Levitike

²⁸Jehova a bua le Moshe, a re: ²⁹Bolella bana ba Iseraele, o re: Ya tlang ho hlahisa sehlabelo sa hae sa teboho ho Jehova, o tla tlisa ho Jehova nyehelo ya hae e nkilweng sehlabelong sa hae sa teboho. ³⁰O tla tlisa ka matsoho a hae tse tlang ho tjhesetswa Jehova; o tla tlisa mafura le sefuba, sefuba se tle se tsokotswe pela Jehova. ³¹Moprista o tla tjhesa mafura aletareng, mme sefuba e be sa Aarone le bara ba hae. ³²Mahlabelong a lona a teboho, le tla nea moprista letsoho le letona, a le hlahise ka kemiso. ³³Hara bara ba Aarone, ya tlang ho hlahisa ho Jehova madi le mafura a sehlabelo sa teboho, letsoho le letona e tla ba kabelo ya hae. ³⁴Hobane mahlabelong a teboho a bana ba Iseraele, ke nka sefuba se tlang ho tsokotswa, le letsoho le tlang ho hlahiswa ka kemiso, mme ke di nea moprista Aarone le bara ba hae ka taelo ya kamehla, e tlang ho bolokwa ke bana ba Iseraele.