela ba mohatsa ngwaneno, ke bofeela ba ngwaneno.
17 O se ke wa apola bofeela ba mosadi le ba moradi wa hae; o se ke wa nka moradi wa mora hae, leha e le moradi wa moradi wa hae ho apola bofeela ba bona; hobane e ntse e le ba madi a le mang; ke polao.
18 O se ke wa nyala ngwanabo mosadi wa hao ho baka lefufa, ka ho apola bofeela ba hae mabapa le mosadi wa hao, ha a sa ntse a phela.
19 O se ke wa atamela mosadi ya idileng, ho apola bofeela ba hae.
20 O se ke wa bokana le mosadi wa wa heno ho itshela sesila le yena.
21 O se ke wa neela ngwana leha a le mong wa bana ba hao hore a abelwe Moloke, o tle o se ke wa nyefola lebitso la Modimo wa hao. Ke nna Jehova.
22 O se ke wa robala le monna, jwalokaha ho robalwa le mosadi: ke ntho e manyala.
23 O se ke wa kopano le phoofolo ho itshela sesila ka yona. Mosadi a se ke a emela phoofolo ho robala le yona: ke manyala a tshabehang.
24 Le se ke la itshela sesila ka efe le efe ya ntho tseo, hobane ke ka dintho tseo kaofela ditjhaba tseo ke yang ho di lelekisa pela lona di itshetseng ditshila.
25 Ke ka tseo ba di entseng naha e silafetseng; jwale, ke tla e otla ka manyala a yona, mme e tla hlatsa baahi ba yona.
26 Le boloke ke hona melao le ditaelo tsa ka, mme le se ke la etsa leha le le leng la manyala ao, leha e le ya tswaletsweng ha eno, leha e le moditjhaba ya jakileng hara lona.
27 Hobane ke wona manyala wohle ao a kileng a etswa ke batho ba naha eo, ba neng ba ahile teng pele, mme naha e kile ya silafala.
28 Iponeleng hore naha e se ke ya le hlatsa, ha le e silafatsa, jwalokaha e hlatsitse ditjhaba tse neng di le ho yona pele.
29 Hobane bohle ba tlang ho etsa leha le le leng la manyala ao, ba tla tloswa hara setjhaba sa ba habo bona.
30 Le boloke melao ya ka, mme le se ke la etsa leha o le mong wa mekgwa e manyala e neng e etswa le eso ho kene, mme le se ke la itshela ditshila ka yona. Ke nna Jehova, Modimo wa lona.