Levitike

⁹Ekare ha motho a jewa ke bohloko ba lepera, o tla iswa ho moprista. ¹⁰Moprista o tla mo tadimisisa. Ha kokobalo e tshweu e le teng letlalong, e sweufaditseng mohwete, mme hodima kokobalo eo ho bonahala nama e petohileng, ¹¹ke lepera le meletseng letlalong la mmele wa hae; moprista o tla mmolela hore o sesila; a ke ke a mo kwalla tlung, hobane o se a le sesila. ¹²Empa ekare ha lepera le hlaha hohle jwaloka lekgopho le apesitseng letlalo kaofela la mobabi, ho nka hloohong ho isa maotong, hohle moo moprista a ka tadimang teng, ¹³mme moprista ha a tadima, a bona hoba lepera le apesitse mmele wa hae kaofela, o tla bolela hore mobabi o hlwekile; ha a se a fetohile a be mosweu kahohle, o hlwekile. ¹⁴Empa ka letsatsi leo nama e petohileng e bonahalang ho yena ka lona, etlaba o sesila; ¹⁵etlare hobane moprista a bone nama e petohileng, o tla mmolela hore o sesila; nama e petohileng ke sesila, ke lona lepera.