1 Jehova a boela a bua le Moshe, a re:
2 Bolella bana ba Iseraele, o re ho bona: Mekete ya Jehova eo le tla e mema, e tla ba diphutheho tse halalelang. Ke ena mekete ya ka:
3 Ho tla sebetswa ka matsatsi a tsheletseng, empa letsatsi la bosupa ke Sabatha, ke letsatsi la phomolo; ka lona phutheho e halalelang e tla ba teng. Le se ke la sebetsa mosebetsi leha o le mong; ke Sabatha ya Jehova meahong ya lona kaofela.
4 Ke ena mekete ya Jehova, le diphutheho tse halalelang tseo le tlang ho di mema nakong ya tsona:
5 Ka kgwedi ya pele, ka letsatsi la leshome le metso e mene la kgwedi, ka nako ya mantsiboya, e tla ba Paseka ya Jehova.
6 Ka letsatsi la leshome le metso e mehlano la kgwedi eo, e tla ba mokete wa mahobe a se nang ditomoso, o etsetswang Jehova; le tla ja mahobe a se nang ditomoso ka matsatsi a supileng.
7 Ka letsatsi la pele, le tla ba le phutheho e halalelang; le se ke la sebetsa mosebetsi le o mong.
8 Ka matsatsi a supileng, le tla hlahisetsa Jehova mahlabelo a tjheswang ka mollo. Ka letsatsi la bosupa, phutheho e halalelang e tla ba teng; le se ke la etsa mosebetsi le o mong ka lona.
9 Jehova a boela a bua le Moshe, a re:
10 Bolella bana ba Iseraele, o re ho bona: Etlare hobane le kene naheng eo ke le neang yona, mohla le kotulang masimo, le tla tlisa ho moprista ngata ya dilopotsiya tsa kotulo ya lona.
11 O tla tsokoletsa ngata ka nqa tsohle pela Jehova, e tle e dumellwe; moprista o tla e tsokotsa jwalo, ka le hlahlamang Sabatha.
12 Ka letsatsi leo ho tsokotswang ngata, le tla hlabela Jehova konyana e tona e lemo se le seng, e se nang sekodi, e be setjheso:
13 le tla se ekeletsa ka dikarolo tse pedi tsa boshome ba efa ya lefi la phofo le dubilweng ka ole, e be nyehelo e tjheswang ka mollo, e monko o monate ho Jehova: tshelo ya veine eo le tla e hlahisa e be ya karolo ya bone ya hine.
14 Le se ke la ja bohobe, leha e le dihlaku tsa koro e besitsweng, kapa e tutsweng, ho fihlela letsatsi lona leo le hlahisang nyehelo ho Modimo wa lona ka lona. Ke molao o sa feleng, oo le tlang ho ya ka wona, lona le ditloholo tsa lona meahong ya lona yohle.
15 Ho tloha letsatsing le hlahlamang Sabatha, e leng letsatsi leo le tlisitseng ngata hore e tsokotswe, le tla bala veke tse supileng tse tletseng.
16 Le tla bala matsatsi a mashome a mahlano ho isa letsatsing le hlahlamang la Sabatha ya bosupa; le tla etsetsa Jehova nyehelo e ntja.
17 Le tla tlisa mahobe a mabedi a tswang matlung a lona, a tlang ho tsokotswa, e le mahobe a entsweng ka karolo tse pedi tsa boshome tsa lefi la phofo, a phehilwe, a lomositswe; ke dilopotsiya tsa Jehova.
18 Mahobe a tla ekeletswa ka setjheso seo le tla se etsetsa Jehova ka konyana tse supileng tse lemo se le seng, tse se nang sekodi, le ka pohwana, le ka dipheleu tse pedi; le tla se hlahisa le nyehelo le ditshelo tsa sona, e tle e be sehlabelo se tjhesitsweng ka mollo, se monko o monate ho Jehova.
19 Le tla hlahisa phooko, e be sehlabelo sa sebe, le dikonyana tse tona tse pedi tse lemo se le seng, e be sehlabelo sa teboho.
20 Moprista o tla tsokotsa ntho tseo pela Jehova, hammoho le bohobe ba dilopotsiya, le dikonyana tse pedi; di tla kgethelwa Jehova, mme e tla ba tsa moprista.
21 Le tla mema mokete ka tsatsi lona leo, le etse phutheho e halalelang; le se ke la sebetsa mosebetsi le o mong. Ke molao o sa feleng, oo le tlang ho ya ka wona, lona le ditloholo tsa lona meahong ya lona kaofela.
