Levitike

⁴⁴Mohlanka e motona, leha e le e motshehadi, bao o tla ba rua, o tla ba nka ditjhabeng tse le kopileng; le ka ithekela ho tsona bahlanka ba batona le ba batshehadi. ⁴⁵Le ka ithekela le ho bana ba baditjhaba ba ikahetseng hara lona, le mefuteng ya bona e ho lona, ba tswaletsweng naheng ya lona, mme le tla ba rua; ⁴⁶le tla ba siya ka mokgwa wa lefa ho bara ba lona kamora lona, e be leruo; le tla ba boloka ka ho sa feleng tshebeletsong ya lona jwaloka makgoba. Empa haele ka banababo lona, e leng bana ba Iseraele, ho se be motho ya busang ka thata hodima ngwanabo. ⁴⁷Etlare ha moditjhaba, ya ahileng ha eno, a ka rua, mme ngwaneno a fumaneha pela hae, mme a ithekisa ho moditjhaba ya ikahetseng ha eno, leha e le ho setloholo sa moditjhaba, ⁴⁸thekollo ya hae e ka etswa; e mong wa banababo a ka mo rekolla, ⁴⁹kapa ngwanabo ntatae, kapa mora wa ngwanabo ntatae, kapa e mong wa mofuta wa hae ya haufi le yena ho tswalweng; kapa ha a na le matla, a ke a ithekolle e le yena. ⁵⁰O tla bala le moreki wa hae, a qale ka selemo seo a ithekisitseng ka sona, ho isa selemong sa Jubile; tjhelete ya thekollo e tla lekanngwa ka palo ya dilemo: dilemo di balwe jwaloka tsa motho ya lefjwang.