Levitike

³³mobabi o tla ipeola, empa a se ke a beola moo setshwa se leng teng; moprista o tla kwalla la bobedi motho ya jewang ke setshwa ka matsatsi a supileng. ³⁴Moprista o tla tadimisisa setshwa ka letsatsi la bosupa, mme ekare ha a fihlela hoba ha se a ka sa keka letlalong, ho sa bonahale hore se phobetse ho feta letlalo, moprista o tla mmolela hore o hlwekile; o tla hlatswa diaparo tsa hae, mme o tla hlweka. ³⁵Empa etlare hobane a bolelwe hoba o hlwekile, setshwa ha se kekile letlalong, moprista o tla tadima, ³⁶mme ha a fihlela hore setshwa se kekile letlalong, moprista ha a sa na ho batlisisa mohwete o mosehlana, o sesila. ³⁷Empa ha setshwa se ntse se dutse bodulong ba sona, mme mohwete o motsho o medile ho sona, setshwa se fodile; o hlwekile, mme moprista o tla mmolela hore o hlwekile. ³⁸Ekare ha monna, kapa mosadi, a ena le matheba letlalong la mmele wa hae, e le matheba a masweu, ³⁹mme moprista ha tadimisisa, a fihlela hore matheba a letlalong la mmele wa hae a bosweu bo fifetseng, ke matheba feela a itlhahetseng letlalong; o hlwekile.