22 Etlare ha le kotula naheng ya lona, o se ke wa qetela ho kotula lehlakore le leng la tshimo ya hao, mme o se ke wa thonaka se ka kgwahlapiswang. O tla se tlohella bafumanehi le moditjhaba. Ke nna Jehova, Modimo wa lona.
23 Jehova a boela a re ho Moshe:
24 Bolella bana ba Iseraele, o re: Ka kgwedi ya bosupa, ka letsatsi le qalang kgwedi, letsatsi la phomolo le tla ba teng, leo le tla le tsebiswa ka moletso wa diterompeta, mme phutheho e halalelang e tla ba teng.
25 Le se ke la sebetsa mosebetsi le o mong; empa le tla hlahisetsa Jehova mahlabelo a tjheswang ka mollo.
26 Jehova a boela a bua le Moshe, a re:
27 Ka letsatsi la leshome la kgwedi eo ya bosupa, e tla ba letsatsi la dipheko; le ke le be le phutheho e halalelang ka lona, mme le hlomole meya ya lona, mme le tla hlahisetsa Jehova mahlabelo a tjheswang ka mollo.
28 Ka letsatsi leo, le se ke la sebetsa mosebetsi le o mong, hobane ke letsatsi la dipheko leo e ka kgonang le etse pheko ka lona pela Jehova, Modimo wa lona.
29 Motho e mong le e mong ya sa tlong ho hlomoha ka letsatsi leo, o tla tloswa hara setjhaba sa habo.
30 Motho e mong le e mong ya tlang ho sebetsa mosebetsi ka letsatsi leo, ke tla mo timetsa hara setjhaba sa habo. Le se ke la etsa mosebetsi le o mong.
31 Ke molao o sa feleng oo le tlang ho ya ka wona meahong ya lona yohle, lona le ditloholo tsa lona kaofela.
32 Ho lona e tla ba Sabatha, letsatsi la phomolo; le tla hlomola meya ya lona; ho tloha mantsiboya a letsatsi la boroba mono o le mong ho isa mantsiboya a le hlahlamang, le tla boloka Sabatha ya lona.
33 Jehova a boela a bua le Moshe, a re:
34 Bolella bana ba Iseraele, o re: Ho tloha letsatsing la leshome le metso e mehlano la kgwedi eo ya bosupa, ho tla etsetswa Jehova ka matsatsi a supileng mokete wa Metlotlwane.
35 Ka letsatsi la pele, e tla ba phutheho e halalelang; le se ke la sebetsa mosebetsi le o mong.
36 Ka matsatsi a supileng le tla hlahisetsa Jehova mahlabelo a tjhesitsweng ka mollo. Ka letsatsi la boroba meno e le mmedi, le tla ba le phutheho e halalelang; le tla hlahisetsa Jehova sehlabelo se tjheswang ka mollo; e tla ba phutheho e phahameng; le se ke la sebetsa mosebetsi le o mong.
37 Ke yona eo mekete ya Jehova ya diphutheho tse halalelang, eo le tlang ho e mema, le tle le hlahisetse Jehova mahlabelo a tjheswang ka mollo, le ditjheso, le nyehelo, le mahlabelo, le ditshelo; ntho e nngwe le e nngwe e ke e etswe ka letsatsi le beetsweng yona.
38 Hape, le boloke Disabatha tsa Jehova, mme le nne le hlahisetse Jehova dineo tsa lona, le mahlabelo wohle a ho phetha dikano tsa lona, le dinyehelo tsohle tsa lona tsa boithatelo.
39 Ka letsatsi la leshome le metso e mehlano la kgwedi ya bosupa, ha le se le kotutse dijo tsa naha, le tla etsetsa Jehova mokete ka matsatsi a supileng. Le tla phomola ka letsatsi la pele, le be le phomole le ka letsatsi la boroba meno e le mmedi.
40 Ka letsatsi la pele, le tla inkela ditholwana tsa difate tse ntle, le makala a dipalema, le mahlaku a matenya a difate le a meduwane ya noka, mme le tla ithabela pela Jehova, Modimo wa lona, ka matsatsi a supileng.
41 Ka selemo se seng le se seng, le tla etsetsa Jehova mokete ka matsatsi a supileng. Ke molao o sa feleng melokong ya lona; le tla o etsa ka kgwedi ya bosupa.
42 Ka matsatsi a supileng, le tla hlola metlotlwaneng; bohle ba tswaletsweng naheng ya Iseraele ba tla hlola metlotlwaneng,
43 hore ditloholo tsa lona di tsebe hoba ke ahellisitse bana ba Iseraele metlotlwaneng, ha ke se ke ba ntshitse naheng ya Egepeta. Ke nna Jehova, Modimo wa lona.
44 Moshe a bolella bana ba Iseraele mekete ya Jehova ka mokgwa o jwalo.