Levitike

⁵³Empa ha moprista a bona hoba letheba ha le a ka la keka seaparong, le ditshweleng tse otlolohileng, kapa ho tse tshekaletseng, kapa mosebetsing ofe le ofe wa letlalo, ⁵⁴moprista o tla laela hore ho hlatsuwe seo letheba le leng ho sona, mme moprista o tla se kwalla la bobedi ka matsatsi a supileng. ⁵⁵Etlare hobane se nang le letheba se hlatsuwe, moprista o tla se tadimisisa; ha a bona hoba letheba ha le a ka la fetoha mmala, le hobane ha le a ka la keka, se ntse se le ditshila, mme se tla tjheswa ka mollo: ke phureho ka lehlonong la sona, leha e le ka bophumulehong ba sona. ⁵⁶Empa etlare hobane letheba le hlatsuwe, moprista ha a le tadimisisa, mme a bona hoba le sobane, o tla le hahola, le tlohe seaparong, kapa letlalong, kapa ditshweleng tse otlolohileng, kapa ho tse tshekaletseng. ⁵⁷Ha letheba le ka boela la hlaha seaparong, kapa ditshweleng tse otlolohileng, kapa ho tse tshekaletseng, leha e le mosebetsing ofe le ofe o entsweng ka letlalo, ke lekgopho la lepera; seo le leng ho sona se tla tjheswa ka mollo. ⁵⁸Empa seaparo, kapa ditshwele tse otlolohileng, kapa tse tshekaletseng, leha e le mosebetsi ofe le ofe wa letlalo o hlatswitsweng moo letheba le hlakohileng, o tla hlatsuwa la bobedi, mme o tla hlweka. ⁵⁹Ke wona molao bakeng se letheba la lepera diaparong tsa boya, kapa tsa lene, leha e le ditshweleng tse otlolohileng, kapa ho tse tshekaletseng, leha e le mosebetsing ofe le ofe o entsweng ka letlalo, ho tle ho bolelwe ka wona ha ntho e hlwekile, leha e sa hlweka.