Levitike

⁴⁹kapa ngwanabo ntatae, kapa mora wa ngwanabo ntatae, kapa e mong wa mofuta wa hae ya haufi le yena ho tswalweng; kapa ha a na le matla, a ke a ithekolle e le yena. ⁵⁰O tla bala le moreki wa hae, a qale ka selemo seo a ithekisitseng ka sona, ho isa selemong sa Jubile; tjhelete ya thekollo e tla lekanngwa ka palo ya dilemo: dilemo di balwe jwaloka tsa motho ya lefjwang. ⁵¹Ekare ha ho setse dilemo tse ngata, o tla lefa thekollo ya hae ka ho e bapisa le palo ya dilemo tseo, le ka tekanyo eo a neng a ruilwe ka yona; ⁵²ha ho setse dilemo di se kae ho isa ho Jubile, o tla di bala; a lefe thekollo ya hae ka tekanyo ya dilemo tseo. ⁵³O tla dula ho yena jwaloka motho ya lefjwang. A ke ke a mmusa ka thata mahlong a hao. ⁵⁴Ekare ha a sa rekollwe ka mokgwa oo, o tla tswa ka selemo sa Jubile, yena le bana ba hae. ⁵⁵Hobane Baiseraele ke bahlanka ba ka; ke bahlanka ba ka bao ke ba ntshitseng naheng ya Egepeta. Ke nna Jehova, Modimo wa lona.