Levitike

²⁴Naheng yohle eo le e ruileng, le tla nea motho tokelo ya ho rekolla tshimo ya hae. ²⁵Ekare ha ngwaneno ya fumanehileng a ka rekisa ka fapha le leng la naha ya hae, eo e leng wa habo ka ho tswalwa, ya nang le tokelo ya ho rekolla, ha e be yena ya rekollang se rekisitsweng ke ngwanabo. ²⁶Ekare ha e mong a se na motho ya nang le tokelo ya ho rekolla, empa a ipatletse e le yena seo a ka rekollang ka sona, o tla bala dilemo, ho tloha mohla ba rekaneng; ²⁷se setseng sa theko, a se busetse ho eo a neng a rekane le yena, mme o tla kgutlela lefeng la hae. ²⁸Empa ha a sitwa ho phetha seo a ka se busetsang ho yena, seo a se rekisitseng se tla dula matsohong a ya se rekileng, ho isa selemong sa Jubile, e be hona eo a tswang, le yane a kgutlelang lefeng la hae. ²⁹Ekare ha e mong a reka ka ntlo e hahilweng motseng o dikilweng ka marako, thekollo ya yona e ka etswa selemo se eso ho fele seo ho rekanweng ka sona; tokelo ya hae ya ho rekolla ke ya lemo se le seng feela. ³⁰Empa ntlo eo e ka motseng o dikilweng ka marako, ha e sa rekollwe, selemo se eso ho fele, e tla dula kamehla ho ya e rekileng, ho isa ditloholong tsa hae; e ke ke ya tswa ho yena le ka Jubile.