Levitike

³⁹Ka letsatsi la leshome le metso e mehlano la kgwedi ya bosupa, ha le se le kotutse dijo tsa naha, le tla etsetsa Jehova mokete ka matsatsi a supileng. Le tla phomola ka letsatsi la pele, le be le phomole le ka letsatsi la boroba meno e le mmedi. ⁴⁰Ka letsatsi la pele, le tla inkela ditholwana tsa difate tse ntle, le makala a dipalema, le mahlaku a matenya a difate le a meduwane ya noka, mme le tla ithabela pela Jehova, Modimo wa lona, ka matsatsi a supileng. ⁴¹Ka selemo se seng le se seng, le tla etsetsa Jehova mokete ka matsatsi a supileng. Ke molao o sa feleng melokong ya lona; le tla o etsa ka kgwedi ya bosupa. ⁴²Ka matsatsi a supileng, le tla hlola metlotlwaneng; bohle ba tswaletsweng naheng ya Iseraele ba tla hlola metlotlwaneng, ⁴³hore ditloholo tsa lona di tsebe hoba ke ahellisitse bana ba Iseraele metlotlwaneng, ha ke se ke ba ntshitse naheng ya Egepeta. Ke nna Jehova, Modimo wa lona. ⁴⁴Moshe a bolella bana ba Iseraele mekete ya Jehova ka mokgwa o jwalo.