Levitike

³⁸Ekare ha monna, kapa mosadi, a ena le matheba letlalong la mmele wa hae, e le matheba a masweu, ³⁹mme moprista ha tadimisisa, a fihlela hore matheba a letlalong la mmele wa hae a bosweu bo fifetseng, ke matheba feela a itlhahetseng letlalong; o hlwekile. ⁴⁰Ekare ha hlooho ya motho e phumuhile, ke lefatla: o hlwekile. ⁴¹Ekare ha a phumuhile ka phatleng, ke lekulo, o hlwekile. ⁴²Empa ekare ha lephotong le boreledi la hae, leha e le phatleng e kulehileng ya hae, letheba le bosweu bo bofubetswana le le teng, ke lekgopho la lepera lephotong la hae le boreledi, leha e le phatleng ya hae e kulehileng. ⁴³Moprista o tla mo tadimisisa, mme ha a fihlela hoba letheba ke lekgopho le bosweu bo bofubetswana lephotong le boreledi la hae, kapa phatleng ya hae e kulehileng, le tshwanang le lepera le letlalong la mmele, ⁴⁴ke molepera, o na le sesila; moprista a ke ke a lesa ho mmolela hore o sesila; leqeba la hae le hloohong.